ມີເດຍລາວແຂວງເຊກອງ (ຂ່າວ: ຫຼານປູ່) ວັນທີ 13 ກໍລະກົດ 2021 ນີ້,ເມືອງດາກຈຶງ ແຂວງເຊກອງ ຈັດພິທີປ່ອຍປາ ຈຳນວນ 3ໝື່ນກວ່າໂຕ(ປາປາກ,ປານິນ ແລະ ປາໃນ)ເນື່ອງໃນວັນປ່ອຍປາ ແລະ ອະນຸລັກສັດນໍ້າ-ສັດປ່າແຫ່ງຊາດ ຢູ່ທີ່ອ່າງເກັບນໍ້າຫ້ວຍປຼີງ ໂດຍມີ ທ່ານ ເພັງນາ ຈັນທະພອນ ຮອງເລຂາພັກເມືອງ ສະມາຊິກສະພາປະຊາຊົນແຂວງ ປະທານກວດກາພັກ-ລັດເມືອງ, ມີຄະນະນຳ ແລະ ວິຊາການພະແນກກະສິກໍາ ແລະ ປ່າໄມ້ແຂວງ, ຄະນະນຳຂັ້ນເມືອງ ແລະ ພາກສ່ວນກ່ຽວຂ້ອງເຂົ້າຮ່ວມ.

ທ່ານ ໄພສະໝອນ ໄອ່ແກ້ວ ກຳມະການພັກເມືອງ ຫົວໜ້າຫ້ອງການກະສິກຳ ແລະ ປ່າໄມ້ເມືອງດາກຈຶງໄດ້ໃຫ້ຮູ້ວ່າ: ວຽກງານປ່ອຍປາ ແລະ ການພັດທະນາ, ອະນຸລັກສັດນໍ້າ-ສັດປ່າ ແມ່ນວຽກໜຶ່ງທີ່ສຳຄັນ ນັບຕັ້ງແຕ່ວັນສະຖາປະນາ ສປປ ລາວ ປີ 1975 ເປັນຕົ້ນມາ ພັກ-ລັດຖະບານກໍ່ໄດ້ເອົາໃຈໃສ່ຕໍ່ວຽກງານກະສິກຳ ແລະ ປ່າໄມ້ ເປັນເປົ້າໝາຍຕົ້ນຕໍ ໂດຍສະເພາະ ວຽກງານການຜະລິດ, ການປູກ, ການລ້ຽງ, ການປົກປັກຮັກສາ, ການຄຸ້ມຄອງສັດນໍ້າ-ສັດປ່າໃຫ້ມີຄວາມຍືນຍົງໂດຍຕະຫລອດມາ,ໃນກົດໝາຍວ່າດ້ວຍການປະມົງ ໃນມາດຕາທີ 69 ໄດ້ກຳນົດເອົາວັນທີ 13 ກໍລະກົດ ຂອງທຸກໆປີ ເປັນວັນປ່ອຍປາແຫ່ງຊາດ ເພື່ອປູກຈິດສຳນຶກໃຫ້ປະຊາຊົນ ເຂົ້າໃຈ ແລະ ໃຫ້ຄວາມສຳຄັນໃນການປົກປັກຮັກສາສັດນໍ້າ-ສັດປ່າໃຫ້ມີຄວາມອຸດົມສົມບູນ.

ສຳລັບເມືອງດາກຈຶງ, ຫ້ອງການກະສິກຳ ແລະ ປ່າໄມ້ ໄດ້ສົມທົບກັບການຈັດຕັ້ງກ່ຽວຂ້ອງທັງພາຍໃນ ແລະ ຕ່າງປະເທດ ປຸກລະດົມ ແລະ ສ້າງຂະບວນການປ່ອຍປາລົງສູ່ແມ່ນໍ້າທຳມະຊາດ, ຫ້ວຍ, ຮ່ອງ, ຄອງ, ບຶງ ເຊິ່ງໃນຊຸມປີຜ່ານມາ(2008 ຫາ 2020)ແມ່ນສາມາດປ່ອຍປາໄດ້ທັງໝົດເກືອບ 2 ແສນ ໂຕ ແລະ ໃນປີ 2021 ນີ້ ຄາດຄະເນຈະປ່ອຍໄດ້ 3ໝື່ນ ກວ່າໂຕ ໂດຍເລີ່ມແຕ່ວັນທີ 13 ກໍລະກົດໄດ້ປ່ອຍລົງອ່າງເກັບນ້ຳຫ້ວຍປຼີງແລ້ວ 24.333 ໂຕ ແລະ ອີກ10.000ໂຕແມ່ນມອບໃຫ້ພໍ່ແມ່ປະຊາຊົນໄດ້ປ່ອຍປາລົງໃນໜອງລ້ຽງຂອງຕົນເອງໃນນັ້ນ ມີ ປາປາກ, ປາໃນ ແລະ ປານິນ.