ມີເດຍລາວແຂວງໄຊສົມບູນ ຂ່າວ: ພາພອນ ນະວົງໄຊ ພິທີມອບ-ຮັບ ເຮືອນສົງເຄາະຊ່ວຍເຫຼືອຄອບຄົວປະຊາຊົນທີ່ທຸກຍາກ ຢູ່ບ້ານນໍ້າຊານ ເມືອງລ້ອງແຈ້ງ ແຂວງໄຊສົມບູນ ໄດ້ຈັດຂຶ້ນໃນຕອນເຊົ້າຂອງວັນ 13 ກໍລະກົດ ນີ້ ທີ່ບ້ານນໍ້າຊານ ໂດຍການເຂົ້າຮ່ວມພິທີໃນຄັ້ງນີ້ ມີທ່ານ ຫງວຽນແອງແທ່ງ, ຜູ້ອໍານວຍການບໍລິສັດ ຫລອມໂລຫະ ແລະ ແຮ່ທາດ ທີ່ຂຶ້ນກັບກຸ່ມບໍລິສັດ ຮ່ວມມືເສດຖະກິດໂກເອກໂກ ແລະ ທ່ານ ໄຊຍະສິດ ລີຊັງດວງພະຈັນ, ຮອງເລຂາພັກເມືອງໆ ລ້ອງແຈ້ງ ພ້ອມດ້ວຍອໍານາດການປົກຄອງບ້ານ, ຮາກຖານບ້ານ ຕະຫຼອດຮອດ ປະຊາຊົນ ພາຍໃນບ້ານນໍ້າຊານ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.

ໃນພິທີ ທ່ານ ຫງວຽນແອງແທ່ງ ໄດ້ລາຍງານໃຫ້ຮູ້ວ່າ ໃນໄລຍະ ປີ 2020 ຜ່ານມາ ກຸ່ມບໍລິສັດ ຮ່ວມມືເສດຖະກິດໂກເອກໂກ ໄດ້ສົມທົບກັບອໍານາດການປົກຄອງທ້ອງຖິ່ນ ເພື່ອດໍາເນີນການສໍາຫຼວດ, ກວດກາ ແລະ ສ້າງເຮືອນສົງເຄາະຊ່ວຍເຫຼືອຄອບຄົວທຸກຍາກ ໄດ້ທັງໝົດ ຈໍານວນ 3 ຫຼັງ; ໃນນັ້ນ ຢູ່ບ້ານນໍ້າສຽມ ເມືອງຜາໄຊ 1 ຫຼັງ, ບ້ານແກ່ວກວາງ ເມືອງຄູນ ແຂວງຊຽງຂວາງ 1 ຫຼັງ ແລະ ບ້ານອອມ ເມືອງອະນຸວົງ 1 ຫຼັງ. ມາໃນປີ 2021 ເຫັນວ່າຄອບຄົວຂອງທ່ານ ສືທໍ່ ເຊ່ຍຢີ ປະຊາຊົນບ້ານນໍ້າຊານ ເມືອງລ້ອງແຈ້ງ ແຂວງໄຊສົມບູນ ມີຄວາມຫຍຸ້ງຫຍາກພໍສົມຄວນ ເນື່ອງຈາກຜູ້ກ່ຽວເປັນຄົນພິການ ບໍ່ສາມາດອອກແຮງງານ ຫຼື ທໍາມາຫາກິນໄດ້ຄືຄອບຄົວອື່ນ ດັ່ງນັ້ນ ທັງກຸ່ມບໍລິສັດ ຈຶ່ງຕັດສິນໃຈປຸກສ້າງເຮືອນສົງເຄາະ ຈໍານວນ 1 ຫຼັງ ໃຫ້ຜູ້ກ່ຽວ ໂດຍປະກອບມີຕຽງນອນ, ຫ້ອງນໍ້າ ແລະ ເຄື່ອງໃຊ້ຄົວເຮືອນຄົບຊຸດ ລວມມູນຄ່າ ທັງໝົດ ຈໍານວນ 60 ລ້ານກີບ. ຊຶ່ງພິທີໃນຄັ້ງນີ້ ໄດ້ສະແດງໃຫ້ເຫັນເຖິງຄວາມເປັນຫ່ວງເປັນໃຍ, ຊ່ວຍເຫຼືອເຊິ່ງກັນ ແລະ ກັນ ແລະ ສາຍພົວອັນພິເສດ ລະຫວ່າງ ສອງຊາດ ລາວ ຫວຽດນາມ ທີ່ໄດ້ຄຽງບ່າຄຽງໄຫຼ່ ໃນພາລະກິດປົກປັກຮັກສາ ແລະ ສ້າງສາພັດທະນາ ປະເທດຊາດ ຕະຫຼອດມາ. ຈາກນັ້ນ ທ່ານ ໄດ້ກ່າວມອບເຮືອນຫຼັງດັ່ງດ່າວ ໃຫ້ແກ່ຄອບຄົວ ທ່ານ ສືທໍ່ ເຊ່ຍຢີ ຊຶ່ງເປັນຄອບຄົວທຸກຍາກ ບ້ານນໍ້າຊານ ເມືອງລ້ອງແຈ້ງ ແຂວງໄຊສົມບູນ ຢ່າງເປັນທາງການ ໂດຍຊ້ອງໜ້າການນໍາເມືອງລ້ອງແຈ້ງ, ອໍານາດການປົກຄອງບ້ານ ແລະ ພາກສ່ວນ ທີ່ກ່ຽວຂ້ອງ ເຂົ້າຮ່ວມເປັນສັກຂີພິຍານ.