ມີເດຍລາວແຂວງຈຳປາສັກ ຂ່າວ-ພາບ: ຖວທ ປະທຸມພອນ.
ເພື່ອສືບຕໍ່ຈັດຕັ້ງປະຕິບັດວຽກງານຄຸ້ມຄອງຕິດຕາມກວດກາສາງ ແລະ ການເຄື່ອນຍ້າຍສິນຄ້າ,ນໍ້າມັນເຊື້ອໄຟ-ອາຍແກັດ ແລະ ຈັດເກັບລາຍຮັບຈາກບັນດາຫົວໜ່ວຍທຸລະກິດດັ່ງກ່າວໃຫ້ໄດ້ປະສິດທິພາບ ແລະ ປະສິດທິຜົນ ແລະ ເພື່ອແກ້ໄຂບັນຫາຂໍ້ຄົງຄ້າງດ້ານຕ່າງໆ: ເປັນຕົ້ນການປະສານງານກັບພາກສ່ວນທີ່ກ່ຽວຂ້ອງ, ການຕິດຕາມກວດກາໃຫ້ເປັນລະບົບຕໍ່ເນື່ອງ ແລະ ຫຼີກລຽງການລັກລອບນໍາເຂົ້າ-ຈໍາໜ່າຍສິນຄ້າ,ນໍ້າມັນເຊື້ອໄຟ-ອາຍແກັດ.

ໃນວັນທີ 15 ກໍລະກົດ 2021 ນີ້ທີ່ສະໂມສອນເມືອງປະທຸມພອນ ໄດ້ເປີດກອງປະຊຸມເຜີຍແຜ່ແນະນໍາການຈັດຕັ້ງປະຕິບັດວຽກງານຄຸ້ມຄອງ, ຕິດຕາມ,ກວດກາສາງ ແລະ ເຄື່ອນຍ້າຍສິນຄ້າ,ນໍ້າມັນເຊື້ອໄຟ-ອາຍແກັດໃຫ້ພາກສ່ວນທຸລະກິດ ແລະ ສ່ວຍສາອາກອນປະຈໍາເມືອງປະທຸມພອນ.ໃຫ້ກຽດເຂົ້າຮ່ວມເປັນປະທານ ຂອງທ່ານ ບຸນຖອງ ສຸພາວົງ ຮອງເຈົ້າເມືອງໆປະທຸມພອນ ຜູ້ຊີ້ນໍາວຽກງານວັດທະນະທໍາ-ສັງຄົມ, ທ່ານ ຄໍາພູນ ເທບສຸວັນ ຫົວໜ້າສ່ວຍສາອາກອນ ປະຈໍາແຂວງຈໍາປາສັກ, ມີ ທ່ານ ໄຊຍະສິດ ອັກຄະວົງ ຫົວໜ້າຫ້ອງການໆເງິນເມືອງ, ທ່ານ ສຸກສາຄອນ ເຮືອງແພງດີ ຫົວໜ້າຫ້ອງການ ການຄ້າເມືອງ ແລະ ພະນັກງານຈາກຂະແໜງການກ່ຽວຂ້ອງຂອງແຂວງ ແລະ ເມືອງ ພ້ອມດ້ວຍນັກທຸລະກິດຜູ້ປະກອບການເຂົ້າຮ່ວມ.

ກອງປະຊຸມໄດ້ຮັບຟັງການຜ່ານເອກະສານດໍາລັດ ເລກທີ 331/ນຍ, ລົງວັນທີ 27 ຕຸລາ 2017 ວ່າດ້ວຍທຸລະກິດນໍ້າມັນເຊື້ອໄຟ,ຂໍ້ຕົກລົງເລກທີ 139/ຈມ,ປພ ວ່າດ້ວຍການແຕ່ງຕັ້ງປະສານງານກວດກາ ສາງຈໍາໜ່າຍ ແລະ ເຄື່ອນຍ້າຍນໍ້າມັນເຊື້ອໄຟ-ອາຍແກັດ ຜ່ານໂດຍທ່ານ ສຸກສາຄອນ ເຮືອງແພງດີ ; ເອກະສານແຈ້ງການ ເລກທີ 1626/ກງ,ລົງວັນທີ 30 ພຶດສະພາ 2019, ແຈ້ງການເລກທີ 0782/ກສອ ແລະ ຄໍາແນະນໍາເລກທີ 5029 / ກງ, ລົງວັນທີ 18 ທັນວາ 2019 ຜ່ານໂດຍ ທ່ານ ບຸນອ່ຽງ ພົມວິໄລ ສ່ວຍສາອາກອນ ປະຈໍາແຂວງຈໍາປາສັກ, ທັງໝົດນີ້ກໍ່ແມ່ນເພື່ອໃຫ້ນັກທຸລະກິດຮັບຮູ້ເຂົ້າໃຈ ແລະ ໃຫ້ຄວາມຮ່ວມມືໃນການຄຸ້ມຄອງ,ຕິດຕາມ,ກວດກາສິນຄ້າເຂົ້າ-ອອກສາງ,ການເຄື່ອນຍ້າຍ,ຕ້ອງກຳໄດ້ຈໍານວນນໍ້າມັນເຊື້ອໄຟແຕ່ລະຊະນິດ ມາຈາກໃສ,ຂອງບໍລິສັດໃດໃຫ້ລະອຽດຊັດເຈນເພື່ອສະດວກໃນການຄິດໄລ່ເກັບອາກອນລາຍໄດ້.