ໃນຕອນເຊົ້າຂອງວັນທີ 14 ກໍລະກົດ 2021 ຫ້ອງການສາທາລະນະສຸກເມືອງຕຸ້ມລານ ໄດ້ຈັດກອງປະຊຸມສະຫຼຸບວຽກງານສາທາລະນະສຸກຮອບດ້ານ ປະຈຳ 6 ເດືອນຕົ້ນປີ ແລະ ທິດທາງແຜນການການເຄື່ອນໄຫວ ປະຈຳ 6 ເດືອນທ້າຍປີ 2021. ເຊິ່ງຈັດຂຶ້ນຢູ່ທີ່ຫ້ອງປະຊຸມຂອງຫ້ອງການສາທາລະນະສຸກເມືອງ, ໃຫ້ກຽດເຂົ້າຮ່ວມຂອງ ທ່ານ ແສງອາລຸນ ອຸ່ນຄຳມະນີ ກຳມະການພັກເມືອງ ຮອງເຈົ້າເມືອງຕຸ້ມລານ ຜູ້ຊີ້ນຳວຽກງານວັດທະນະທຳ-ສັງຄົມ, ທ່ານ ດຣ. ວົງດາວ ສຸລິນທາ ຮອງຫົວໜ້າພະແນກສາທາລະນະສຸກແຂວງສາລະວັນ, ພາຍໃຕ້ການເປັນປະທານຂອງ ທ່ານ ສຸກສະຫວັນ ຈັນທະມຸ່ຍ ກໍາມະການພັກເມືອງ ຫົວໜ້າຫ້ອງການສາທາລະນະສຸກເມືອງ, ມີບັນດາທີມງານຈາກພະແນກສາທາລະນະສຸກແຂວງ, ຫ້ອງການອ້ອມຂ້າງເມືອງ, ອຳນວຍການໂຮງໝໍ, ໂຮງໝໍນ້ອຍ ຕະຫຼອດຮອດບັນດາແພດໝໍ ເຂົ້າຮ່ວມຢ່າງພ້ອມພຽງ.

ທ່ານ ກິລາ ນັນທິດາ ຫົວໜ້າໜ່ວຍງານບໍລິຫານ ໄດ້ຂຶ້ນຜ່ານຂໍ້ຕົກລົງຂອງທ່ານເຈົ້າເມືອງຕຸ້ມລານ, ສະບັບເລກທີ 175/ຈມ.ຕລ, ລົງວັນທີ 12 ກໍລະກົດ 2021 ວ່າດ້ວຍ: ອະນຸມັດໃຫ້ຫ້ອງການສາທາລະນະສຸກເມືອງຕຸ້ມລານ ເປີດກອງປະຊຸມສະຫຼຸບວຽກງານສາທາລະນະສຸກຮອບດ້ານ ປະຈຳ 6 ເດືອນຕົ້ນປີ ແລະ ທິດທາງແຜນການການເຄື່ອນໄຫວ ປະຈຳ 6 ເດືອນທ້າຍປີ 2021.

