ມີເດຍລາວແຂວງ ຂ່າວ: ກອງຄໍາ ວັນທີ 12 ກໍລະກົດ 2021 ແຂວງຄຳມ່ວນ ໄດ້ຈັດພິທີປ່ອຍປາ ເນື່ອງໃນວັນປ່ອຍປາ ແລະ ປົກປັກຮັກສາສັດ ນໍ້າ-ສັດປ່າ ແຫ່ງຊາດ ຢູ່ທີ່ອ່າງເກັບນໍ້າເຂື່ອນໄຟຟ້າ ຂອງບໍລິສັດ ຣາຊີຕາ ບ້ານຄໍາແກ້ວ ເມືອງຫີນບູນ ໂດຍເປັນ ກຽດ ເຂົ້າຮ່ວມມີທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ, ມີທ່ານຫົວໜ້າພະແນກກະສິກໍາ ແລະ ປ່າໄມ້ແຂວງ, ເຈົ້າ ເມືອງຫີນບູນ, ຜູ້ອຳນວຍການບໍລິສັດ ຣາຊີຕາ ພ້ອມດ້ວຍບັນດາທ່ານໃນຄະນະພະແນກການ, ຂະແໜງການຂັ້ນແຂວງ, ຂັ້ນເມືອງ, ພໍ່ແມ່ປະຊາຊົນ ແລະ ນ້ອງນ້ອຍນັກຮຽນໃນເຂດອ້ອມຂ້າງເຂົ້າຮ່ວມ.

ທ່ານ ບຸນຈັນ ໄຊປັນຍາ ຫົວໜ້າພະແນກກະສິກຳ ແລະ ປ່າໄມ້ແຂວງຄຳມ່ວນ ໄດ້ຜ່ານປະຫວັດຄວາມເປັນມາຂອງວັນປ່ອຍປາ ແລະ ປົກປັກຮັກສາສັດນໍ້າ-ສັດປ່າ (13 ກໍລະກົດ) ໃຫ້ຮູ້ວ່າ: ວຽກງານປ່ອຍປາ ແລະ ການພັດທະນາ ອະນຸລັກສັດນໍ້າ-ສັດປ່າ ແມ່ນວຽກໜຶ່ງທີ່ສຳຄັນ ນັບຕັ້ງແຕ່ວັນສະຖາປະນາ ສປປ ລາວ ປີ 1975 ເປັນຕົ້ນມາ ພັກ-ລັດ ຖະບານກໍ່ໄດ້ເອົາໃຈໃສ່ຕໍ່ວຽກງານກະສິກຳ ແລະ ປ່າໄມ້ ເປັນເປົ້າໝາຍຕົ້ນຕໍ ເວົ້າສະເພາະກໍ່ຄືວຽກງານການຜະລິດ, ການປູກ, ການລ້ຽງ, ການປົກປັກຮັກສາ, ການຄຸ້ມຄອງສັດນໍ້າ-ສັດປ່າໃຫ້ມີຄວາມຍືນຍົງໂດຍຕະຫຼອດມາ. ກອງປະຊຸມກະ ສິກຳ ແລະ ປ່າໄມ້ທົ່ວປະເທດ ຄັ້ງທີ 01 ປີ 1989 ເປັນຕົ້ນມາ ລັດຖະບານກໍ່ໄດ້ອອກດຳລັດວ່າດ້ວຍການປະກາດສ້າງຕັ້ງວັງສະຫງວນແຫ່ງຊາດ, ຈາກນັ້ນໃນວັນທີ 24 ທັນວາ 2007 ສະພາແຫ່ງຊາດໄດ້ຮັບຮອງ, ປະກາດນຳໃຊ້ກົດ ໝາຍສັດນໍ້າ-ສັດປ່າ ແລະ ປີ 2009 ກໍ່ໄດ້ປະກາດຮັບຮອງນໍາໃຊ້ກົດໝາຍວ່າດ້ວຍການປະມົງ ໃນມາດຕາທີ 69 ໄດ້ກຳນົດເອົາວັນທີ 13 ກໍລະກົດ ຂອງທຸກໆປີ ເປັນວັນປ່ອຍປາແຫ່ງຊາດ ເພື່ອປູກຈິດສຳນຶກໃຫ້ປະຊາຊົນ ເຂົ້າໃຈ ແລະ ໃຫ້ ຄວາມສຳຄັນໃນການປົກປັກຮັກສາສັດນໍ້າ-ສັດປ່າໃຫ້ມີຄວາມອຸດົມສົມບູນ.

ສຳລັບແຂວງຄຳມ່ວນ, ພະແນກກະສິກຳ ແລະ ປ່າໄມ້ແຂວງ ໄດ້ສົມທົບກັບການຈັດຕັ້ງທີ່ກ່ຽວຂ້ອງທັງພາຍໃນ ແລະ ຕ່າງປະເທດ ຄົ້ນຄວ້າໃນຫຼາຍຮູບແບບເພື່ອປົກປັກຮັກສາ ເປັນຕົ້ນແມ່ນສ້າງບ່ອນອະນຸລັກ, ສ້າງວັງສະຫງວນ ມາຮອດປະຈຸບັນແຂວງຄຳມ່ວນແມ່ນມີວັງສະຫງວນຫຼາຍກວ່າ 69 ແຫ່ງຢູ່ໃນຂັ້ນບ້ານ ແລະ ຢູ່ໃນການຄຸ້ມຄອງ, ປົກປັກຮັກສາໃນຂັ້ນເມືອງ 12 ແຫ່ງ ເພື່ອເປັນບ່ອນແຜ່ພັນຂອງສັດນໍ້າຕ່າງໆ. ນອກນີ້ຍັງໄດ້ປຸກລະດົມ ແລະ ສ້າງຂະບວນການປ່ອຍປາລົງສູ່ແມ່ນໍ້າທຳມະຊາດ, ຫ້ວຍ, ຮ່ອງ, ຄອງ, ບຶງ ເຊິ່ງໃນຊຸມປີຜ່ານມາແມ່ນສາມາດປ່ອຍປາໄດ້ທັງໝົດ 4 ລ້ານກວ່າໂຕ ແລະ ໃນປີ 2021 ນີ້ ຄາດຄະເນຈະປ່ອຍໄດ້ 2 ລ້ານກວ່າໂຕ ແລະ ໃນຊ່ວງວັນທີ 01 ກໍລະກົດ ເປັນ ຕົ້ນມາ ພໍ່ແມ່ປະຊາຊົນໄດ້ປ່ອຍປາລົງໃນໜອງລ້ຽງຂອງຕົນໄດ້ແລ້ວຈຳນວນ 170.000 ໂຕ. ໃນນັ້ນແມ່ນມີປະເພດ ປາປາກ, ປາມະນີການ, ປາຍີ້ສົບ ແລະ ປາດຸກ. ສຳລັບພິທີປ່ອຍປາຂອງແຂວງໃນມື້ນີ້ ແມ່ນປ່ອຍລົງໜ້າເຂື່ອນໄຟຟ້ານໍ້າຫີນບູນ ບ້ານຄຳແກ້ວ ເມືອງຫີນບູນ ເຊິ່ງມີປາທັງໝົດ 65 ພັນກວ່າໂຕ, ປະກອບມີ ປາປາກ ແລະ ປາມະນີການ ໂດຍໄດ້ຮັບການປະກອບສ່ວນຈາກບັນດາຂະແໜງການກ່ຽວຂ້ອງ ແລະ ຜູ້ປະກອບການເອກະຊົນຈຳນວນໜຶ່ງ.