ມີເດຍລາວແຂວງບໍ່ແກ້ວ ກອງປະຊຸມຄົບຄະນະບໍລິຫານງານພັກແຂວງ ບໍ່ແກ້ວ ຄັ້ງທີ III ສະໄໝທີ VI ປະຈຳ 6 ເດືອນຕົ້ນປີ 2021ໄດ້ໄຂຂຶ້ນໃນວັນທີ13 ກໍລະກົດ ແລະ ສຳເລັດລົງຢ່າງເປັນທາງການໃນວັນທີ 14 ກໍລະກົດ 2021ນີ້ ທີ່ຫ້ອງວ່າການແຂວງບໍ່ແກ້ວ ໂດຍການເປັນປະທານຂອງ ສະຫາຍ ປອ ບົວຄົງ ນາມມະວົງ ກຳມະການສູນກາງພັກ ເລຂາພັກແຂວງ ເຈົ້າແຂວງໆບໍ່ແກ້ວ, ມີຮອງເລຂາພັກແຂວງ, ຮອງເຈົ້າແຂວງ, ຄະນະປະຈຳ, ກຳມະການພັກແຂວງ ເຈົ້າເມືອງ 5 ເມືອງ,ອົງກາຈັດຕັ້ງມະຫາຊົນ,ຕະຫຼອດຮອດລັດວິສາຫະກິດພາກລັດ ແລະ ເອກະຊົນເຂົ້າຮ່ວມ.

ກອງປະຊຸມດຳເນີນເປັນເວລາ 2 ວັນ ຜູ້ເຂົ້າຮ່ວມໄດ້ເຊື່ອມຊຶມເນື້ອໃນກອງປະຊຸມຄົບຄະນະສະໄໝສາມັນຂອງຄະນະບໍລິຫານງານສູນກາງພັກສະໄໝທີ XI, ມະຕິເລກທີ 206 ຂອງກົມການເມືອງສູນກາງພັກຫັນມາເປັນ ຄໍາແນະນຳ ເລກທີ 826 ຂອງ ຄະນະປະຈໍາພັກແຂວງ ກ່ຽວກັບທິດທາງເນື້ອໃນ ແລະ ວິທີການນໍາພາວຽກງານ ການເມືອງ-ແນວຄິດພາຍໃນແຂວງບໍ່ແກ້ວ. ມະຕິເລກທີ 25 ຂອງກົມການເມືອງສູນກາງພັກ ວ່າດ້ວຍການ ເພີ່ມທະວີ ການນຳພາຂອງພັກ ຕໍ່ວຽກງານວັດທະນະທຳໃນໄລຍະໃໝ່,ຜ່ານບົດສະຫຼຸບ ການຊີ້ນໍາ-ນໍາພາ ຮອບດ້ານ 6 ເດືອນຕົ້ນ ປີ ແລະ ທິດທາງແຜນການ 6 ເດືອນທ້າຍປີ 2021 ຂອງຄະນະບໍລິຫານງານພັກແຂວງ ສະໄໝທີ VI. ປະກອບຄໍາເຫັນ ຕໍ່ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ຕິດພັນກັບການຄຸ້ມຄອງການລົງທຶນ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍ ປີ 2021. ປະກອບຄໍາເຫັນການຈັດຕັ້ງປະຕິບັດງົບປະມານລາຍຮັບ-ລາຍຈ່າຍ 6 ເດືອນຕົ້ນປີ ແລະ ທິດທາງແຜນການ 6 ເດືອນ ທ້າຍ ປີ 2021.ປະກອບຄໍາເຫັນ ຕໍ່ກັບວຽກງານຕ້ານ ແລະ ສະກັດກັ້ນພະຍາດໂຄວິດ -19 ຕິດພັນກັບການປັບປຸງຄຸນະພາບດ້ານການບໍລິການຂອງແພດໝໍທົ່ວໄປ.

ພິທີໄດ້ຜ່ານມະຕິຕົກລົງຂອງກົມການເມືອງ ສູນກາງພັກ ວ່າດ້ວຍການຮັບອຸດໜຸນບຳນານ ຂອງພະນັກງານການນຳພ້ອມມອບເງິນນະໂຍບາຍຈຳນວນ 1 ສະຫາຍ ຄື: ສະຫາຍ ສົມລິດ ສີຜາວັນ ອາດີດຮອງເລຂາພັກແຂວງ, ອາດີດປະທານສະພາປະຊາຊົນແຂວງບໍ່ແກ້ວ ຊຸດທີ I ກ່າວມອບໂດຍ ທ່ານ ເຈົ້້າແຂວງໆບໍ່ແກ້ວ ແລະ ປະດັບຫຼຽນກາ 70 ປີຂອງກະຊວງປ້ອງກັນປະເທດໃຫ້ພະນັກງານການນຳແຂວງບໍ່ແກ້ວ ທີ່ມີຜົນງານຕະຫຼອດໄລຍະຜ່ານມາ ຈຳນວນ 18 ສະຫາຍ ກ່າວປະດັບ ແລະ ມອບຂອງ ສະຫາຍ ພັນເອກ ບຸນມີ ພາມີໄຊ ຄະນະປະຈຳພັກແຂວງ ຫົວໜ້າການເມືອງກອງບັນຊາການທະຫານ ແຂວງບໍ່ແກ້ວ,

