ມີເດຍລາວແຂວງສາລະວັນ ພາບ-ຂ່າວ: ທິດລານີ ໂຄດໂຍທາ. ວັນທີ 8 ກໍລະກົດ 2021 ນີ້, ພະແນກແຜນການ ແລະການລົງທຶນແຂວງສາລະວັນ ໄດ້ເຊື່ອມຊຶມ ແລະຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິ IX ຂອງອົງຄະນະພັກແຂວງ ແລະມະຕິ IV ຂອງໜ່ວຍພັກພະແນກ, ໂດຍການເປັນປະທານຂອງ ສະຫາຍ ໂພສີ ແກ້ວສີພັນດອນ ກຳມະການພັກແຂວງ ເລຂາໜ່ວຍພັກ ຫົວໜ້າພະແນກແຜນການ ແລະການລົງທຶນແຂວງ, ມີຮອງເລຂາໜ່ວຍ, ສະມາຊິກພັກ, ພະນັກງານລັດຖະກອນເຂົ້າຮ່ວມ.

ບັ້ນເຊື່ອມຊຶມຄັ້ງນີ້ ຜູ້ເຂົ້່າຮ່ວມຈະໄດ້ຮັບຟັງການເຊື່ອມຊຶມບັນດາມະຕິຂອງພັກ ຄື: ເຊື່ອມຊຶມ ແລະຜັນຂະຫຍາຍເນື້ອໃນເອກະສານມະຕິກອງປະຊຸມໃຫຍ່ ຄັ້ງທີXIຂອງພັກປະຊາຊົນ ປະຕິວັດລາວ, ເຊື່ອມຊືມເອກະສານມະຕິກອງປະຊຸມໃຫຍ່ ຄັ້ງທີ IXຂອງອົງຄະນະພັກແຂວງ, ມະຕິຂອງກົມການເມືອງສູນກາງພັກ ເລກທີ 206/ກມສພ ວ່າດ້ວຍ: ການຍົກສູງຄຸນນະພາບວຽກງານການເມືອງແນວຄິດ ໃນໄລຍະໃໝ່ ແລະ ມະຕິ 25 ຂອງກົມການເມືອງສູນກາງພັກວ່າດ້ວຍ: ການເພີ່ມທະວີການນຳພາຂອງພັກ ຕໍ່ວຽກງານວັດທະນະທຳ ໃນໄລຍະໃໝ່ ແລະ ມະຕິກອງປະຊຸມໃຫຍ່ ຄັ້ງທີ IV ຂອງໜ່ວຍພັກພະແນກແຜນການ ແລະ ການລົງທຶນ ແຂວງສາລະວັນ ແນໃສ່ເພີ່ມທະວີໃນການຊີ້ນຳ-ນຳພາຂອງຄະນະພັກແຕ່ລະຂັ້ນ,

ເອົາໃຈໃສ່ປະຕິບັດໜ້າທີ່ວຽກງານຕາມຄວາມຮັບຜິດຊອບຂອງຕົນ, ຕິດພັນກັບການເສີມຂະຫຍາຍຄວາມເປັນເຈົ້າການຕໍ່ມະຕິກອງປະຊຸມໃຫຍ່ ຂອງພັກ ແລະ ຮັບຮູ້, ເຂົ້າໃຈຢ່າງເລິກເຊິ່ງ, ໂດຍສະເພາະແມ່ນເນື້ອໃນທີສຳຄັນຕົ້ນຕໍ ແລະ ວຽກງານຈຸດສຸມທີຕ້ອງເອົາໃຈໃສ່, ຫັນມາເປັນແຜນງານ, ໂຄງການ ແລະ ກິດຈະກຳລະອຽດຂອງຕົນໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ. ມະຕິກອງປະຊຸມໃຫຍ່ ຄັ້ງທີ IV ຂອງຫນ່ວຍພັກ ໄດ້ກຳນົດທິດທາງ ໃນອີກ 5 ປີຕໍ່ໜ້າ ສຸມໃສ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ເອົາໃຈໃສ່ຄຸ້ມຄອງໂຄງການລົງທຶນຂອງລັດ ແລະແຫຼ່ງທຶນທະນາຄານນະໂຍບາຍ ແລະກອງທຶນຫຼຸດຜ່ອນຄວາມທຸກຍາກໃຫ້ເຂົ້າສູ່ເປົ້າໝາຍ, ສືບຕໍ່ສ້າງແຜນກຸ່ມບ້ານໃຫ້ສຳເລັດໃນ 4 ເມືອງຄື: ເມືອງວາປີ,ຕຸ້ມລານ, ສະໝ້ວຍ ແລະຄົງເຊໂດນ, ສືບຕໍ່ຍາດແຍ່ງດຶງດູດການລົງທຶນພາກເອກະຊົນພາຍໃນ ແລະຕ່າງປະເທດ ໃຫ້ໄດ້ 3.330 ຕື້ກີບ ແລະວຽກງານອື່ນໆໃຫ້ໄດ້ຮັບຜົນສຳເລັດ. ນອກນັ້ນຍັງໄດ້ເອົາໃຈໃສ່ການຈັດຕັ້ງປະຕິບັດວຽກງານປະເມີນ, ວຽກສົ່ງເສີມການລົງທຶນພາຍໃນ ແລະຕ່າງປະເທດ, ວຽກຮ່ວມມືສາກົນ, ວຽກສູນສະຖິຕິແລະວຽກງານຝຶກອົມຮົມການສຳຫຼວດ ກໍ່ໃຫ້ສຳເລັດຕາມຄາດໝາຍທີ່ວາງໄວ້.
.