ມີເດຍລາວແຂວງຫຼວງພະບາງ ຂ່າວ: ສີວອນ ນັກຂ່າວເມືອງໂພນໄຊ ຕອນເຊົ້າຂອງວັນທີ 13 ກໍລະກົດ 2021 ເມືອງໂພນໄຊ ແຂວງຫຼວງພະບາງ ໄດ້ຈັດພິທີປະຖະກາຖາລະນຶກວັນເກີດຂອງທ່ານ ປະທານ ສຸພານຸວົງ ອາດິດປະທານປະເທດແຫ່ງ ສປປ ລາວຄົບຮອບ 112 ປີ,ວັນກໍາເນີດກິລາກາຍຍະກໍາ ແຫ່ງຊາດລາວຄົບຮອບ 55ປີ,ວັນໂອແລມປິກລາວຄົບຮອບ 40ປີ,ວັນໂອແລມປິກສາກົນຄົບຮອບ 124ປີ,ວັນປ່ອຍປາ ແລະ ອະນຸລັກສັດນໍ້າ-ສັດປ່າແຫ່ງຊາດ ນໍາພາໂດຍທ່ານ ທອງຈັນ ລັດຕະນະປະດິດ ເຈົ້າເມືອງໆໂພນໄຊ ພ້ອມດ້ວຍຄະນະປະຈໍາພັກເມືອງ,ກໍາມະການພັກເມືອງ,ຫົວໜ້າ-ຮອງຫົວໜ້າຫ້ອງການອ້ອມເມືອງ ຕະຫຼອດຮອດພະນັກງານບໍານານ ແລະພະນັກງານລັດຖະກອນອ້ອມຂ້າງເມືອງເຂົ້າຮ່ວມ.

ພິທີດັ່ງກ່າວທ່ານ ທອງຈັນ ລັດຕະນະປະດິດ ເຈົ້າເມືອງໆໂພນໄຊ ກໍໄດ້ຍົກໃຫ້ເຫັນມູນເຊື້ອ ແລະຄຸນງາມຄວາມດີ ຂອງທ່ານປະທານ ສຸພານຸວົງ ໄດ້ອຸທິດຊີວິດໃຫ້ແກ່ການປະຕິວັດແຫ່ງການຕໍ່ສູ້ປົດປ່ອຍຊາດ ແລະ ນໍາພາລະກິດປົກປັກຮັກສາ ແລະສ້າງສາພັດທະນາປະເທດຊາດ. ດັ່ງບາງຕອນວ່າ: ປະທານສຸພານຸວົງ ເກີດເມືອວັນທີ 13 ກໍລະກົດ ປີ 1909 ທີ່ນະຄອນຫຼວງພະບາງ ເຊິ່ງທ່ານເປັນເຊື້ອເຈົ້າຜູ້ໜຶ່ງທີ່ມີນ້ຳໃຈຮັກຊາດອັນດູດດື່ມ, ມີຈິດໃຈຕໍ່ສູ້ຢ່າງອາດຫານ, ມີທັດສະນະຫລັກໝັ້ນ ແລະ ມີນ້ຳໃຈເສຍສະຫລະອັນສູງສົ່ງເພື່ອປະເທດຊາດ ແລະ ປະຊາຊົນ, ຕະຫຼອດເສັ້ນທາງຊີວິດຂອງເພີ່ນໄດ້ອຸທິດເລືອດເນື້ອ ເຫື່ອແຮງ ແລະ ສະຕິປັນຍາ ໂດຍສະເພາະແມ່ນການສືບທອດແນວຄິດ ແລະ ອຸດົມການອັນຍິງໃຫ່ຍຂອງປະທ່ານ ໂຮຈີມິນ ບວກໃສ່ພຶດຕິກຳຂອງການເຄືອນໄຫວຕໍ່ສູ້ປະຕິວັດ ເພື່ອສຶກສາອົບຮົມແນວຄິດຮັກຊາດ, ການປຸກລະດົມນໍ້າໃຈເສຍສະຫຼະ ແລະ ເຕົ່າໂຮມຄວາມສາມັກຄີຂອງປະຊາຊົນລາວບັນດາເຜົ່າປະກອບສວນເຂົ້າໃນພາລະກິດຕໍ່ສູ້ກູ້ຊາດ ຕ້ານພວກລ່າເມືອງຂຶ້ນແບບເກົ່າ ແລະ ແບບໃໝ່ ຍາດເອົາເອກະລາດ ປະຊາທິປະໄຕຂອງຊາດ ແລະ ຄວາມສົມບູນພູນສຸກຂອງປະຊາຊົນລາວບັນດາເຜົ່າ.

ການເລົ່າມູນເຊື້ອຂອງປະທານ ສຸພານຸວົງ ຄັ້ງນີ້ ເພື່ອໃຫ້ສະມາຊິກພັກ-ພະນັກງານທຸກທົ່ວໜ້າ ແລະ ປະຊາຊົນບັນດາເຜົ່າ ໄດ້ຮັບຮູ້ ແລະລະນຶກເຖິງຄຸນງາມຄວາມດີ, ຜົນງານອັນຍິງໃຫ່ຍຂອງປະທານ ພ້ອມກັນເສີມຂະຫຍາຍມູນເຊື້ອອັນດີງາມດັ່ງກ່າວ,ໃນການເຝິກຝົນຫຼໍ່ຫຼອມຕົນເອງ ໃຫ້ກາຍເປັນພະນັກງານຮຸນສືບທອດທີ່ຈົງຮັກພັກດີຕໍ່ພັກ ແລະ ປະເທດຊາດ.

ຈາກນັ້ນ ປະທານ ແລະ ຜູ້ເຂົ້າຮ່ວມ ໄດ້ຮ່ວມກັນປ່ອຍປາ ເນື່ອງໃນໂອກາດວັນອະນຸລັກສັດນໍ້າ-ສັດປ່າ ແລະ ປ່ອຍປາແຫ່ງຊາດວັນທີ 13 ກໍລະກົດ 2021, ຢູ່ບໍລິເວນຂົວນໍ້າງາ ບ້ານປາກງາ ເຊິ່ງເປັນວັງສະຫງວນຂອງບ້ານ, ໂດຍແມ່ນຫ້ອງການກະສີກໍາ ແລະ ປ່າໄມ້ເມືອງ ເປັນຜູ້ສະໜັບສະໜູນ ໄດ້ນໍາເອົາປາມາປ່ອຍໃນຄັ້ງນີ້ ຈໍານວນ 15.000 ໂຕ,ມີ 3 ຊະນິດຄຶ: ປາໄນ,ປານິນ ແລະ ປາປາກ, ເພື່ອໃຫ້ສາຍນໍ້າດັ່ງກ່າວມີຄວາມອຸດົມສົມບູນ ເຕັມໄປດ້ວຍ ສັດນໍ້ານາໆພັນ ພ້ອມທັງມອບໃຫ້ປະຊາຊົນ ທີ່ຢູ່ຕາມສາຍນໍ້າ ໄດມີຈິດສໍານຶກໃນການອະນຸລັກຮັກສາ ໃຫ້ຍືນຍົງຕະຫຼອດໄປ.