ມີເດຍລາວແຂວງວຽງຈັນ ພາບ-ຂ່າວ: ແຫວນຄຳ ພິທີ ມອບ – ໂອນ ວຽກງານວິທະຍາສາດ ແລະ ເຕັກໂນໂລຊີ ໄປຂຶ້ນກັບຂະເເໜ່ງການອື່ນໄດ້ຈັດຂື້ນ ຢ່າງເປັນທາງການ ໃນຕ່ອນບ່າຍວັນທີ 7 ກໍລະກົດ 2021 ທີ່ຜ່ານມານີ້ ຢູ່ທີ່ສະໂມສອນຫ້ອງວ່າການເມືອງໝື່ນ ໂດຍການເປັນປະທານ ຂອງທ່ານ ພອນເທີດ ສຸຫວັດດີ ກຳມະການພັກແຂວງ,ເລຂາພັກເມືອງ ເຈົ້າເມືອງໆໝື່ນ ,ມີຄະນະປະຈຳ,ກຳມະການພັກເມືອງ ແລະ ບັນດາຫ້ອງການທີ່ກ່ຽວຂ້ອງເຂົ້າຮ່ວມ.

ທ່ານ ຮົວຊົງ ລາຈືຕຸກີ ຮອງຄະນະຈັດຕັ້ງເມືອງໝື່ນ ໄດ້ຜ່ານຂໍ້ຕົກລົງຂອງນາຍົກລັດຖະມົນຕີ ວ່າດ້ວຍ: ການຊັບຊ້ອນບາງວຽກງານຂອງລັກຖະບານ ສະບັບເລກທີ 17/ນຍ ລົງວັນທີ 11 ມີນາ 2021 ,ຜ່ານເເຈ້ງການຂອງຫົວໜ້າພະແນກພາຍໃນເເຂວງວຽງຈັນເລກທີ 24 /ພນ,ວຈ ,ລົງວັນທີ 23 ມີຖຸນາ 2021, ຜ່ານບົດສະຫຼຸບການຈັດຕັ້ງປະຕິບັດວຽກງານ ວິທະຍາສາດ ແລະ ເຕັກໂນໂລຊີໃນໄລຍະຜ່ານມາ ແລະ ບາງວຽກງານສືບຕໍ່ ຫຼັງຈາກນັ້ນ ທ່ານ ນາງ ຄຳແວວ ໂພທິສານ ກຳມະການພັກເມືອງ ຫົວໜ້າຫ້ອງການພາຍໃນເມືອງໝື່ນ ໄດ້ຜ່ານຂໍ້ຕົກລົງຂອງ ທ່ານ ເຈົ້າເມືອງໆໝື່ນ ວ່າດ້ວຍ: ການຕົກລົງລົບລ້າງຫ້ອງການ ແລະ ໜ່ວຍງານເຕັກໂນໂລຊີຂອງເມືອງ, ຜ່ານຂໍຕົກລົງມອບໂອນກົງຈັກການຈັດຕັ້ງ ແລະ ຂໍ້ຕົກລົງມອບໂອນພະນັກງານໄປຂຶ້ນກັບຂະເເໜ່ງການອື່ນຂອງເມືອງ.

ກອງປະຊຸມໄດ້ຜ່ານບົດບັນທຶກ ມອບ – ໂອນ ວຽກງານຕ່າງໆ ໄປຂຶ້ນກັບຂະເເໜ່ງການອື່ນດັ່ງນີ້: ວຽກງານເຕັກໂນໂລຊີ ແລະ ນະວັດຕະກຳ ໄປຂຶ້ນກັບຫ້ອງການສຶກສາທິການ ແລະ ກິລາເມືອງໝື່ນ, ວຽກງານບໍລິຫານ,ຈັດຕັ້ງ,ແຜນການ ແລະ ກວດກາ ໄປຂຶ້ນກັບຫ້ອງການໄປສະນີໂທລະຄົມມະນາຄົມ ແລະ ການສືສານເມືອງໝື່ນ,ວຽກງານພະລັງງານທົດແທນ ແລະ ວັດສະດຸໃໝ່ ໄປຂຶ້ນກັບຫ້ອງການພະລັງງານ – ບໍ່ເເຮ່ ເມືອງໝື່ນ, ວຽກງານຊັບສິນທາງປັນຍາ,ໜ່ວຍງານມາດຕະຖານ ແລະ ວັດແທກ ໄປຂຶ້ນກັບຫ້ອງການອຸດສາຫະກຳ ແລະ ການຄ້າເມືອງໝື່ນ ແລະ ວຽກງານນິເວດວິທະຍາ ແລະ ເຕັກໂນໂລຊີຊີວະພາບ ໄປຂຶ້ນກັບຫ້ອງການກະສິກຳ ແລະ ປ່າໄມ້ ເມືອງໝື່ນ ພ້ອມນັ້ນ ກອງປະຊຸມກໍ່ໄດ້ມີການ ເຊັ່ນບົດບັນທຶກລະຫວ່າງຫ້ອງການ ວິທະຍາສາດ ແລະ ເຕັກໂນໂລຊີ ແລະ ບັນດາຫ້ອງການກ່ຽວຂ້ອງ ເພື່ອຮັບເອົາໜ້າວຽກ ແລະ ບຸກຄະລາການ ໂດຍຊ່ອງໜ້າຄະນະປະທານ ແລະ ແຂກເຂົ້າຮ່ວມ ພ້ອມມອບ – ຮັບ ເອົາເອກະສານ ຢ່າງເປັນທາງການ.