ມີເດຍລາວແຂວງບໍ່ແກ້ວ ພາບ, ຂ່າວ: ບຸນຈັນ ບຸນປັນຍາ
ບ້ານນໍ້າຈ້າງໄດ້ຈັດກອງປະຊຸມໃຫຍ່ ຢູ່ຫໍປະຊຸມຂອງບ້ານ ໃນວັນທີ່ 13 ກໍລະກົດນີ້, ເປັນກຽດເຂົ້າຮ່ວມຂອງທ່ານ ຄໍາແດງ ແພງໄຊ ຄະນະປະຈໍາພັກເມືອງ, ຫົວໜ້າຄະນະຈັດຕັ້ງເມືອງຫ້ວຍຊາຍ, ມີບັນດາຄະນະພັກຊີ້ນໍາກຸ່ມບ້ານ, ຄະນະພັກຮາກຖານ, ອຳນາດການປົກຄອງບ້ານ, ເຖົ້າແກ່ແນວໂຮມ, ແຂກຖຶກເຊີນຕະຫຼອດຮອດປະຊາຊົນເຂົ້າຮ່ວມ.

ທ່ານ ທອງເພັດ ແຊ່ລີ ນາຍບ້ານໆນໍ້າຈ້າງ ໄດ້ຂຶ້ນຜ່ານບົດສະຫຼຸບການເຄື່ອນໄຫວ ໃນໄລຍະ 5ປີ ຜ່ານມາ, ບ້ານນໍ້າຈ້າງເປັນບ້ານໜື່ງທີ່ຂຶ້ນກັບກຸ່ມບ້ານໂພນທອງ ເມືອງຫ້ວຍຊາຍ ແຂວງບໍ່ແກ້ວ, ປະກອບມີ 39 ຄົວເຮືອນ, ມີ 40 ຄອບຄົວ, ມີພົນລະເມືອງທັງໝົດ 238 ຄົນ, ຍິງ 124 ຄົນ, ພາຍໃນບ້ານປະກອບມີ 1 ຊົນເຜົ່າຄື: ເຜົ່າແລນແຕນ, ຖືສາດສະໜາຜີ, ປະຊາຊົນພາຍໃນບ້ານສ່ວນໃຫ່ຍຖືເອົາອາຊີບປູກຟັງລ້ຽງສັດ ແລະ ຄ້າຂາຍເປັນອາຊີບສໍາຮອງ, ຜ່ານມາອົງການປົກຄອງບ້ານໄດ້ສົມທົບກັບຄະນະພັກເປັນເຈົ້າການສຶກສາອົບຮົມການເມືອງ-ແນວຄິດ, ເຜີຍແຜ່-ເຊື່ອມຊຶມ ບັນດາແນວທາງນະໂຍບາຍຂອງພັກ, ຂໍ້ກຳນົດ, ກົດໝາຍຕ່າງໆຂອງລັດ ໃຫ້ແກ່ປະຊາຊົນບັນດາເຜົ່າ ຢ່າງເປັນປົກກະຕິ ຕິດພັນ ການປັບປຸງພື້ນຖານໂຄງລ່າງຂອງບ້ານຢ່າງຕໍ່ເນື່ອງ ເຮັດໃຫ້ບ້ານສືບຕໍ່ ມີສະຖຽນລະພາບທາງດ້ານການເມືອງໜັກແໜ້ນ, ມີຄວາມສະຫງົບປອດໄພໂດຍພື້ນຖານ, ສະພາບເສດຖະກິດ ຊີວິດການເປັນຢູ່ຂອງປະຊາຊົນ ໄດ້ຮັບການຊຸກຍູ້ສົ່ງເສີມ ແລະ ພັດທະນາໃຫ້ນັບມື້ດີຂຶ້ນເລື້ອຍໆ,