ພ້ອມນັ້ນ ແຂວງບໍ່ແກ້ວ ໄດ້ມອບເງິນ, ຈຳນວນ 250 ລ້ານກີບໃຫ້ 5 ເມືອງ, ເມືອງລະ 50 ລ້ານກີບ ເງິນດັ່ງກ່າວ ແມ່ນໄດ້ຮັບການຊ່ວຍເຫຼືອ ແລະ ປຸກລະດົມຈາກສັງຄົມໄລຍະຜ່ານມາ, ເພື່ອເປັນກອງທຶນແກ້ໄຂຜົນກະຈາກໄພພິບັດທາງທຳມະຊາດຂອງບັນດາເມືອງ.

ສະຫາຍ ປອ ບົວຄົງ ນາມມະວົງ ກຳມະການສູນກາງພັກ ເລຂາພັກແຂວງ ເຈົ້າແຂວງໆບໍ່ແກ້ວ. ໄດ້ມີຄຳເຫັນໂອ້ລົມຮຽກຮ້ອງໃຫ້ຄະນະພັກທຸກຂັ້ນ ຈົ່ງສືບຕໍ່ເອົາໃຈໃສ່ນຳພາວຽກງານການເມືອງ-ແນວຄິດ, ອອກແຮງຈັດຕັ້ງຜັນຂະຫຍາຍມະຕິ XI ຂອງພັກ, ມະຕິ VI ຂອງແຂວງ ແລະ ແຜນພັດທະນາເສດຖະກິດ-ສັງຄົມ ທັງຫັນເປັນແຜນການ, ໂຄງການລະອຽດ ແລະ ຕັ້ງໜ້າຈັດຕັ້ງເຜີຍແຜ່ເຊື່ອມຊຶມ ແລະ ຍົກສູງຄວາມຮັບຜິດຊອບຈັດຕັ້ງປະຕິບັດຢ່າງເອົາຈິງເອົາຈັງ. ຕັ້ງໜ້າປັບປຸງແບບແຜນວິທີເຮັດວຽກໃຫ້ປອດໃສ,ເຂັ້ມແຂງ,ໜັກແໜ້ນ,ຊຸກຍູ້ການກໍ່ສ້າງພັກ,ກໍ່ສ້າງພະນັກງານ ໃຫ້ມີຄວາມຄຸນນະພາບສູງ.ສືບຕໍ່ກໍ່ສ້າງຮາກຖານການເມືອງຕາມ 4 ເນື້ອໃນ 4 ຄາດໝາຍຢ່າງມີປະສິດທິພາບສູງ; ເພີ່ມທະວີໃນການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາໃຫ້ໄດ້ຕາມຄາດໝາຍ; ສຸມໃສ່ສະກັດກັ້ນ ແກ້ໄຂປະກົດການຫຍໍ້ທໍ້ ແລະ ບັນຫາຢາເສບຕິດ ຢ່າງເປັນເຈົ້າການ ທີ່ເຂັ້ມງວດ ແລະ ເດັດຂາດ. ຖືສຳຄັນການນຳພາ ຕິດຕາກວດກາ, ຄຸ້ມຄອງ, ຊຸກຍູ້ການຈັດຕັ້ງປະຕິບັດບັນດາມະຕິ, ຄຳສັ່ງ ແລະ ນິຕິກຳທີ່ວາງອອກແຕ່ລະໄລຍະ,ທັງນຳພາສະຫຼຸບຖອດຖອນບົດຮຽນເປັນລະບົບ.ສືບຕໍ່ປຸກລະດົມ ແລະ ນຳໃຊ້ທຸກພາກສ່ວນເຂົ້າຮ່ວມເປັນເຈົ້າການຈັດຕັ້ງປະຕິບັດມະຕິ ແລະ ແຜນພັດທະນາຂອງແຂວງ, ຂອງເມືອງໃຫ້ບັນລຸຕາມແຜນການ.
ພາບ-ຂ່າວ: ຄຳພັນ ແກ້ວມະນີ