ມີເດຍລາວແຂວງເຊກອງ (ຂ່າວ:ສີສັກດາ) ຫ້ອງການແຮງງານ ແລະສະຫວັດດີການ-ສັງຄົມ #ເມືອງດາກຈຶງ #ແຂວງເຊກອງ ມອບເງິນນະໂຍບາຍອຸນໜູນຕໍ່ຜູ້ທີ່ມີຜົນງານ ແລະຄຸນງາມຄວາມດີ ໃນພາລະກິດຮັບໃຊ້ການປະຕິວັດຊາດປະຊາທິປະໄຕໃນປາງສົງຄາມ ໃຫ້ແກ່ຄອບຄົວຜູ້ເສຍສະຫຼະຊີວິດ ແລະຜູ້ຍັງມີຊີວິດໄດ້ຈັດຂຶ້ນໃນຕອນບ່າຍຂອງວັນທີ 14 ກໍລະກົດ 2021 ນີ້ ທີ່ຫ້ອງການແຮງງານສະຫວັດດີການສັງຄົມເມືອງ, ໂດຍມີທ່ານ ແສງນາວັນ ໄຊພອນເຮືອງ ກຳມະການພັກເມືອງ ຫົວໜ້າຫ້ອງການແຮງງານ ແລະ ສະຫວັດດີການ-ສັງຄົມເມືອງດາກຈຶງເປັນຜູ້ກ່າວມອບ ແລະ ກ່າວຮັບແມ່ນຍາດຕິພີ່ນ້ອງຂອງຜູ້ເສຍສະຫຼະຊີວິດ ແລະ ຍັງມີຊີວິດປາງສົງຄາມໃນຈໍານວນ 6 ຄອບຄົວເປັນຜູ້ຮັບ, ຊຶ່ງມີຄະນະຫ້ອງການກ່ຽວຂ້ອງເຂົ້າຮ່ວມ.

ໃນການມອບ-ຮັບເງິນນະໂຍບາຍອຸດໜູນຄັ້ງນີ້ປະກອບມີຜູ້ເສຍສະຫຼະຊີວິດປາງສົງຄາມຈໍານວນ 4 ທ່ານ ແລະ ຍັງມີຊີວິດມີຈຳນວນ 2 ທ່ານ, ຊຶ່ງລວມເງິນທັງໝົດຈຳນວນ 150,227,400 ກີບ.

ພ້ອມກັນນີ້ທ່ານ ແສງນາວັນ ໄຊພອນເຮືອງ ກຳມະການພັກເມືອງຫົວໜ້າຫ້ອງການແຮງງານ ແລະ ສະຫວັດດີການ-ສັງຄົມໄດ້ກ່າວຕືມວ່າ: ຄອບຄົວທີ່ໄດ້ຮັບເງິນນະໂຍບາຍອຸດໜູນດັ່ງກ່າວແມ່ນຕ້ອງນໍາໃຊ້ເຂົ້າໃນການພັດທະນາຄອບຄົວໃຫ້ຖືກເປົ້າໝາຍ ແລະ ມີຜົນປະໂຫຍດຕໍ່ຄອບຄົວ ແລະ ສືບຕໍ່ຮັກສາມູນເຊື້ອຄຸນງາມຄວາມດີທີ່ໄດ້ເສຍສະຫຼະຊີວິດເພື່ອຊາດ ເພື່ອປະຊາຊົນໃນເມື່ອກ່ອນ, ສືບຕໍ່ປຸກລະດົມຊຸກຍູ້ລູກຫຼານ ແລະ ສັງຄົມເອົາໃຈໃສ່ເຮັດວຽກງານປົກປັກຮັກສາ ແລະ ສ້າງສາພັດທະນາປະເທດຊາດ, ບ້ານເກີດເມືອງນອນໃຫ້ໄດ້ຮັບການພັດທະນານັບມື້ມີຄວາມຈະເລີນກ້າວໜ້າດີຂຶ້ນເທື່ອລະກ້າວ.