ມີເດຍລາວແຂວງຫຼວງພະບາງ ຂ່າວ: ຈໍາປາ
ຕອນເຊົ້າຂອງວັນທີ 13 ກໍລະກົດ 2021 ນີ້ ການນໍາແຂວງຫຼວງພະບາງນໍາໂດຍທ່ານ ຄໍາຂັນ ຈັນທະວີສຸກ ກຳມະການສູນກາງພັກ ເລຂາພັກແຂວງ ເຈົ້າແຂວງຫຼວງພະບາງ ພ້ອມດ້ວຍຄະນະໄດ້ເຂົ້າວາງກະຕ່າດອກໄມ້ທີ່ອານຸສາວະລີ ປະທານສຸພານຸວົງ ເພື່ອລະນຶກເຖິງຄຸນງາມຄວາມດີຂອງປະທານ ເນື່ອງໃນໂອກາດວັນເກີດຂອງປະທານສຸພານຸວົງ ຄົບຮອບ 112 ປີ (13/7/1909-13/7/2021) ແລະຈັດໃຫ້ມີພິທີສະເຫຼີມສະຫຼອງຂຶ້ນທີ່ຫໍປະຊຸມໃຫຍ່ຂອງແຂວງ ໂດຍມີການປະຖະກະຖາຫວນຄືນມູນເຊື້ອປະຫວັດ ແລະວິລະກຳອັນລ້ຳເລີດຂອງປະທານສຸພານຸວົງ ໂດຍການຂຶ້ນເລົ່າມູນເຊື້ອຂອງ ທ່ານ ສຸກັນ ບຸນຍົງ ຮອງເລຂາພັກແຂວງ ປະທານແນວລາວສ້າງຊາດແຂວງ, ມີບັນດາຄະນະປະຈໍາ, ກໍາມະການພັກແຂວງ ຕະຫຼອດຮອດ ຫົວຫນ້າພະແນກ-ຮອງພະແນກການອ້ອມຂ້າງ ເຂົ້າຮ່ວມຮັບຟັງ.

ປະທານສຸພານຸວົງເກີດເມື່ອ ວັນທີ 13 ກໍລະກົດ 1909 ທີ່ນະຄອນ-ຫຼວງພະບາງ, ເມືອງແຫ່ງວັດທະນະທຳຂອງລ້ານຊ້າງ, ເພີ່ນກຳເນີດໃນເຊື້ອລາດຊະວົງ ຫຼັງຈາກຮຽນຈົບປະຖົມສົມບູນແລ້ວໃນປີ 1920 ເພີ່ນໄດ້ເດີນທາງໄປຮຽນຕໍ່ມັດທະຍົມ “ອານແບກຊາໂຣ”ທີ່ຮ່າໂນ້ຍປະເທດຫວຽດນາມ, ເພີ່ນໄດ້ຕັ້ງໃຈຮໍ່າຮຽນຫຼາຍວິຊາ ແລະຫຼາຍພາສາອີກດ້ວຍ, ເມື່ອມາຮອດປີ 1930 ເພີ່ນໄດ້ໄປສຶກສາຕໍ່ທີ່ປະເທດຝຣັ່ງ, ເພີ່ນຮຽນຢູ່ມະຫາວິທະຍາໄລຂົວທາງແຫ່ງຊາດ, ສາຂາວິຊາວິສະວະກອນພົນລະເຮືອນຢູ່ປາຣີ, ເພີ່ນຮຽນໄດ້ດີ ແລະມີຄະແນນດີເລີດ, ສາມາດເວົ້າໄດ້ດີເຖິງ 10 ພາສາທີ່ໃຊ້ຫຼາຍໃນສາກົນ, ພາຍຫຼັງສິ້ນສຸດການສຶກສາກໍປະກອບໜ້າທີ່ການງານຕາມຄວາມຮູ້-ຄວາມສາມາດ ແຕ່ໃນເງື່ອນໄຂ ແລະສິ່ງແວດລ້ອມທີ່ເອື້ອອຳນວຍຄວາມສະດວກຄືແນວນັ້ນຄວນຈະເປັນເສັ້ນທາງໃຫ້ເພີ່ນກາຍເປັນຂຸນນາງ ແລະດຳລົງຕໍາແໜ່ງໃດໜຶ່ງຂອງກົງຈັກປົກຄອງສັກດີນາ, ແຕ່ຊີວິດ ແລະການເຄື່ອນໄຫວຕົວຈິງຂອງເພີ່ນໄດ້ປ່ຽນປີ້ນຖານະຊົນຊັ້ນ, ຫັນປ່ຽນແນວຄິດກໍຄືແບບແຜນດໍາລົງຊີວິດແບບບໍ່ໜ້າເຊື່ອ, ເວົ້າໄດ້ວ່າເພີ່ນແມ່ນເຊື້ອເຈົ້າກະສັດອົງດຽວຂອງອານາຈັກລ້ານຊ້າງທີ່ໄດ້ປ່ຽນແປງຕຳນານແຫ່ງວີຖີຊີວິດແບບສັກດີນາ ມາເປັນສາມັນຊົນຜູ້ຮ່ວມສຸກ, ຮ່ວມທຸກ, ຮ່ວມຕໍ່ສູ້ກັບປະຊາຊົນບັນດາເຜົ່າເພື່ອເອກະລາດແຫ່ງຊາດຈົນກາຍເປັນຕົ້ນແບບຂອງນັກຮົບຕໍ່ສູ້ປະຕິວັດຮັກຊາດທີ່ຍິ່ງໃຫຍ່.

ປະທານສຸພານຸວົງແມ່ນຮຸ່ນຄົນສືບທອດຮຸ່ນທຳອິດຂອງນັກຕໍ່ສູ້ປະຕິວັດລາວ ຜູ້ເຄີຍຮັບການສຶກສາອົບຮົມບົ່ມເພາະຈາກພັກກອມມູນິດອິນດູຈີນໃນເມື່ອກ່ອນ, ໂດຍສະເພາະແມ່ນການສືບທອດເອົາແນວຄິດ ແລະອຸດົມການອັນຍິ່ງໃຫຍ່ຂອງປະທານໂຮ່ຈິມິນ ບວກໃສ່ພຶດຕິກຳຂອງການເຄື່ອນໄຫວຕໍ່ສູ້ປະຕິວັດ ຈຶ່ງເຮັດໃຫ້ມີການປ່ຽນແປງຈາກຊີວິດນັກຮຽນຮູ້ປັນຍາຊົນ, ຈາກແນວຄິດສັກດີນາ ກາຍມາເປັນນັກຕໍ່ສູ້ປະຕິວັດຜູ້ຍິ່ງໃຫຍ່ຜູ້ໜຶ່ງບົນຜືນແຜ່ນດິນລ້ານຊ້າງ, ໃນສະຕະວັດທີ 20 ຊີວິດການເຄື່ອນໄຫວຕໍ່ສູ້ປະຕິວັດຂອງເພີ່ນ ທັງໝົດໄດ້ສ່ອງແສງໃຫ້ເຫັນຢ່າງຈະແຈ້ງເຖິງທາດແທ້ຂອງນັກຕໍ່ສູ້ປະຕິວັດຜູ້ຮັກຊາດຢ່າງດູູດດື່ມ ກາຍເປັນມູນເຊື້ອ ແລະອຸດົມການອັນປະເສີດທີ່ລໍ້າເລີດໃຫ້ແກ່ຄົນຮຸ່ນໃໝ່.