ມີເດຍລາວແຂວງເຊກອງ (ຂ່າວ-ພາບ: ແກ້ວໄຊຍະວົງ) ເພື່ອທົບທວນຄືນມູນເຊື້ອການສ້າງຕັ້ງສະຫະພັນແມ່ຍິງລາວ ຄົບຮອບ 66 ປີ, ທັງເປັນການສຶກສາອົບຮົມສະມາຊິກສະຫະພັນແມ່ຍິງລາວພາຍໃນໜ່ວຍຮາກຖານພະແນກສາທາລະນະສຸກແຂວງໄດ້ຮັບຮູ້ ແລະເຂົ້າໃຈຢ່າງເລິກເຊິ່ງກວ່າເກົ່າ, ຕໍ່ການປະກອບສ່ວນຂອງແມ່ຍິງລາວເຂົ້າໃນພາລະກິດປົດປ່ອຍຊາດ, ປົກປັກຮັກສາ ແລະສ້າງສາພັດທະນາປະເທດຊາດ, ພະແນກສາທາລະນະສຸກແຂວງເຊກອງ ໄດ້ຈັດພິທີປາຖະກະຖາຂຶ້ນໃນວັນທີ 14 ກໍລະກົດ 2021 ໂດຍມີທ່ານ ຄໍາໄຫຼ ສັນຕິພູມ ເລຂາຄະນະພັກຮາກຖານ, ຫົວໜ້າພະແນກສາທາລະນະສຸກແຂວງ, ມີຄະນະພັກ-ຄະນະໜ່ວຍພັກ, ຮອງຫົວໜ້າພະແນກ, ພະນັກ ງານບຳນານ ແລະສະມາຊິກແມ່ຍິງເຂົ້າຮ່ວມ.

ທ່ານ ນາງ ມະໂນລາ ສຸດທິຈັກ ຄະນະບໍລິຫານງານສະຫະພັນແມ່ຍິງແຂວງ, ປະທານຄະນະບໍລິຫານງານສະຫະພັນແມ່ຍິງຮາກຖານພະແນກສາທາລະນະສຸກແຂວງ ໄດ້ເລົ່າຄືນມູນເຊື້ອການກຳເນີດ, ການເຕີບໃຫຍ່ຂະຫຍາຍ ຕົວ ແລະຜົນງານການເຄື່ອນໄຫວຂອງແມ່ຍິງຕະຫຼອດໄລຍະ 66 ປີ ຊຶ່ງພາຍຫຼັງພັກປະຊາຊົນປະຕິວັດລາວໄດ້ຮັບການສ້າງຕັ້ງຂຶ້ນໃນວັນທີ 22 ມີນາ 1955 ພັກກໍ່ໄດ້ເອົາໃຈໃສ່ປຸກລະດົມຂົນຂວາຍກໍ່ສ້າງແມ່ຍິງໃຫ້ມີຄວາມຕື່ນຕົວປະກອບສວ່ນໃນພາລະກິດປະຕິວັດ ແລະຖືແມ່ຍິງເປັນພາກສວ່ນໜຶ່ງໃນກຳລັງແຮງສຳຄັນຂອງພັກ, ຕົກມາຮອດວັນທີ 20 ກໍລະ ກົດ 1955 ພັກໄດ້ຈັດຕັ້ງຄົ້ນຄວ້າວຽກງານແມ່ຍິງ ຖືເປັນຕົ້ນກຳເນີດຂອງອົງການຈັດຕັ້ງສະຫະພັນແມ່ຍິງລາວ ໂດຍນັບແຕ່ມື້ສ້າງຕັ້ງເປັນຕົ້ນມາອົງການຈັດຕັ້ງແມ່ຍິງໄດ້ເຄື່ອນໄຫວຕາມພາລະບົດບາດ, ສິດ ແລະໜ້າທີ່ຂອງຕົນ, ເອົາໃຈໃສ່ປະ ຕິບັດໂຄງການດຳເນີນງານໃນການພັດທະນາ ແລະຍົກສູງບົດບາດຂອງເອື້ອຍນ້ອງແມ່ຍິງໃຫ້ສູງຂຶ້ນ.

ພ້ອມນີ້ ທ່ານ ນາງ ມະໂນລາ ສຸດທິຈັກ ຍັງໄດ້ຍົກໃຫ້ເຫັນເຖິງໜ້າທີ່ຂອງການຈັດຕັ້ງແມ່ຍິງໃນເມື່ອກ່ອນ ແລະປັດຈຸບັນ ໂດຍໜ້າທີ່ອັນທີໜຶ່ງແມ່ນການເບິ່ງແຍງລ້ຽງດູ, ຊຸກເຊື່ອງຕິດຕໍ່, ສົ່ງຂ່າວ, ສົ່ງເອກະສານຕ່າງໆໃຫ້ພະນັກງານ, ທະຫານທີ່ປະຕິບັດໜ້າທີ່ຢູ່ແນວໜ້າ; 2. ລໍາລຽງສະບຽງອາຫານ, ອາວຸດ ແລະເຄື່ອງນຸ່ງຫົ່ມໃຫ້ພະນັກງານ-ນັກຮົບຢູ່ແນວໜ້າ; 3. ປຸກລະດົມຊາວໝຸ່ມລູກຫຼານອອກຮັບໃຊ້ປະເທດຊາດ; 4. ປຸກລະດົມຂະບວນການຂອງແມ່ຍິງປະຕິບັດວຽກແນວຫຼັງ, ເພີ່ມພູນຜະລິດຜົນຫາລ້ຽງກຸ້ມຕົນເອງປະຢັດເຂົ້າປາອາຫານ ເພື່ອສົ່ງໄປແນວໜ້າ ແລະ 5. ປະຕິບັດວຽກງານຕາມການຈັດຕັ້ງມອບໝາຍດ້ວຍຄວາມຮັບຜິດຊອບສູງ ຕິດພັນກັບການຄົ້ນຄວ້າກຳນົດພາລະບົດບາດ, ກົດລະບຽບ ແລະໂຄງການດຳເນີນງານ ເພື່ອເປັນພື້ນຖານໃຫ້ແກ່ການຈັດຕັ້ງ, ເຕົ້າໂຮມຄວາມສາມັກຄີ, ສຶກສາອົບຮົມປຸກລະດົມຂົນຂວາຍຂະບວນການແມ່ຍິງລາວບັນດາເຜົ່າເຂົ້າເປັນກຳລັງແຮງໃຫ້ແກ່ການປະຕິວັດປົດປ່ອຍຊາດ ກໍຄືການປົກປັກຮັກສາ ແລະສ້າງສາພັດທະນາປະເທດຊາດໃຫ້ນັບມື້ຈະເລີນກ້າວຂຶ້ນ.