ຫຼັງຈາກນັ້ນ ທ່ານ ວັນວິໄລ ໃສນາລິວົງ ຮອງຫົວໜ້າຫ້ອງການສາທາລະນະສຸກເມືອງຕຸ້ມລານ ໄດ້ຂຶ້ນຜ່ານບົດສະຫຼຸບວຽກງານສາທາລະນະສຸກຮອບດ້ານ ປະຈຳ 6 ເດືອນຕົ້ນປີ ແລະ ທິດທາງແຜນການການເຄື່ອນໄຫວ ປະຈຳ 6 ເດືອນທ້າຍປີ 2021, ເຊິ່ງຕະຫຼອດໄລຍະ 6 ເດືອນຜ່ານມາມີຫຼາຍອັນທີເປັນພົ້ນເດັ່ນ ເປັນຕົ້ນແມ່ນ: ສຳເລັດການດຳເນີນຊີວິດການເມືອງ, ການເຊື່ອມຊຶ່ມມະຕິ XI ຂອງສູນກາງພັກ, ມະຕິ IX ຂອງອົງຄະນະພັກແຂວງສາລະວັນ ແລະ ມະຕິກອງປະຊຸມເປີດກວ້າງ ຄັ້ງທີ 6 ສະໄໝທີ X ຂອງອົງຄະນະພັກເມືອງ, ໄດ້ເອົາໃຈໃສ່ໃນການປະຕິບັດມາດຕະການປ້ອງກັນ, ສະກັດກັ້ນ, ຄວບຄຸ້ມ ແລະ ແກ້ໄຂການລະບາດຂອງພະຍາດໂຄວິດ-19 ໃນທົ່ວເມືອງ, ສາມາດກວດ-ວັດແທກອຸ່ນຫະພູມຄົນເຂົ້າ-ອອກເມືອງທັງໝົດ 3,668 ຄົນ, ຍິງ 601 ຄົນ, ໄດ້ຮັບວັກຊີນປ້ອງກັນພະຍາດໂຄວິດ-19, ຄັ້ງທີ 1 ເທົ່າກັບ 833 ໂດສ, ຄັ້ງທີ 2 ເທົ່າກັບ 1000 ໂດສ ແລະ ໄດ້ສັກເຂັມທີ 1 ປະຕິບັດໄດ້ 1,334 ຄົນ, ເທົ່າກັບ 100%, ເຂັມທີ 2 ປະຕິບັດໄດ້ 702 ຄົນ, ເທົ່າກັບ 53%, ວຽກງານການສັກຢາກັນພະຍາດຮອບປົກກະຕິຄາດໝາຍປີ 2021 ໃຫ້ໄດ້ 97,4%, ປະຕິບັດໄດ້ 53,18%, ວຽກງານໂພສະນາການສາມາດກັ່ນກອງເດັກນ້ອຍຂາດສານອາຫານ ໃນ 2 ຮອບຄື: ເດັກນ້ອຍອາຍຸ 6-11 ເດືອນ ປະຕິບັດໄດ້ 6,5%, ເດັກນ້ອຍອາຍຸ 1-5 ປີ, ປະຕິບັດໄດ້ 1,75%, ໄດ້ຮັບຮອງ 7 ບ້ານເປົ້າໝາຍເປັນບ້ານຊຸມຊົນເປັນເຈົ້າການດ້ານສຸຂະອານະໄມ (ຊຈສ) ແລະ ບ້ານສາທາລະນະສຸກແບບຢ່າງ (ບສບ), ປະຕິບັດ 11 ຕົວຊີບອກທີໄດ້ຮັບຮອງຈາກສະພາ ສ່ວນໃຫຍ່ມີທ່າອ່ຽງດີຂຶ້ນ ເປັນຕົ້ນແມ່ນ ອັດຕາການຕາຍຂອງແມ່, ອັດຕາການເກີດລູກໃນສະຖານທີບໍລິການ (ມີແພດຊ່ວຍ),

ນອກຈາກນັ້ນຍັງໄດ້ປັບປຸງຄຸນນະພາບການບໍລິການ, ການເຜີຍແຜ່ 5 ດີ 1 ພໍໃຈ ຢ່າງຕໍ່ເນື່ອງ. ສຳລັບທິດທາງແຜນການເຄື່ອນໄຫວ ປະຈຳ 6 ເດືອນທ້າຍປີ 2021 ແມ່ນສືບຕໍ່ປະຕິບັດ 8 ແຜນງານໃນການເຄື່ອນໄຫວວຽກງານສາທາລະນະສຸກ ເປັນຕົ້ນແມ່ນ ປັບປຸງ ແລະ ຍົກສູງຄຸນນະພາບຂອງຄວາມສາມາດກັນພະຍາດຮັກສາສຸຂະພາບໃຫ້ແກ່ພະນັກງານດ້ານການບໍລິການໃນແຕ່ລະຂັ້ນໃຫ້ມີຄຸນນະພາບ, ໃຫ້ຂໍ້ມູນຂ່າວສານດ້ານໂພສະນາການ ແລະ ການວາງແຜນຄອບຄົວສົມທົບກັບການປ້ອງກັນພະຍາດຕິດຕໍ່ທາງແພດສຳພັນ (ພຕພ), ໂລກແອດແກ່ແມ່ຍິງໄວຈະເລີນພັນ ແລະ ແມ່ມານໃຫ້ທົ່ວເຖິງ, ສືບຕໍ່ການລົງກະຕຸ້ນບ້ານວຽກງານຊຸມຊົນເປັນເຈົ້າການດ້ານສຸຂະອານະໄມ (ຊຈສ) ແລະ ຕິດຕາມປະເມີນຜົນບ້ານເກົ່າ ແລະ ບ້ານໃໝ່,

