ມີເດຍລາວແຂວງຫຼວງພະບາງ ຂ່າວ: ສາຍສະໝອນ ຈິດຕະປັນຍາ ນັກຂ່າວເມືອງງອຍ ລະຫວ່າງວັນທີ 6 ຫາ 8 ກໍລະກົດ 2021 ນີ້, ທ່ານ ສຸວິລັດ ພັນສຸເດດ ຮອງປະທານຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ, ສະມາຊິກສະພາປະຊາຊົນແຂວງ ຊຸດທີ II ປະຈໍາເຂດເລືອກຕັ້ງເມືອງງອຍ ໄດ້ໃຫ້ກຽດລົງເຜີຍແຜ່ຜົນສຳເລັດກອງປະຊຸມຄັ້ງປະຖົມມະລືກຂອງສະພາປະຊາຊົນແຂວງ ຊຸດທີ II ຢູ່ 5 ບ້ານຂອງເມືອງງອຍ ແຂວງຫຼວງພະບາງ ຄື: ບ້ານ ຄອນເກີງ, ບ້ານ ຫ້ວຍຜ່າງ, ບ້ານ ຫາດຄີບ, ບ້ານ ປາກງາ ແລະ ບ້ານ ດອນເງິນ ເມືອງງອຍ ເຊິ່ງໃຫ້ກຽດຕ້ອນຮັບການລົງເຜີຍແຜ່ໃນຄັ້ງນີ້ໂດຍ ທ່ານ ແສງດາວ ວຸດທິລາດ ຮອງປະທານກວດກາພັກ-ລັດ ເມືອງງອຍ, ມີຜູ້ຮັບຜິດຊອບກຸ່ມບ້ານ, ພະນັກງານບຳນານ, ເລຂາພັກ-ນາຍບ້ານ ຕະຫຼອດຮອດ ປະຊາຊົນບັນດາເຜົ່າຜູ້ທີ່ມີອາຍຸຕັ້ງແຕ່ 18 ປີ ຈຳນວນ 5 ບ້ານເຂົ້າຮ່ວມຮັບຟັງທັງໝົດ 331 ຄົນ, ຍິງ 166 ຄົນ.

ການລົງເຜີຍແຜ່ເອກະສານແຕ່ລະຈຸດນັ້ນ, ທ່ານ ເລຂາພັກບ້ານ-ນາຍບ້ານໄດ້ຂຶ້ນລາຍງານສະພາບການພັດທະນາເສດຖະກິດ-ສັງຄົມໃນໄລຍະ 1 ປີ (2020) ຜ່ານມາ ແລະ ທິດທາງແຜນການ 1 ປີ (2021) ໂດຍຫຍໍ້ ເຊິ່ງໄດ້ຍົກໃຫ້ເຫັນສະພາບການພັດທະນາເສດຖະກິດ – ສັງຄົມພາຍໃນບ້ານໄດ້ຮັບການພັດທະນານັບມື້ນັບດີຂຶ້ນ, ສັງຄົມມີຄວາມສະຫງົບ, ຊີວິດການເປັນຢູ່ ຂອງປະຊາຊົນບັນດາເຜົ່າ ນັບມື້ນນັບດີຂຶ້ນເປັນກ້າວໆ.

ທ່ານ ສຸວິລັດ ພັນສຸເດດ ຮອງປະທານຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ, ສະມາຊິກສະພາປະຊາຊົນແຂວງ ຊຸດທີ II ປະຈໍາເຂດເລືອກຕັ້ງເມືອງງອຍ ກໍ່ໄດ້ສະແດງຄໍາຍ້ອງຍໍຊົມເຊີຍບັນດາຜົນສໍາເລັດທີ່ແຕ່ລະບ້ານສາມາດບ້ານຍາດມາໄດ້ນັ້ນ, ຈາກນັ້ນທ່ານກໍ່ໄດ້ໃຫ້ກຽດເຜີຍແຜ່ຜົນສຳເລັດກອງປະຊຸມຄັ້ງປະຖົມມະລຶກ ຂອງສະພາປະຊາຊົນແຂວງຊຸດທີ II ຢູ່ 5 ບ້ານເປົ້າໝາຍ ແລະ ໄດ້ມອບເຄື່ອງອຸປະກອນຮັບໃຊ້ຫ້ອງປະຊຸມບ້ານຈໍານວນໜຶ່ງໃຫ້ແຕ່ລະບ້ານ ລວມມູນຄ່າທັງໝົດ 1.110.000 ກີບ ແລະ ກໍ່ໄດ້ສະແດງຄວາມຂອບໃຈຕໍ່ຕາງໜ້າອົງການປົກຄອງເມືອງ ແລະບ້ານ ທີ່ໄດ້ໃຫ້ກຽດຕ້ອນຮັບການລົງເຮັດວຽກໃນຄັ້ງນີ້.

ພາຍຫຼັງທີ່ສຳເລັດເຜີຍແຜ່ເອກະສານແລ້ວ, ກໍ່ໄດ້ເປີດໃຫ້ໂອກາດເລຂາພັກ-ນາຍບ້ານ ແລະ ປະຊາຊົນບັນດາເຜົ່າ ໄດ້ມີຄຳຄິດ, ຄຳເຫັນ ຕໍ່ກັບວຽກງານພັດທະນາເສດຖະກິດ-ສັງຄົມ, ການຈັດຕັ້ງປະຕິບັດລັດຖະທຳມະນູນ ແລະ ກົດໝາຍໃນໄລຍະຜ່ານມາ ແລະ ຄຳສະເໜີຕ່າງໆ ເພື່ອຈະນໍາໄປສະເໜີ ຕໍ່ກອງປະຊຸມສະພາຂັ້ນ ແຂວງພິຈາລະນາ.
ຕອນທ້າຍ ທ່ານ ຮອງປະທານຄະນະກຳມະການວັດທະນະທໍາ-ສັງຄົມ ແລະ ບັນດາເຜົ່າ, ສະມາຊິກສະພາປະຊາຊົນແຂວງ ຊຸດທີ II ປະຈໍາເຂດເລືອກຕັ້ງເມືອງງອຍ ກໍ່ໄດ້ຊີ້ແຈງບາງຂໍ້ສະເໜີ ຫຼື ຂໍ້ຊັກຖາມ ຂອງປະຊາຊົນ, ເຊິ່ງຂໍ້ຊັກຖາມຂອງປະຊາຊົນຈຳນວນໜຶ່ງທີ່ພົວພັນກັບພະແນກການ ຂອງແຂວງ ແລະ ເມືອງງອຍ ກໍ່ໄດ້ບັນທຶກໄວ້ ເພື່ອນຳໄປສົມທົບກັບພະແນກການ ແລະ ເມືອງງອຍ ເພື່ອພິຈາລະນາ, ຄົ້ນຄ້ວາ ແລະ ແກ້ໄຂ ພ້ອມທັງມີຄຳຕອບທີ່ຊັດເຈນ ແລະ ເປັນລາຍລັກອັກສອນໃຫ້ແກ່ປະຊາຊົນຕາມເວລາອັນຄວນ.