ພິທີປະກາດນາມມະຍົດຊາວໜຸ່ມ 4 ບຸກ ແຂວງຫົວພັນ ຄັ້ງທີ 1 ປະຈໍາປີ 2020 ໄດ້ຈັດຂື້ນຢູ່ທີ່ຫໍວັດທະນະທໍາຂອງ ແຂວງ ໃນວັນທີ 9 ກໍລະກົດ 2021 ນີ້, ໂດຍມີສະຫາຍ ວັນໄຊ ແພງຊຸມມາ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງຫົວພັນ, ສະຫາຍ ອາລຸນໄຊ ສູນນະລາດ ກໍາມະການສູນກາງພັກ ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ມີບັນດາສະຫາຍ ການນໍາແຂວງ ພ້ອມດ້ວຍສະມາຊິກຊາວໜຸ່ມ ເຍົາວະຊົນເຂົ້າຮ່ວມນໍາ.

        ກອງປະຊຸມໄດ້ຮັບຟັງບົດສະຫຼຸບ ການເຄືອນໄຫວຈັດຕັ້ງປະຕິບັດວຽກງານ 4 ບຸກທົ່ວແຂວງໃນໄລຍະຜ່ານມາ ຊື່ງໄດ້ສັງເກດຕີລາຄາຄືນ ຍົກໃຫ້ເຫັນດ້ານດີຜົນງານທີ່ຈັດຕັ້ງປະຕິບັດໄດ້ ເປັນຕົ້ນແມ່ນ: ໄດ້ເອົາໃຈໃສ່ເຮັດວຽກງານສຶກສາອົບຮົມການເມືອງ – ແນວຄິດ ໃຫ້ແກ່ພະນັກງານ, ສະມາຊິກຊາວນຸ່ມ – ໄວໜຸ່ມ, ເຍົາວະຊົນ ນັບແຕ່ຂັ້ນແຂວງ, ເມືອງ ລົງຮອດຂັ້ນບ້ານ, ສ້າງເງື່ອນໄຂໃຫ້ສະມາຊິກຊາວໜຸ່ມ – ເຍົາວະຊົນບັນດາເຜົ່າ ໄດ້ສືກສາຄົ້ນຄ້ວາຮໍ່ໍາຮຽນ, ຝືກອົບຮົມ, ຍົກລະດັບວິຊາສະເພາະ, ວິຊາຊີບທີ່ແນ່ນອນ, ໃນການພັດທະນາຄວາມຮູ້ ຄວາມສາມາດ, ຫົວຄິດປະດິດສ້າງ, ວິທະຍາສາດເຕັກໂນໂລຊີ, ພາສາຕ່າງປະເທດ.

ເອົາໃຈໃສ່ປັບປຸງການຈັດຕັ້ງໃນຫຼາຍດ້ານ ນັບທັງດ້ານເນື້ອໃນ, ຮູບການ ແລະ ວິທີການເຄື່ອນໄຫວຕ່າງໆ ໃຫ້ຖືກຕ້ອງ, ສອດຄ່ອງກັບສະພາບວຽກງານຕົວຈິງ. ຄະນະຊາວໜຸ່ມແຕ່ລະຂັ້ນໄດ້ສົມທົບກັບຄະນະພັກ, ຄະນະນໍາຂັ້ນຂອງຕົນ ເອົາໃຈໃສ່ຊຸກຍູ້ສົ່ງເສີ່ມແກ້ໄຂຊີວິດການເປັນຢູ່ ໂດຍເລັ່ງໃສ່ການຜະລິດເປັນສິນຄ້າ, ການປູກ, ການລ້ຽງ, ຕໍ່າຫູກທໍໄໝ, ຄ້າຂາຍ ແລະ ການບໍລິການຕ່າງໆ ເຮັດໃຫ້ສະມາຊິກຊາວໜຸ່ມຫຼາຍຄອບຄົວ ກາຍເປັນຄອບຄົວຊາວໜຸ່ມຕົວແບບ, ຜ່ານການປະເມີນຜົນໃນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 4 ບຸກ ສາມາດບັນລຸຕາມມາດຖານເງື່ອນໄຂຂອງຄະນະຊາວໜຸ່ມ ປະຊາຊົນປະຕິວັດລາວວາງອອກ, ດ້ານແນວຄິດໄດ້ 90,9%, ດ້ານຝືກຝົນຫຼໍ່ຫຼອມຮໍ່າຮຽນໄດ້ 85%, ດ້ານວຽກງານຈັດຕັ້ງໄດ້ 90%, ດ້ານວຽກງານວິຊາຊີບ – ສ້າງວຽກເຮັດງານທໍາໄດ້ 85%, ຈັດປະເພດດີໄດ້ 87,5%, ສາມາດບັນລຸຊາວໜຸ່ມ 4 ບຸກທົ່ວແຂວງ.

