ເພື່ອຈັດຕັ້ງປະຕິບັດມະຕິ ຂອງກົມການເມືອງສູນກາງພັກ ເລກທີ 30; 31; 32; ແຈ້ງການແນະນຳຂອງກົມຈັດຕັ້ງ ແລະ ພະນັກງານ ກະຊວງການເງິນ ເລກທີ 0958/ກຈພ ແລະ ແລະ ແຈ້ງການຂອງຄະນະຈັດຕັ້ງແຂວງ ສະບັບເລກທີ 1075/ຄຈຂ, ລົງວັນທີ 10 ກັນຍາ 2020 ດັ່ງນັ້ນ ພະແນກການເງິນແຂວງອຸດົມໄຊ ຈື່ງໄດ້ຈັດກອງປະຊຸມຂື້ນ ໃນວັນທີ 15 ກໍລະກົດ ປີ 2021 ທີ່ຫ້ອງປະຊຸມຂອງພະແນກການເງີນແຂວງ ໂດຍ ມີທ່ານ ຄຳພຽງ ຢາຈົງວາ ຮອງເລຂາພັກແຂວງ ຜູ້ຊີ້ນຳວຽກງານພັກ-ພະນັກງານ ກໍ່ໄດ້ເປັນກຽດເຂົ້າຮ່ວມມີສະຫາຍ ປອ ສຸລິຍາ ສຸພິທັກ ກຳມະການພັກແຂວງ ເລຂາຄະນະພັກຮາກຖານພະແນກການເງິນ, ຫົວຫນ້າພະແນກການເງີແຂວງ, ມີຕາງຫນ້າຈາກກວດກາແຂວງ, ຄະນະຈັດຕັ້ງແຂວງ ພ້ອມດ້ວຍຄະນະພັກ  ພ້ອມດ້ວຍພະນັກງານ-ລັດຖະກອນເຂົ້າຮ່ວມຢ່າງພ້ອມພຽງ.

ເພື່ອວາງແຜນກຳນົດພະນັກງານນຳພາ-ຄຸ້ມຄອງ 5 ປີຕໍ່ໜ້າ (2021-2025) ພ້ອມທັງຮັບຟັງການລາຍງານຜົນຂອການຈັດຕັ້ງປະຕິບັດການ ແຜນກຳນົດພະນັກງານນຳພາຄຸ້ມຄອງໃນໄລຍະຜ່ານມາ ເຊີ່ງພະແນກການເງິນແຂວງອຸດົມໄຊ ເປັນພະແນກການໜຶ່ງ ທີ່ນອນຢູ່ໃນອົງປະກອບກົງຈັກການຈັດຕັ້ງ ຂອງອົງການປົກຄອງແຂວງ, ກະຊວງການເງິນ ແລະ ມີພາລະບົດບາດ ເປັນເສນາທິການຕໍ່ອົງການປົກຄອງແຂວງ ແລະ ກະຊວງການເງິນ ໃນການຈັດຕັ້ງປະຕິບັດວຽກງານການເງິນ-ງົບປະມານ ຕາມລະບຽບກົດໝາຍ ໃນໄລຍະ 5 ປິຜ່ານມາ ພະແນກການເງິນແຂວງ ກໍ່ໄດ້ປະສານສົມທົບກັບກະຊວງການເງິນ ທີ່ເປັນກະຊວງສາຍຕັ້ງ ແລະ ຄະນະປັບປຸງກົງຈັກການຈັດຕັ້ງ, ກຳນົດພະນັກງານນຳພາ-ຄຸ້ມຄອງຂັ້ນແຂວງ ໂດຍໄດ້ມີການຝືກອົບຮົມ ແລະ ດຳເນີນການຂຽນກຳນົດ ຕຳແໜ່ງງານພາຍໃນກົງຈັກການຈັດຕັ້ງຂອງພະແນກການເງິນ.

ພ້ອມດຽວກັນນັ້ນກໍ່ໄດ້ວາງແຜນກຳນົດພະນັກງານນຳພາ-ຄຸ້ມຄອງ ຂັ້ນຕຳແໜ່ງງານບໍລິຫານປະເພດ 3 ຫາປະເພດ 6 ສຳເລັດຕາມລະດັບຄາດຫມາຍ, ສັງລວມແລ້ວການກຳນົດ ແລະ ຈັດຕັ້ງປະຕິບັດແຜນກຳນົດພະນັກງານນຳພາ-ຄຸ້ມຄອງ ໃນໄລຍະທີ່ຜ່ານຂັ້ນ ຫົວໜ້າພະແນກ ແລະ ຮອງຫົວໜ້າພະແນກປະຕິບັດໄດ້ 100% ຂັ້ນຂະແໜງປະຕິບັດໄດ້ 100% ມີ 2 ຂະແໜງ ແລະ ຂະແໜງທີ່ປະຕິບັດບໍ່ໄປຕາມແຜນກຳນົດໄວ້ 3 ຂະແໜງ. ຕີລາຄາດ້ານດີ ດ້ານອ່ອນ ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ໃນໄລຍະຜ່ານມາ, ກອງປະຊຸມ ທ່ານນາງ ລີຈັນສີສຸທຳ ຮອງຫົວຫນ້າຄະນະຈັດຕັ້ງແຂວງ ກໍ່ໄດ້ຂື້ນເຜີຍແຜ່ເນື້ອໃນເອກະສານເຊື່ອມຊືມ ພ້ອມທັງຜ່ານມາດຖານເງື່ອນໄຂຂອງພະນັກງານທີ່ຈະຈັດວາງເຂົ້າໃນຕຳແໜ່ງງານຕ່າງໆ ເພື່ອໃຫ້ເໜາະສົມ ແລະ ສອດຄ່ອງກັບແນວທາງຂອງພັກຕື່ມອີກ.

ພາບ-ຂ່າວ: ແສງອາທິດ