ມີເດຍລາວແຂວງບໍ່ແກ້ວ ໃນຕອນບ່າຍຂອງວັນທີ 12 ກໍລະກົດ 2021 ຢູ່ທີ່ຫ້ອງປະຊຸມພະແນກຍຸຕິທຳແຂວງບໍ່ແກ້ວ ໄດ້ເຊື່ອມຊຶມເອກະສານຂອງພັກໃນໄລຍະໃໝ່ ໃຫ້ພະນັກງານ-ລັດຖະກອນພາຍໃນພະແນກຍຸຕິທຳແຂວງ. ໂດຍການເປັນປະທານຂອງ ທ່ານ ຄຳຫຼ້າ ອຸດທະຍອດ, ກຳມະການພັກແຂວງ, ເລຂາໜ່ວຍພັກ, ຫົວໜ້າພະແນກຍຸຕິທໍາແຂວງ, ມີຄະນະພັກຄະນະພະແນກ ແລະ ພະນັກງານ-ລັດຖະກອນພາຍໃນພະແນກຍຸຕິທຳເຂົ້າຮ່ວມຢ່າງພ້ອມພຽງ.

ເອກະສານທີ່ເຊື່ອມຊຶມຄັ້ງນີ້ມີ 3 ເອກະສານຄື: ມະຕິຂອງກົມການເມືອງສູນກາງພັກ ສະບັບເລກທີ 25/ກມສພ, ລົງວັນທີ 17 ພຶດສະພາ 2021 ວ່າດ້ວຍການເພີ່ມທະວີການນຳພາຂອງພັກ ຕໍ່ວຽກງານວັດທະນະທໍາໃນໄລຍະໃໝ່ ມະຕິສະບັບເລກທີ 206/ກມສພ, ລົງວັນທີ 7 ທັນວາ 2020 ວ່າດ້ວຍການຍົກສູງຄຸນນະພາບວຽກງານການເມືອງ-ແນວຄິດໃນໄລຍະໃໝ່ ແລະ ເອກະສານວັນສ້າງຕັ້ງພັກກອມມູນິດຈີນ ຄົບຮອບ 100 ປີ ( 01/07/1921-01/07/2021 ).

ເພື່ອໃຫ້ທຸກຄົນເຂົ້າໃຈຢ່າງເລິກເຊິ່ງ ຕໍ່ກັບວຽກງານວັດທະນະທໍາ ທີ່ເປັນຄຸນຄ່າທາງດ້ານວັດຖຸ ແລະ ຈິດໃຈທີ່ມວນມະນຸດປະດິດສ້າງຂຶ້ນໃນຂະບວນວິວັດແຕ່ລະໄລຍະຂອງປະຫວັດ ສາດແຫ່ງການກຳເນີດ, ຄົງຕົວ ແລະ ຂະຫຍາຍຕົວຂອງສັງຄົມມະນຸດ. ພັກປະຊາຊົນປະຕິວັດລາວ ຍາມໃດກໍ່ໃຫ້ຄວາມສຳຄັນ ແລະ ເອົາໃຈໃສ່ ຕໍ່ວຽກງານວັດທະນະທຳ ຕິດພັນກັບວຽກງານການເມືອງ-ແນວຄິດຂອງພັກ ເພາະວຽກງານດັ່ງກ່າວ ແມ່ນຄຸນລັກສະນະ ແລະ ປັດໃຈພື້ນຖານຂອງການດຳລົງຄົງຕົວຂອງຊາດ, ແມ່ນກຳລັງພັກດັນ ແລະ ຈຸດໝາຍຂອງການພັດທະນາສັງຄົມຕາມທິດສັງຄົມນິຍົມ; ໃນຕໍ່ໜ້າພັກເຮົາໄດ້ກຳນົດທິດທາງລວມ ແລະ ຄາດໝາຍສູ້ຊົນຕໍ່ວຽກງານວັດທະນະທຳໃນໄລຍະໃໝ່ຢ່າງຈະແຈ້ງວ່າ: ຕັ້ງໜ້າແກ້ໄຂຂໍ້ຄົງຄ້າງບັນຫາຫຍໍ້ທໍ້ໃນຂົງເຂດວັດທະນະທຳ ໃຫ້ຫຼຸດໜ້ອຍຖ້ອຍລົງ, ສູ້ຊົນເຮັດໃຫ້ທົ່ວປວງຊົນລາວທັງຊາດ, ມີຄວາມຮັບຮູ້ ແລະ ເຊື່ອມຊຶມແນວທາງນະໂຍບາຍຂອງພັກ ກົດໝາຍຂອງລັດກ່ຽວກັບວຽກງານວັດທະນະທຳຢ່າງເລິກເຊິ່ງ,

ສ້າງສັງຄົມໃຫ້ມີຄວາມສາມັກຄີເປັນປຶກແຜ່ນ, ຍຸຕິທໍາ ເອຶ້ອເຟື້ອເຜີຍແຜ່ ມີນ້ຳໃຈຮັກຊາດຮັກລະບອບປະຊາທິປະໄຕ ປະຊາຊົນ ເຊີດຊູມູນເຊື້ອພິລະອາດຫານ, ດຸໝັ່ນອອກແຮງງານປະດິດສ້າງຄົ້ນຄວ້າຮໍ່າຮຽນເອົາວິທະຍາສາດເຕັກໂນໂລຊີ ທີ່ກ້າວໜ້າທັນສະໄໝເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ພາຍໃຕ້ການນຳພາຂອງພັກຢ່າງແທ້ຈິງ ແລະ ໃນຕອນທ້າຍພິທີ ທ່ານ ວິພົງ ບົວອາໄພ ຮອງຫົວໜ້າພະແນກຍຸຕິທໍາແຂວງ ກໍ່ໄດ້ໃຫ້ກຽດຂຶ້ນເລົ່າມູນເຊື້ອວັນສ້າງຕັ້ງພັກກອມມູນິດຈີນ ຄົບຮອບ 100 ປີ ( 01/07/1921-01/07/2021 ), ທັງນີ້ກໍ່ເພື່ອເຮັດໃຫ້ພະນັກງານລັດຖະກອນພາຍໃນພະແນກຍຸຕິທໍາ ໄດ້ຮັບຮູ້ ແລະ ເຂົ້າໃຈເນື້ອໃນເອກະສານຂອງພັກໃນໄລຍະໃໝ່.