        ໂອກາດນີ້ສະຫາຍ ອາລຸນໄຊ ສູນນະລາດ ກໍາມະການສູນກາງພັກ ເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ ຍັງໄດ້ມອບໃບຢັ້ງຢືນຊາວໜຸ່ມ 4 ບຸກ ໃຫ້ແກ່ຄະນະຊາວໜຸ່ມ ປະຊາຊົນ ປະຕິວັດລາວ ແຂວງຫົວພັນຢ່າງສົມກຽດ.

ແຂວງຫົວພັນ ກໍ່ຄື ຄະນະບໍລິການງານຊາວໜຸ່ມແຂວງ ຈະສືບຕໍ່ນໍາພາ-ຊີ້ນຳຊາວໜຸ່ມ, ໄວໜຸ່ມ, ເຍົາວະຊົນ ບັນດາເຜົ່າໃນທົ່ວແຂວງ ເຄື່ອນໄຫວຈັດຕັ້ງປະຕິບັດ ເນື້ອໃນຂໍ້ແຂ່ງຂັນ 4 ບຸກ ໃຫ້ບັນດຸຕາມລະດັບຄາດໝາຍທີ່ວາງໄວ້. ໃນນີ ເພີ່ມທະວີສຶກສາອົບຮົມການເມືອງແນວຄິດໃຫ້ພະນັກງານ ສະມາຊິກຊາວໜຸ່ມ, ໄວໜຸ່ມ ແລະ ເຍົາວະຊົນ-ອະນຸຊົນໃຫ້ໄດ້ 95% ຂື້ນໄປ, ປັບປຸງການຈັດຕັ້ງຊາວນໜຸ່ມແຕ່ລະຂັ້ນ ໃຫ້ໜັກແໜ້ນເຂັ້ມແຂງ, ສ້າງຮາກຖານ ໜ່ວຍຊາວໜຸ່ມເຂັ້ມແຂງ ໃຫ້ໄດ້ 90% ຮາກຖານ ໜ່ວຍທີ່ຂື້ນກັບແຂວງ, 85% ຂອງຮາກຖານ ໜ່ວຍທີ່ຂື້ນກັບເມືອງ, ສືບຕໍ່ຜັນຂະຫຍາຍມະຕິກອງປະຊຸມໃຫຍ່ຄັ້ງທີ 10 ຂອງພັກ ດ້ວຍເນື້ອໃນ 4 ບຸກທະລຸຕິດພັນກັບເນື້ອໃນຂໍ້ແຂ່ງຂັນ 4 ບຸກຂອງຄະນະຊາວໜຸ່ມ ແລະ ການລົງກໍ່ສ້າງຮາກຖານໃຫ້ໄດ້ 85%, ເຕົ້າໂຮມຄວາມສາມັກຄີຊາວໜຸ່ມ – ເຍົາວະຊົນບັນດາເຜົ່າໃນທົ່ວແຂວງ ໃຫ້ມີຄວາມໜັກແໜ້ນ ແລະ ຍາດແຍ່ງທືນຊ່ວຍເຫຼືອຈາກພາຍໃນ ແລະ ຕ່າງປະເທດ ເພື່ອມາພັດທະນາຊາວໜຸ່ມ – ເຍົາວະຊົນໃຫ້ໄດ້ 85%ຂື້ນໄປ, ສືບຕໍ່ຊຸກຍູ້ສົ່ງເສີມ, ສ້າງຊາວໜຸ່ມຕົວແບບ ແລະ ວຽກດີຄົນເດັ່ນ, ທັດສະນະແລກປ່ຽນບົດຮຽນ ກັບຊາວໜຸ່ມເພື່ອນມິດຍຸດທະສາດ ຕາມເງື່ອນໄຂຕົວຈີງ.