ມີເດຍລາວແຂວງຫຼວງພະບາງ ຂໍ້ມູນ: ສຸລິວັນ ຕິ່ງພູທອງ. ຮຽບຮຽງ: ໄຊຍະສອນ ລັດຕະນະວົງ.
ເພື່ອເປັນການສ້າງຂະບວນການຂໍານັບຮັບຕ້ອນວັນປະຫັວດສາດສໍາຄັນຕ່າງໆ ທີ່ຈະໝູນວຽນບັນຈົບຄົບຮອບອີກວາລະໜື່ງ ໂດຍສະເພາະແລ້ວກໍ່ແມ່ນວັນຄ້າຍວັນເກີດຂອງປະທານ ສຸພານຸວົງ ຜູ້ນໍາທີ່ແສນເຄົາລົບຮັກຂອງປວງຊົນລາວທັງຊາດຄົບຮອບ 112 ປີ. ຄື 13 ກໍລະກົດ 1909 – 13 ກໍລະກົດ 2021, ວັນອະນຸລັກສັດນໍ້າ-ສັດປ່າ, ວັນກິລາລາວທີ 13 ກໍລະກົດ 1966 ຄົບຮອບ 55 ປີ. ແລະ ວັນສ້າງຕັ້ງສະຫະພັນແມ່ຍິງລາວຄົບຮອບ 66 ປີ 20ກໍລະກົດ 1955 – 20 ກໍລະກົດ 2021.

ໃຫ້ເຕັມໄປດ້ວຍຄວາມໝາຍສໍາຄັນຢ່າງເລິກເຊິ່ງນັ້ນ. ໃນຕອນເຊົ້າຂອງວັນທີ 9 ກໍລະກົດ 2021 ນີ້ໜ່ວຍຊາວໜຸ່ມ – ແມ່ຍິງ ແລະ ພະນັກງານ – ນັກຮົບກອງບັນຊາການທະຫານ ເມືອງນໍ້າບາກ ແຂວງຫຼວງພະບາງ ໄດ້ພ້ອມກັນສ້າງຂະບວນການອອກແຮງງານລວມຢູ່ກົມກອງຂອງຕົນຢ່າງເປັນຂະບວນຟົດຟື້ນ ໂດຍການຊີ້ນໍາ ຈາກຄະນະພັກ – ຄະນະບັນຊາ ໃນກົມກອງ. ການອອກແຮງງານໃນຄັ້ງນີ້ແມ່ນໄດ້ພ້ອມກັນຖາງຫຍ້າ ອະນາໄມລຽບຕາມບໍລິເວນສະຖານທີ່ ອ້ອມແອ້ມຫ້ອງການ ແລະ ຄ້າຍບ່ອນທີ່ມັນຫົກເຮື້ອ ເພື່ອໃຫ້ມີຄວາມສະອາດງາມຕາເປັນລະບຽບຮຽບຮ້ອຍ.

ການອອກແຮງານ,ອະນາໄມລວມຄັ້ງນີ້ ຍັງເປັນການປົກປັກຮັກສາສະຖານທີ່ຄ້າຍ,ຂອບເຂດຮັບຜິດຊອບໃຫ້ມີຄວາມສະອາດຈົບງາມ ແລະ ທັງເປັນການປ້ອງກັນ ແລະ ສະກັດກັ້ນການແຜ່ລະບາດຂອງພະຍາດທີ່ມັກເກີດຂື້ນໃນລະດູຝົນນັ້ນກໍ່ຄືພະຍາດໄຂ້ຍຸງລາຍທີ່ເປັນອັນຕະລາຍຮ້າຍແຮງ ແລະ ແຜ່ລະບາດໃນທຸກໆປີ ຢູ່ບັນດາທ້ອງຖິ່ນຮາກຖານກໍ່ຄືຢູ່ພາຍໃນແຂວງໃຫ້ໝົດໄປ, ເຮັດໃຫ້ນາຍ ແລະ ພົນທະຫານມີສຸຂະພາບແຂງແຮງ ພາລະນາໄມສົມບູນ ປາສະຈາກໂລກໄພໄຂ້ເຈັບ ແລະ ພ້ອມກັນເຮັດສໍາເລັດໜ້າທີ່ວຽກງານໃນພາລະກິດປົກປັກຮັກສາ ແລະ ສ້າງພັດທະນາປະເທດຊາດ ກໍ່ຄືການຈັດຕັ້ງພັກ – ລັດມອບໝາຍໃຫ້.