ມີເດຍລາວແຂວງຈຳປາສັກ ກອງປະຊຸມຄົບຄະນະ ບໍລິຫານງານພັກ ແຂວງຈຳປາສັກ ຄັ້ງທີ 4 ສະໄໝທີ VIII, ໄດ້ຈັດຂຶ້ນ ໃນວັນທີ 12 ກໍລະກົດ 2021,ທີ່ຫ້ອງວ່າການ ແຂວງຈຳປາສັກ ພາຍໃຕ້ການເປັນປະທານຂອງ ສະຫາຍ ວິໄລວົງ ບຸດດາຄຳ ກຳມະການສູນກາງພັກ, ເລຂາຄະນະບໍລິຫານງານພັກແຂວງ ເຈົ້າແຂວງຈຳປາສັກ, ມີສະຫາຍ ຮອງເລຂາຄະນະບໍລິຫານງານພັກແຂວງ, ບັນດາສະຫາຍ ໃນຄະນະປະຈຳພັກແຂວງ, ກຳມະການພັກແຂວງ ຈຳປາສັກ ເຂົ້າຮ່ວມ.

ໂອກາດດັ່ງກ່າວ, ສະຫາຍ ວິໄລວົງ ບຸດດາຄຳ ປະທານກອງປະຊຸມ ໄດ້ມີຄຳເຫັນກ່າວເປີດກອງປະຊຸມ ບາງຕອນສຳຄັນວ່າ: ແມ່ນເພື່ອເຜີຍແຜ່ມະຕິກອງປະຊຸມຄົບຄະນະ ຄັ້ງທີ 3 ຂອງຄະນະບໍລິຫານງານສູນກາງພັກ ສະໄໝທີ XI ໂດຍແນໃສ່ການຫັນປ່ຽນຢ່າງແຂງແຮງ, ເລິກເຊິ່ງ, ຮອບດ້ານ ໃນທຸກຂົງເຂດຂອງຊີວິດສັງຄົມ, ສາມາດກໍານົດແຈ້ງບັນດາເນື້ອໃນ ແລະ ວຽກງານຈຸດສຸມທີ່ຕ້ອງເອົາໃຈໃສ່ນໍາພາ-ຊີ້ນໍາ ຂອງຄະນະບໍລິຫານງານພັກແຂວງຈຳປາສັກ;

ພ້ອມນັ້ນ ເພື່ອສືບຕໍ່ຜັນຂະຫຍາຍມະຕິກອງປະຊຸມຄົບຄະນະຄັ້ງທີ 3 ຂອງຄະນະບໍລິຫານງານພັກແຂວງ ກໍຄືມະຕິກອງປະຊຸມໃຫຍ່ຜູ້ແທນອົງຄະນະພັກແຂວງຈໍາປາສັກ ຄັ້ງທີ VIII ໄດ້ກຳນົດບັນດາຄາດໝາຍ ແລະ ທິດທາງໃນການຈັດຕັ້ງປະຕິບັດ. ດັ່ງນັ້ນ, ກອງປະຊຸມຄັ້ງນີ້ ຈະໄດ້ພ້ອມກັນສະຫຼຸບໂດຍຕີລາຄາຄືນການນຳພາ-ຊີ້ນຳ ວຽກງານຮອບດ້ານຂອງຄະນະບໍລິຫານງານພັກແຂວງ ໄລຍະ 6 ເດືອນທີ່ຜ່ານມາ ປີ 2021, ການ ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ VIII ຂອງອົງຄະນະພັກແຂວງຈຳປາສັກ ກໍ່ຄື ມະຕິກອງປະຊຸມຄົບຄະນະບໍລິຫານງານພັກພັກແຂວງຄັ້ງທີ 3 ສະໄໝທີ VIII ຕິດພັນກັບການປັບປຸງກົງຈັກການ ຈັດຕັ້ງຂັ້ນແຂວງ, ການກໍານົດແບບແຜນວິທີເຮັດວຽກ ແລະ ແຜນດຳເນີນງານຕະຫຼອດສະໄໝ ຂອງຄະນະບໍລິຫານງານພັກແຂວງ ສະໄໝທີ VIII ແລະ ການກໍານົດທິດທາງຈຸດສຸມ ໃນ 6 ເດືອນທ້າຍປີ 2021.

ວາລະກອງປະຊຸມ ແມ່ນຈະໄດ້ດຳເນີນເປັນເວລາ 5 ວັນ, ແຕ່ວັນທີ 12 ຫາ 16 ກໍລະກົດ 2021, ເນື້ອໃນກອງປະຊຸມຈະໄດ້ ຄົ້ນຄວ້າ 19 ເອກະສານສຳຄັນ. ເພື່ອເຮັດໃຫ້ກອງປະຊຸມໄດ້ມີຜົນສຳເລັດຕາມລະດັບຄາດໝາຍ ທັງຮັບປະກັນທາງດ້ານເນື້ອໃນອັນຄົບຖ້ວນ ພ້ອມກັນຍົກສູງຄວາມຮັບຜິດຊອບ, ເພີ່ມທະວີການນຳພາຂອງພັກ ໃຫ້ໜັກແໜ້ນ, ເຂັ້ມແຂງ ຈຶ່ງຈະເຮັດໃຫ້ມີຜົນສຳເລັດອັນຈົບງາມ ຕາມເປົ້າໝາຍທີ່ວາງໄວ້.

ຂ່າວ: ທັດຊະນະ