ມີເດຍລາວແຂວງບໍ່ແກ້ວ ວັນທີ 13 ກໍລະກົດ 2021 ນີ້ ທີ່ສະໂມສອນເມືອງຜາອຸດົມ ໄດ້ມີພິທີມອບ-ຮັບໜ້າທີ່ ລະຫວ່າງ ສະມາຊິກສະພາປະຊາຊົນແຂວງບໍ່ແກ້ວ ຊຸດທີ I ແລະ ສະມາຊິກສະພາປະຊາຊົນແຂວງບໍ່ແກ້ວ ຊຸດທີ II ປະຈໍາໜ່ວຍເລືອກຕັ້ງເມືອງຜາອຸດົມ ໂດຍການເປັນປະທານຂອງທ່ານ ພົງສະຫວັນ ປັນຍາສັກ ຮອງເລຂາພັກເມືອງ ຜູ້ຊີ້ນໍາຂົງເຂດພັກ-ພະນັກງານ ມີຄະນະປະຈຳພັກເມືອງ, ກຳມະການພັກເມືອງ ຕະຫຼອດຮອດຫົວໜ້າ-ຮອງຫົວໜ້າຫ້ອງການອ້ອມຂ້າງເມືອງເຂົ້າຮ່ວມ.

ພິທີຄະນະຮັບຜິດຊອບໄດ້ຂຶ້ນຜ່ານ 2 ມະຕິຄື: ມະຕິຂອງຄະນະປະຈຳສະພາປະຊາຊົນແຂວງ ເລກທີ 35/ຄປຈຂ ບໍ່ແກ້ວ, ລົງວັນທີ 22 ມີຖຸນາ 2021 ວ່າດ້ວຍການບັນຈຸຊັບຊ້ອນສະມາຊິກສະພາປະຊາຊົນແຂວງບໍ່ແກ້ວ ຊຸດທີ II ສັງກັດແຕ່ລະຄະນະກໍາມະການ ແລະ ມະຕິຂອງຄະນະປະຈໍາສະພາປະຊາຊົນແຂວງ ເລກທີ 40/ຄປຈຂ ບໍ່ແກ້ວ, ລົງວັນທີ 30 ມີຖຸນາ 2021 ວ່າດ້ວຍການການສ້າງຕັ້ງກົງຈັກ ແລະ ແຕ່ງຕັ້ງບຸກຄະລາກອນຂອງກົງຈັກທີ່ຄະນະປະຈໍາສະພາປະຊາຊົນແຂວງ ສ້າງຕັ້ງ.

ໃນໄລຍະ 05 ປີຜ່ານມາ ສະພາປະຊາຊົນແຂວງບໍ່ແກ້ວ ປະຈໍາໜ່ວຍເລືອກຕັ້ງເມືອງຜາອຸດົມໄດ້ແກ້ໄຂຄຳຮ້ອງ, ຄຳສະເໜີ ແລະ ຂໍ້ຂັດແຍ່ງຕ່າງໆ ເຊັນ: ຂະແໜງສຶກສາບັນລຸໄດ້ 90%, ຂະແໜງສາທາລະນະສຸກບັນລຸໄດ້ 95%, ຂະແໜງແຮງງານ ແລະ ສະຫວັດດີການສັງຄົມບັນລຸໄດ້ 90%, ຂະແໜງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວບັນລຸໄດ້ 90%, ຂະແໜງກະສິກຳ ແລະ ປ່າໄມ້ບັນລຸໄດ້ 80%, ຂະແໜງອຸດສາຫະກຳ ແລະ ການຄ້າບັນລຸໄດ້ 95%, ຂະແໜງແຜນການ ແລະ ການລົງທຶນບັນລຸໄດ້ 90%, ຂະແໜງຊັບພະຍາກອນທຳມະຊາດ ແລະ ສິ່ງແວດລ້ອມບັນລຸໄດ້ 85%, ຂະແໜງໂຍທາທິການ ແລະ ຂົ່ນສົ່ງບັນລຸໄດ້ 80%, ຂະແໜງພະລັງງານ ແລະ ບໍ່ແຮ່ບັນລຸໄດ້ 80% ແລະ ຂໍ້ຂັດແຍງຕ່າງໆ ພາຍໃນເມືອງ ປະຕິບັດໄດ້ 80%;

ເຊິ່ງຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງຜາອຸດົມ ຊຸດໃໝ່ນີ້ ລວມມີ ທ່ານ ທອງວັນ ຮັກພາສິດ ຮອງເລຂາພັກເມືອງ, ປະທານຄະນະກວດກາພັກ-ລັດເມືອງ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງຜາອຸດົມ ເປັນຫົວໜ້າ, ທ່ານ ນ ມະນີວັນ ພັນປະເສີດ ຄະນະປະຈໍາພັກເມືອງ, ຫົວໜ້າຄະນະຈັດຕັງເມືອງ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງຜາອຸດົມ ເປັນຮອງ, ທ່ານ ພັອ ຫຸມແພງ ອິນທະຈັກ ຮອງປະທານສະພາປະຊາຊົນແຂວງ ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງຜາອຸດົມ ເປັນກຳມະການ, ທ່ານ ທອງຫຼໍ່ ສີຫາໂຄດ ກຳມະການພັກເມືອງ ປະທານສານປະຊາຊົນເຂດ II ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງຜາອຸດົມ ເປັນກຳມະການ ແລະ ທ່ານ ຄຳເມັດ ສີລິມະໂນທຳ ອໍານວຍການລັດວິສາຫະກິດພັດທະນາກະສິກຳ-ອຸດສາຫະກຳ ແລະ ບໍລິການສາຂາ-ຂາເຂົ້າແຂວງບໍ່ແກ້ວ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງຜາອຸດົມ ເປັນກຳມະການ.

ທ່ານ ພົງສະຫວັນ ປັນຍາສັກ ຜູ້ຊີ້ນຳຂົງເຂດພັກ-ພະນັກງານ ຮຽກຮ້ອງໃຫ້: ຄະນະສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງຜາອຸດົມ ຈົ່ງເປັນເຈົ້າການໃນການ ຍົກສູງຄວາມຮັບຜິດຊອບ ຂອງການເປັນຕົວແທນໃຫ້ແກ່ພໍ່ແມ່ປະຊາຊົນບັນດາເຜົ່າ ໃນການເກັບກຳຂໍ້ມູນ, ຄໍາຄິດເຫັນຂອງປະຊາຊົນ ກໍຄືບັນດາອົງການຈັດຕັ້ງພັກ-ລັດ ນໍາໄປສະເໜີຕໍ່ຂະແໜງການທີ່ກ່ຽວຂ້ອງ ເພື່ອພ້ອມກັນ ຄົ້ນຄວ້າ, ແກ້ໄຂ ໃຫ້ຖືກຕ້ອງເໝາະສົມ ແລະ ທັນສະພາບການ; ສືບຕໍ່ ແລະ ຈັດຕັ້ງປະຕິບັດຕາມພາລະບົດບາດ, ສິດ ແລະ ໜ້າທີ່ ໃນການເປັນຕົວແທນໃຫ້ແກ່ປະຊາຊົນບັນດາເຜົ່າ ທີ່ໄດ້ກຳນົດໃນກົດໝາຍສະພາກໍຄືສະພາປະຊາຊົນຂັ້ນແຂວງ.