ເນື່ອງໃນໂອກາດກາດວັນອານຸລັກສັດນ້ຳ-ສັດປ່າແຫ່ງຊາດ ທີ 13 ກໍລະກົດ 2021 ນີ້ ມາໃນຕອນເຊົ້າ ວັນທີ 14 ກໍລະກົດນີ້ ຢູ່ທີ່ວັງອານຸລັກປາທຳມະຊາດ ບ້ານນາແລ ອົງການປົກຄອງເມືອງໄຊ ໄດ້ຈັດພິທີປ່ອຍປາຢ່າງເປັນທາງການ ໂດຍການເຂົ້າຮ່ວມເປັນກຽດຂອງທ່ານ ອ່ອນແກ້ວ ອຸ່ນອາລົມ ຮອງເຈົ້າແຂວງອຸດົມໄຊ, ພົມມະສຸກ ມອນຈັນດີ ຮອງເຈົ້າເມືອງໆໄຊ, ທ່ານ ຄຳພອນ ມູນລະໄມ ຫົວໜ້າພະແນກກະສິກຳ ແລະ ປ່າໄມ້ແຂວງ. ມີການນຳແຂວງ, ບັນດາພະແນກການ, ອົງການຈັດຕັ້ງອ້ອມຂ້າງແຂວງ, ບັນດາຫ້ອງການ, ອົງການຈັດຕັ້ງອ້ອມຂ້າງເມືອງໄຊ, ລັດວິສາຫະກິດ, ຫົວໜ່ວຍທຸລະກິດ, ອົງການຈັດຕັ້ງບ້ານຕະຫຼອດຮອດຊາວໜຸ່ມ-ເຍົາວະຊົນເຂົ້າຮ່ວມ.

        ທ່ານ ສຸລິຫວັດ ລັດຕະນະສິດທິ ຮອງຫົວໜ້າຫ້ອງການກະສິກຳ ແລະ ປ່າໄມ້ເມືອງໄຊ ໃຫ້ສຳພາດວ່າ ການຈັດພິທີປ່ອຍປາຄັ້ງນີ້ແມ່ນເພື່ອແນໃສ່ເປັນການຂະຫຍາຍພັນປາທຳມະຊາດເຂດດັ່ງກ່າວໃຫ້ຫຼາຍຂຶ້ນ

        ປາທີ່ນຳມາປ່ອຍໃນຄັ້ງນີ້ລວມມີປາປາກ, ປານິນ, ປາໄນ, ປາອິນເດຍ ແລະ ປາດຸກຈຳນວນໜຶ່ງ ລວມທັງໝົດສາມແສນກວ່າໂຕ ເຊິ່ງໄດ້ຮັບການສະໜັບສະໜູນຈາກຫຼາຍພາກສ່ວນທັງພາກລັດ ແລະ ຫົວໜ່ວຍທຸລະກິດຕ່າງໆອ້ອມຂ້າງເມືອງໄຊ. ໂອກາດດັ່ງກ່າວ ທ່ານ ສຸລິຫວັດ ລັດຕະນະສິດທິ ໄດ້ສະແດງຄວາມຂອບໃຈຕໍ່ທຸກພາກສ່ວນທີ່ໄດ້ໃຫ້ການສະໜັບສະໜູນແນວພັນປາທີ່ນຳມາປ່ອຍໃນຄັ້ງນີ້ ພ້ອມທັງຮຽກຮ້ອງໃຫ້ຊຸມຊົນຈົ່ງພ້ອມກັນຄຸ້ມຄອງ ແລະ ປົກປັກຮັກສາສັດນ້ຳ-ສັດປ່າໃຫ້ຍືນຍົງຕະຫຼອດໄປ

       ທ່ານ ສຸລິຫວັດ ລັດຕະນະສິດທິ ຮອງຫົວໜ້າຫ້ອງການກະສິກຳ ແລະ ປ່າໄມ້ເມືອງໄຊ ໃຫ້ຮູ້ອີກວ່ານອກຈາກການຈັດພິທີປ່ອຍຢູ່ຈຸດດັ່ງກ່າວແລ້ວ ເມືອງໄຊຍັງຈະນຳໄປປ່ອຍຢູ່ຈຸດວັງອານຸລັກພາຍໃນເມືອງໄຊຕື່ມອີກ 4 ຈຸດ ເຊິ່ງປີນີ້ ຈະປ່ອຍໃຫ້ໄດ້ທັງໝົດປະມານຫ້າແສນກວ່າໂຕ.

ພາບ-ຂ່າວ: ແສງອາທິດ