ມີເດຍລາວແຂວງຫຼວງນ້ຳທາ ຂ່າວ: ສົມພອນ ຂຸນດາວົງ
ກໍາມະບານຮາກຖານພະແນກໂຍທາທິການ ແລະ ຂົນສົ່ງແຂວງຫຼວງນໍ້າທາ ເປີດຂະບວນການແຂ່ງຂັນ 5 ເປັນເຈົ້າ ໄດ້ຈັດຂື້ນໃນວັນທີ 15 ກໍລະກອນ 2021 ຢູ່ທີ່ຫ້ອງປະຊຸມພະແນກໂຍທາທິການ ແລະ ຂົນສົ່ງແຂວງ, ໂດຍການເປັນປະທານຂອງສະຫາຍ ຈັນທະຈອນ ແກ້ວລະກອນ, ເປັນກຽດເຂົ້າຮ່ວມຂອງສະຫາຍ ນາງ ປານີ ຈິດດາລາ ຄະນະບໍລິຫານງານສາຫະພັນກຳມະບານແຂວງ, ມີຄະນະພັກຮາກຖານພະແນກ ຍທຂ, ຄະນະກຳມະບານຮາກຖານ,ພ້ອມດ້ວຍສາມາຊິກກຳມະບານພາຍໃນຮາກຖານເຂົ້າຮ່ວມ:

ສະຫາຍ ຄໍາຜຸຍ ບົວທອງສະຫວ່າງ ຮອງກໍາມະບານຮາກຖານພະແນກໂຍທາທິການ ແລະ ຂົນສົ່ງແຂວງຫຼວງນໍ້າທາ ໄດ້ຜ່ານບົດແນະນໍາ ກ່ຽວກັບການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າຂອງສາຫະພັນກຳມະບານແຂວງ, ເພື່ອເສີມຂະຫຍາຍກຳລັງແຮງສັງລວມຂອງສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານລາວ ໃຫ້ມີສະຕິຕື່ນຕົວ, ເປັນເຈົ້າການໃນການພັດທະນາຕົນເອງຢ່າງຮອບດ້ານ ແລະ ຕັ້ງໜ້າເຂົ້າຮ່ວມຈັດຕັ້ງປະຕິບັດແນວທາງຂອງພັກ, ແຜນພັດທະນາເສດຖະກິດ-ສັງຄົມຂອງລັດ ໂດຍຜ່ານຂະບວນການແຂ່ງຂັນ 5 ເປັນເຈົ້າ ຂອງສະຫະພັນກຳມະບານລາວ; ເພື່ອເຮັດໃຫ້ສະມາຊິກກໍາມະບານ, ກຳມະກອນ ແລະ ຜູ້ອອກແຮງງານ ກໍາໄດ້ເນື້ອໃນ, ມາດຖານ, ບາດກ້າວໃນການຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າແນໃສ່ສ້າງຄວາມເປັນເອກະພາບໃນການນຳພາ-ຊີ້ນຳ, ຊຸກຍູ້, ຕິດຕາມ, ກວດກາ,

ປະເມີນຜົນການຈັດຕັ້ງປະຕິບັດ ເພື່ອເຮັດໃຫ້ຂະບວນການແຂ່ງຂັນ 5 ເປັນເຈົ້າ ຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ, ສ້າງໜ່ວຍພັກ ປອດໃສ ເຂັ້ມແຂງ ໜັກແໜ້ນ ແລະ ຕິດພັນກັບການປະຕິບັດວຽກງານວິຊາສະເພາະ , ໃນການພັດທະນາອົງການຈັດຕັ້ງ, ຫົວໜ່ວຍແຮງງານໃຫ້ເປັນຂະບວນການຟົດຟື້ນເລິກເຊິ່ງ, ກວ້າງຂວາງ, ຕໍ່ເນື່ອງ ແລະ ມີປະສິດທິຜົນ, ຖືເອົາການປະເມີນຜົນຂະບວນການແຂ່ງຂັນ 5 ເປັນເຈົ້າ, ເປັນບັ້ນດຳເນີນຊີວິດການເມືອງ ເພື່ອປັບປຸງ, ປົວແປງການຈັດຕັ້ງກຳມະບານໃຫ້ມີຄວາມໜັກແໜ້ນເຂັ້ມແຂງ ສາມາດຊອກໃຫ້ເຫັນສະມາຊິກກຳມະບານ, ກຳມະກອນ, ຜູ້ອອກແຮງງານທີ່ດີເດັ່ນ ເພື່ອຍ້ອງຍໍ ແລະ ສ້າງເປັນພະນັກງານສືບທອດປ່ຽນແທນ.

ໃຫ້ຕິດພັນກັບ ເນື້ອໃນ ແລະ ມາດຕະຖານ ຂໍ້ແຂ່ງຂັນ 5 ເປັນເຈົ້າເຊັ່ນ: ເປັນເຈົ້າການໃນການ ຝຶກຝົນຫຼໍ່ຫຼອມທາງດ້ານການເມືອງ-ແນວຄິດ, ເປັນເຈົ້າການປະຕິບັດກົດໝາຍ ແລະ ລະບຽບການຂອງລັດ,ເປັນເຈົ້າການ ໃນການພັດທະນາຕົນເອງ ແລະ ການຈັດຕັ້ງ. ເປັນເຈົ້າການ ປົກປ້ອງສິດ ແລະ ຜົນປະໂຫຍດອັນຊອບທຳ. ເປັນເຈົ້າການ ປະຕິບັດໜ້າທີ່ວິຊາສະເພາະ ຢ່າງປະດິດສ້າງ.

ສໍາລັບທິດທາງແຜນການເນື້ອໃນຂໍ້ແຂ່ງຂັນ 5 ເປັນເຈົ້າແຕ່ປີ 2021 ຫາ 2024 ແມ່ນຈະໄດ້ສູ້ຊົນ,ເປັນເຈົ້າການໃນການຝຶກຝົນຫຼໍ່ຫຼອມດ້ານການເມືອງ – ແນວຄິດໃຫ້ໄດ້ 95,1%, ປະຕິບັດກົດໝາຍ-ລະບຽບການຂອງລັດ 95,9%, ພັດທະນາຕົນເອງ ແລະ ການຈັດຕັ້ງ 95,2%, ປົກປ້ອງສິດຜົນປະໂຫຍດອັນຊອບທຳ 95,6%, ປະຕິບັດໜ້າທີ່ຢ່າງປະດິດສ້າງ 96% ,ມາດຖານສູ້ຊົນໃຫ້ໄດ້ 95,6% ແລະ ວຽກງານອື່ນໆທີ່ຕິດພັນກັບຂະບວນການກຳມະບານ 5 ເປັນເຈົ້າ.