ຈາກນັ້ນກອງປະຊຸມຍັງໄດ້ປ່ອນບັດຄັດເລືອກເອົາຄະນະບ້ານຊຸດໃໝ່ມີຜູ້ສະມັກ 5 ທ່ານເລືອກເອົາ 3 ທ່ານ, ຜ່ານການປ່ອນບັດຄັດເລືອກສາມາດເລືອກໄດ້ ທ່ານ ທອງເພັດ ແຊ່ລີ ເປັນນາຍບ້ານ, ທ່ານ ນາງ ບົວຄໍາ ຈອມແຊ່ເຕີນ, ທ່ານ ບົວເງີນ ແຊ່ເທີນ ເປັນຮອງນາຍບ້ານນໍ້າຈ້າງ, ກອງປະຊຸມໄດ້ເລືອກຕັ້ງເອົາປະທານ ແລະ ຮອງປະທານກວດກາຂັ້ນບ້ານປະກອມມີ ທ່ານ ບົວເງີນ ແຊ່ເທີນ ເປັນປະທານກວດກາຂັ້ນບ້ານ, ທ່ານ ນ້ອຍ ຈ້າງສະຫວັດ ເປັນຮອງປະທານກວດກາຂັ້ນບ້ານ, ພ້ອມນັ້ນຍັງໄດ້ມອບໃບຍ້ອງຍໍ ຂອງທ່ານເຈົ້າແຂວງ ແລະ ທ່ານເຈົ້າເມືອງໃຫ້ຜູ້ທີ່ມີຜົນງານດີເດັ່ນໃນການສ້າງສາພັດທະນາປະເທດຊາດ, ກໍ່ຄືເມືອງຫ້ວຍຊາຍແຂວງບໍ່ແກ້ວ,

ໃຫ້ກຽດມອບຂອງທ່ານ ຄໍາແດງ ແພງໄຊ ຄະນະປະຈໍາພັກເມືອງ, ຫົວໜ້າຄະນະຈັດຕັ້ງເມືອງຫ້ວຍຊາຍ, ພ້ອມມີຄຳເຫັນສະແດງຄວາມຍ້ອງຍໍຊົມເຊີຍຕໍ່ ຜົນງານ, ດ້ານດີ, ຄວາມສາມັກຄີປອງດອງ ອັນແໜ້ນແຟ້ນຂອງປະຊາຊົນພາຍບ້ານໃນໄລຍະຜ່ານມາ, ທ່ານ ເນັ້ນໜັກໃຫ້ຄະນະບ້ານຊຸດໃໝ່ ຕ້ອງສົມທົບກັບຄະນະພັກຮາກຖານ ສືບຕໍ່ສຶກສາອົບຮົມການເມືອງ-ແນວຄິດ ຄົ້ນຄວ້າແນວທາງແຜນພັດທະນາ ໃຫ້ຖຶກຕ້ອງສອດຄ່ອງກັບທ່າແຮງດ້ານເສດຖະກິດຂອງບ້ານ ເປັນສຳຄັນ ຕິດພັນກັບ ການແກ້ໄຂບັນຫາຂີ້ລັກງັດແງະ, ສິ່ງເສບຕິດ ແລະ ຄວາມບໍ່ສະຫງົບພາຍໃນບ້ານໃຫ້ໝົດໄປ, ຮຽກຮ້ອງໃຫ້ ຄະນະບ້ານຊຸດໃໝ່ ແລະ ປະຊາຊົນບັນດາເຜົ່າຈົ່ງພ້ອມກັນປົກປັກຮັກສາມູນເຊື້ອຮີດຄອງປະເພນີຂອງຊາດ ກໍ່ຄືຂອງເຜົ່າໄວ້ໃຫ້ໝັ້ນຄົງຕະຫຼອດໄປ ແລະ ສ້າງຄວາມສາມັກຄີພາຍໃນເປັນປຶກແຜ່ນ, ພ້ອມກັນ ນຳເອົາເນື້ອໃນຈິດໃຈກອງປະຊຸມຄັ້ງນີ້ ໄປຈັດຕັ້ງຜັນຂະຫຍາຍໃຫ້ເກີດດອກອອກຜົນເທື່ອລະກ້າວ.