ມີເດຍລາວແຂວງໄຊສົມບູນ ຂ່າວ: ພຸດທະສອນ ເວດສະວົງ
ກອງປະຊຸມສ່ອງແສງວຽກງານປ້ອງກັນຄວບຄຸມ ແລະ ແກ້ໄຂການລະບາດຂອງພະຍາດໂຄວິດ 19 ແຂວງໄຊສົມບູນ ໄດ້ຈັດຂຶ້ນ ໃນຕອນບ່າຍຂອງວັນທີ 8 ກໍລະກົດ ຜ່ານມານີ້ ທີ່ຫ້ອງປະຊຸມຂອງຄະນະສະເພາະກິດ ປ້ອງກັນຄວບຄຸມ ແລະ ແກ້ໄຂການລະບາດຂອງພະຍາດໂຄວິດ 19 ແຂວງໄຊສົມບູນ ໂດຍການເປັນປະທານຂອງ ທ່ານ ຕົ່ງມົວ ຊົວໂກ້ ຮອງເຈົ້າແຂວງໄຊສົມບູນ, ຫົວໜ້າຄະນະສະເພາະກິດ ເພື່ອປ້ອງກັນຄວບຄຸມ ແລະ ແກ້ໄຂການລະບາດຂອງພະຍາດໂຄວິດ 19 ຂັ້ນແຂວງ, ມີບັນດາຄະນະສະເພາະກິດຂັ້ນແຂວງ ເຂົ້າຮ່ວມ.

ໂອກາດນີ້ ທ່ານ ອູເງິນ ດວງມະນີ ຫົວໜ້າກອງເລຂາ ຄະນະສະເພາະກິດ ເພື່ອປ້ອງກັນຄວບຄຸມ ແລະ ແກ້ໄຂການລະບາດຂອງພະຍາດໂຄວິດ 19 ແຂວງໄຊສົມບູນ ໄດ້ລາຍງານການຈັດຕັ້ງປະຕິບັດມາດຕະການສະກັດກັ້ນ, ຄວບຄຸມ ແລະ ຕ້ານພະຍາດໂຄວິດ-19 ໃນໄລຍະຜ່ານມາ ແຕ່ວັນທີ 21 ມິຖຸນາ ຫາວັນທີ 4 ກໍລະກົດ ຊຶ່ງຄະນະສະເພາະກິດ ເພື່ອປ້ອງກັນຄວບຄຸມ ແລະ ແກ້ໄຂການລະບາດຂອງພະຍາດໂຄວິດ 19 ແຂວງ ໄດ້ສືບຕໍ່ເຟົ້າລະວັງ ແລະ ກວດກາຄົນເຂົ້າ-ອອກແຂວງ ຢ່າງເຂັ້ມງວດ ໂດຍໄດ້ຈັດຕັ້ງດ່ານເວນຕາມຂອບເຂດແດນ ໃນທົ່ວແຂວງເປັນປົກກະຕິ, ສາມາດກາຄົນເຂົ້າ-ອອກແຂວງ ໄດ້ທັງໝົດ 2.149 ຄົນ, ຍິງ 733 ຄົນ ສຳລັບການສັກວັກຊິນກັນພະຍາດໂຄວິດ19 ທົ່ວແຂວງ ໄດ້ຮັບວັກຊິນຈາກສູນກາງທັງໝົດ 12.400 ໂດສ, ເຂັມ 1 ສາມາດສັກໄດ້ 6.300 ກວ່າໂດສ, ເທົ່າກັບ 11,2% ຂອງຈຳນວນປະຊາກອນກຸ່ມເປົ້າໝາຍ, ເຂັມ 2 ສັກໄດ້ 3.600 ກວ່າໂດສ, ເທົ່າກັບ 6,5% ຂອງຈຳນວນກຸ່ມປະຊາກອນກຸ່ມເປົ້າໝາຍ

ຊຶ່ງຈຳນວນປະຊາກອນກຸ່ມເປົ້າໝາຍຮັບວັກຊິນຕ້ານໂຄວິດ ໃນປີ 2021 ໃນທົ່ວແຂວງ ມີຈຳນວນ 57.200 ກວ່າຄົນ ນອກຈາກນີ້ ຄະນະສະເພາະກິດ ຍັງໄດ້ໂຄສະນາອອກທາງໂທລະໂຄ່ງຂອງແຂວງ ແລະ ໂຄສະນາທາງໂທລະໂຄ່ງໃສ່ລົດເຄື່ອນທີ່ໄປແຕ່ລະບ້ານ ເພື່ອໃຫ້ປະຊາຊົນໄດ້ຮັບຮູ້ເຖິງຜົນຮ້າຍ ແລະ ຮູ້ວິທີປ້ອງກັນຕົນເອງຈາກພະຍາດດັ່ງກ່າວ ເຫັນໄດ້ວ່າພະນັກງານ, ປະຊາຊົນມີຄວາມເຂົ້າໃຈ ແລະ ເປັນເຈົ້າການຕື່ນຕົວປະຕິບັດຢ່າງເຂັ້ມງວດ.ສຳລັບແຜນການເຄື່ອນໄຫວໃນຕໍ່ໜ້າ ແມ່ນຈະສືບຕໍ່ສັກວັກຊິນກັນພະຍາດໂຄວິດ-19 ໃຫ້ບັນລຸຄາດໝາຍ, ສືບຕໍ່ປະສານເຄື່ອງກວດໂຄວິດ 19 ນຳສູນວິເຄາະມາຕິດຕັ້ງເຄື່ອງກວດໂຄວິດ 19

ພ້ອມທັງຝຶກອົບຮົມການກວດໃຫ້ແກ່ພະນັກງານແພດໝໍໂດຍໄວ, ສືບຕໍ່ເຝົ້າລະວັງ, ກວດກາຄົນເຂົ້າ-ອອກ ຢູ່ແຕ່ລະດ່ານ ໃຫ້ມີຄວາມເຂັ້ມງວດ ຮັບປະກັນບໍ່ໃຫ້ຄົນເຂົ້າແຂວງໄຊສົມບູນ ໂດຍບໍ່ຖືກຕ້ອງຕາມຄຳສັ່ງທີ່ໄດ້ກຳນົດໄວ້, ສືືບຕໍ່ໂຄສະນາສຶກສາອົບຮົມພະນັກງານ, ທະ ຫານ, ຕຳຫຼວດ, ຕະຫຼອດຮອດພໍ່ແມ່ປະຊາ ຊົນບັນດາເຜົ່າ ໃຫ້ມີຄວາມຮັບຮູ້, ເຂົ້າໃຈ ຕໍ່ຜົນຮ້າຍຂອງພະຍາດໂຄວິດ-19 ແລະ ມີວິທີປ້ອງກັນຕົນເອງ ໃຫ້ຖືກຕ້ອງຕາມຂໍ້ກຳນົດຂອງຄະນະສະເພາະກິດວາງອອກ ແລະ ສືບຕໍ່ຕິດຕາມການເຄື່ອນໄຫວການເປີດບໍລິການຂອງຫົວໜ່ວຍທຸລະກິດ ທີ່ນອນຢູ່ໃນຂໍ້ຫ້າມຂອງຄະນະສະເພາະກິດ ແລະ ແຈ້ງການຂອງຫ້ອງວ່າການແຂວງ ວາງອອກຢ່າງເຂັ້ມງວດ.