ມີເດຍລາວແຂວງຈຳປາສັກ ຂ່າວ: ທັດຊະນະ ໃນຕອນເຊົ້າວັນທີ 12 ກໍລະກົດ 2021 ນີ້, ທີ່ຫ້ອງວ່າການແຂວງຈຳປາສັກ, ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ພ້ອມຄະນະ ໄດ້ຕ້ອນຮັບ ທ່ານ ພົຈວ ສົມລິດ ດາວຮຸ່ງສຸລິ ຫົວໜ້າກົມຕຳຫລວດຄຸມຂັງ-ດັດສ້າງ ກະຊວງປ້ອງກັນຄວາມສະຫງົບ ພ້ອມດ້ວຍຄະນະ ໃນໂອກາດມາເຄື່ອນໄຫວວຽກງານ ຢູ່ ແຂວງຈຳປາສັກ.

ທ່ານ ພົຈວ ສົມລິດ ດາວຮຸ່ງສຸລິ ໄດ້ກ່າວລາຍງານຈຸດປະສົງຂອງການມາເຄື່ອນໄຫວວຽກງານ ຄັ້ງນີ້ວ່າ: ເພື່ອຂໍທິດຊີ້ນຳຈາກທ່ານເຈົ້າແຂວງ, ກົມຕຳຫຼວດຄຸມຂັງ-ດິດສ້າງ ກະຊວງປ້ອງກັນຄວາມສະຫງົບ ສົມທົບກັບ ກົມກອງອ້ອມຂ້າງກະຊວງ, ກອງບັນຊາການປ້ອງກັນຄວາມສະຫງົບ ແຂວງຈຳປາສັກ ໃນການຫັນຄ້າຍຄຸມຂັງ ທີ່ມີເງື່ອນໄຂ ແລະ ຮັບປະກັນ ມາເປັນຄ້າຍຄຸມຂັງປະຈຳພາກ ເພື່ອຮັບປະກັນ ການຄຸ້ມຄອງ, ບັນຊາ ຄ້າຍຄຸມຂັງ ໃຫ້ຫັນເຂົ້າສູ່ລະບົບການເຄື່ອນໄຫວວຽກງານ, ມີກົນໄກ, ມີລະບຽບການ ແນໃສ່ເປັນການປັບປຸງວຽກງານຄ້າຍຄຸມຂັງ-ດັດສ້າງ ຢ່າງມີປະສິດທິຜົນດີຂຶ້ນກ່ວາເກົ່າ ແລະ ມີຄວາມເປັນເອກະພາບ ຈັດຕັ້ງປະຕິບັດ ໃນຂອບເຂດທົ່ວປະເທດ ແລະຈະໄດ້ປັບປຸງວຽກງານ, ກົນໄກປະສານງານ ແລະ ກົງຈັກການຈັດຕັ້ງ ຂອງຄ້າຍຄູມຂັງປະຈຳພາກ ໃຫ້ສອດຄ່ອງກັບສະພາບຄວາມເປັນຈິງ ໃນແຕ່ລະໄລຍະ.

ໂອກາດດັ່ງກ່າວ, ທ່ານເຈົ້າແຂວງຈຳປາສັກ ໄດ້ສະແດງການຕ້ອນຮັບ ແລະຂອບໃຈ ຕໍ່ ທ່ານ ຫົວໜ້າກົມຕຳຫລວດຄຸມຂັງ-ດັດສ້າງ ກໍຄື ຄະນະນຳ ກະຊວງປ້ອງກັນຄວາມສະຫງົບ ທີ່ໄດ້ມີຄວາມເປັນຫ່ວງເປັນໃຍ ຕໍ່ແຂວງຈຳປາສັກ ໂດຍສະເພາະ ເອົາໃຈໃສ່ ຕໍ່ວຽກງານຄຸ້ມຄອງແຮງງານທີ່ກັບມາຈາກຕ່າງປະເທດ ກໍຄື ວຽກສະກັດກັ້ນ ປ້ອງກັນ, ຄວບຄຸມການແຜ່ລະບາດຂອງພະຍາດໂຄວິດ-19 ຢູ່ ແຂວງຈຳປາສັກ ແລະອົງການປົກຄອງແຂວງ ມີຄວາມເປັນເອກະພາບຕໍ່ ທິດຊີ້ນຳຂອງ ກະຊວງປ້ອງກັນຄວາມສະຫງົບ ໃນການຈັດຕັ້ງປະຕິບັດ ວຽກງານດັ່ງກ່າວ.