ພິທີມອບ-ຮັບຫົວໜ້າພະແນກແຮງງານ ແລະ ສະຫວັດດີການສັງຄົມແຂວງຫົວພັນ ຜູ້ເກົ່າ ແລະ ຜູ້ໃໝ່ ລະຫວ່າງ ທ່ານ ຈູເຮີ ອາດີດກຳມະການພັກແຂວງ, ຫົວໜ້າພະແນກແຮງງານ ແລະ ສະຫວັດດີການສັງຄົມແຂວງຜູ້ເກົ່າ ແລະ ທ່ານ ພັນຕາ ທອນວົງສາ ກຳມະການພັກແຂວງ, ຫົວໜ້າພະແນກການຕ່າງປະເທດແຂວງ ເປັນເລຂາຄະນະພັກຮາກຖານພະແນກແຮງງານ ແລະ ສະຫວັດດີການສັງຄົມແຂວງຫົວພັນຜູ້ໃໝ່ ໄດ້ຈັດຂຶ້ນໃນວັນທີ 12 ກໍລະກົດ 2021 ນີ້ ຢູ່ທີີ່ພະແນກແຮງງານ ແລະ ສະຫວັດດີການສັງຄົມແຂວງ.

ໃນພິທີໄດ້ຜ່ານມະຕິຕົກລົງສະບັບ ເລກທີ 27 ຂອງຄະເລຂາທິການສູນກາງພັກ ລົງວັນທີ 10 ກຸມພາ ປີ 2021 ວ່າດ້ວຍການອະນຸມັດໃຫ້ພະນັກງານ ອອກພັກການ-ຮັບບໍານານຕາມລະການ; ມະຕິຕົກລົງ ເລກທີ 100 ລົງວັນທີ 9 ມີຖຸນາ 2021 ຂອງຄະນະປະຈຳພັກແຂວງຫົວພັນ ວ່າດ້ວຍການບົ່ງຕົວແຕ່ງຕັ້ງເລຂາຄະນະພັກຮາກຖານ ຫົວໜ້າພະແນກແຮງງານ ແລະ ສະຫວັດດີການສັງຄົມແຂວງຫົວພັນ ຜູ້ໃໝ່ ແລະ ຂໍ້ຕົກລົງຂອງທ່ານເຈົ້າແຂວງ ສະບັບເລກທີ 792 ລົງວັນທີ 21 ມີຖຸນາ 2021 ວ່າດ້ວຍການຍົກຍ້າຍ ພະນັກງານນຳພາ-ຄຸ້ມຄອງ ໄປປະຈຳການຢູ່ບ່ອນໃໝ່.

ໂອກາດນີ້ ຫົວໜ້າພະແນກແຮງງານ ແລະ ສະຫັວດດີການສັງຄົມແຂວງຜູ້ເກົ່າ ແລະ ຜູ້ໃໝ່ ໄດ້ເຊັນບົດບັນທຶກມອບ-ຮັບໜ້າທີວຽກງານ ແລະ ສືບຕໍ່ຊີ້ນຳ-ນຳພາໃນຂັ້ນຕໍ່ໄປ. ໂດຍມີພາກສ່ວນທີ່ກ່ຽວຂ້ອງມາຈາກຄະນະຈັດຕັ້ງແຂວງ, ພະນັກງານລັດຖະກອນພາຍໃນພະແນກ, ຫົວໜ້າ, ຮອງຫົວໜ້າຫ້ອງການ ແລະ ສະຫວັດດີການສັງຄົມ 10 ເມືອງທົ່ວແຂວງເຂົ້າຮ່ວມ.

ຂ່າວ-ພາບ: ຄານທອງ