ສືບຕໍ່ລົງເຄື່ອນໄຫວການລົງສຳຫຼວດໜອນນ້ຳຍຸງລາຍໃຫ້ໄດ້ 3 ຄັ້ງ, ສືບຕໍ່ສ້າງຂະບວນການອະນາໄມ, ສຸຂະສຶກສາ ແລະ ແຈກຢາຍຢາໃຫ້ໄດ້ 1 ຄັ້ງ, ສືບຕໍ່ລົງກວດກາໂຮງງານນ້ຳດື່ມ-ຮ້ານອາຫານ ແລະ ເຄື່ອງດື່ມໃຫ້ໄດ້ 1 ຄັ້ງ ແລະ ສືບຕໍ່ລົງກວດກາຮ້ານຂາຍຢາທົ່ວເມືອງໃຫ້ໄດ້ 2 ຄັ້ງ. ພ້ອມດຽວກັນນີ້ຍັງໄດ້ມີການຜ່ານບົດບັນທືກການມອບ-ຮັບອຸດໜູນປິ່ນປົວສຸຂະພາບ ລະຫວ່າງຫ້ອງການປະກັນສຸຂະພາບແຫ່ງຊາດກະຊວງສາທາລະນະສຸກ ແລະ ກົມໃຫຍ່ການເມືອງປ້ອງກັນຄວາມສະຫງົບ, ສະບັບເລກທີ 1679/ຫກປຊ, ລົງວັນທີ 5 ກໍລະກົດ 2019, ໂອກາດດຽວກັນນີ້ໃນກອງປະຊຸມຍັງມີການແລກປ່ຽນບົດຮຽນເຊິ່ງກັນ ແລະ ກັນ ລະຫວ່າງທີມງານຈາກພະແນກສາທາລະນະສຸກແຂວງ, ຫ້ອງການສາທາລະນະສຸກເມືອງ ກັບ ບັນດາຫ້ອງການອ້ອມຂ້າງເມືອງ ເພື່ອເຮັດໃຫ້ວຽກງານທີຍັງຄົງຄ້າງໄດ້ຮັບການປັບປຸງ ແລະ ແກ້ໄຂໃຫ້ດີຂຶ້ນກວ່າເກົ່າ.

ຕອນທ້າຍຂອງກອງປະຊຸມ ຍັງໄດ້ມີການມອບໃບຍ້ອງຍໍ ບຸກຄົນ, ໂຮງໝໍນ້ອຍ ທີມີຜົນງານດີເດັ່ນໃນການເຄື່ອນໄຫວປະຕິບັດວຽກງານສາທາລະນະສຸກຮອບດ້ານໄລຍະ 1 ປີຜ່ານມາ, ທັງໝົດມີ 15 ທ່ານ, ຍິງ 7 ທ່ານ ແລະ 1 ໂຮງໝໍນ້ອຍ, ເຊິ່ງກ່າວມອບໂດຍແມ່ນ ທ່ານ ແສງອາລຸນ ອຸ່ນຄຳມະນີ ກຳມະການພັກເມືອງ ຮອງເຈົ້າເມືອງຕຸ້ມລານ ຜູ້ຊີ້ນຳວຽກງານວັດທະນະທຳ-ສັງຄົມ ຮັບ ໂດຍແມ່ນບຸກຄົນທີມີຜົນງານດີເດັ່ນຕາມລຳດັບ.

ພາບ-ຂ່າວ ໂດຍ: ວຽງສະຫວັນ ແສນຄຳ.