ມີເດຍລາວແຂວງສາລະວັນ ພາບ-ຂ່າວ: ທິດລານີ ໂຄດໂຍທາ. ກອງປະຊຸມສະຫຼຸບວຽກງານ ໄລຍະ 6 ເດືອນຕົ້ນປີ ແລະ ວາງທິດທາງແຜນການ 6 ເດືອນທ້າຍປີ 2021 ຂອງພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວແຂວງສາລະວັນ, ໄດ້ຈັດຂຶ້ນໃນວັນທີ 15 ກໍລະກົດ 2021, ຢູ່ທີ່ຫ້ອງປະຊຸມຂອງຕົນ ໂດຍການເປັນປະທານຂອງ ທ່ານ ມະໄລວອນ ສີປະເສີດ ກຳມະການພັກແຂວງຫົວໜ້າພະແນກ ຖວທ ແຂວງ, ມີບັນດາຄະນະພະແນກ, ບັນດາຫົວໜ້າ-ຮອງຂະແໜງການອ້ອມຂ້າງ ແລະ ພະນັກງານຫຼັກແຫຼ່ງ ເຂົ້າຮ່ວມ.

ກອງປະຊຸມຄັ້ງນີ້ ໄດ້ຍົກເອົາເນື້ອໃນບົດສະຫຼຸບການຈັດຕັ້ງປະຕິບັດວຽກງານພາຍໃນຂົງເຂດຖະແຫຼງຂ່າວ, ວັດທະນະທຳ ແລະ ວຽກງານທ່ອງທ່ຽວ ໃນໄລຍະ 6 ເດືອນຕົ້ນປີ 2021 ມາຄົ້ນຄວ້າ, ປະກອບຄໍາຄິດເຫັນ ເພື່ອເຮັດໃຫ້ເນື້ອໃນຮັດກຸມ, ເລີກເຊີ່ງ ແລະ ສອດຄ່ອງ ຖືກຕ້ອງຕາມຄວາມເປັນຈິງ ຢ່າງພາວະວິໄສ ແລະ ເປັນບ່ອນອິງໃຫ້ແກ່ການຈັດຕັ້ງປະຕິບັດອີກ 6 ເດືອນທ້າຍປີ, ທັງໄດ້ຕີລາຄາການຊີ້ນຳ-ນຳພາອັນລວມ, ອັນສະເພາະບັນດາໜ້າວຽກຂອງແຕ່ລະຂະແໜງການ, ກອງວິຊາການ ເພື່ອຊອກໄດ້ໝາກຜົນໃນການຈັດຕັ້ງປະຕິບັດ, ໃນດ້ານຕັ້ງໜ້າ, ຈຸດອ່ອນ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ເພື່ອຮ່ວມກັນຊອກວິທີທາງແກ້ໄຂໃນຕໍ່ໜ້າ. ພ້ອມທັງໄດ້ປະເມີນບັນດາໜ້າວຽກທີ່ໄດ້ຮັບຜົນສຳເລັດ ແລະ ບາງໜ້າວຽກ ບໍ່ບັນລຸຕາມແຜນການ ທີ່ວາງໄວ້ ຊອກຫາສາເຫດ ແລະ ເຫດຜົນທີ່ເຮັດໃຫ້ການຈັດຕັ້ງປະຕິບັດ ບໍ່ບັນລຸຕາມການ ທີ່ວາງໄວ້. ນອກນີ້, ເພື່ອຄວາມເປັນເອກະພາບບ, ເປັນບ່ອນອິງໃນແກ່ໃນການຈັດຕັ້ງປະຕິບັດໃນອີກ 6 ເດືອນທ້າຍປີ.

ໄລຍະ 6 ເດືອນຕົ້ນ ຜ່ານມາ ໄດ້ສຸມໃສ່ຈັດຕັ້ງປະຕິບັດໃນ 3 ໜ້າວຽກໃຫຍ່ ຄື: ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ໃນບັນດາ 7 ຂະແໜງການ, 4 ກອງວິຊາການ ເປັນຕົ້ນ: ດ້ານວຽກງານຖະແຫຼງຂ່າວ-ສື່ມວນຊົນ ເອົາໃຈໃສ່ໃນການໂຄສະນາເຜີຍແຜ່ແນວທາງນະໂຍບາຍຂອງພັກຂອງລັດ, ການພັດທະນາເສດຖະກິດ-ສັງຄົມ, ຍົກສູງຄວາມເປັນເຈົ້າການເຜີຍແຜ່ຂໍ້ມູນຂ່າວສານ ແລະ ການຈັດຕັ້ງປະຕິບັດມາດຕະການປ້ອງກັນພະຍາດໂຄວິດ-19, ຜ່ານສື່ໜັງສືພິມ, ວິທະຍຸ-ໂທລະພາບ ແລະ ສື່ອອນລາຍຕ່າງໆ.

ດ້ານວຽກງານວັດທະນະທໍາ ໄດ້ຊຸກຍູ້ ແລະ ຕິດຕາມການສ້າງຕົວແບບ, ສ້າງຄອບຄົວ ແລະ ບ້ານວັດທະນະທຳ, ນອກນັ້ນຍັງວຽກງານວິຈິດສິນ-ມໍລະດົກ, ຫໍພິພິທະພັນ ທີ່ໄດ້ເກັບກຳຂໍ້ມູນ, ຮີບໂຮມ ວັດຖຸເກົ່າແກ່ບູຮານ ແລະ ວຽກງານອື່ນໆ. ສຳລັບວຽກງານທ່ອງທ່ຽວ ໄລຍະ 6 ເດືອນຕົ້ນປີ ມີນັກທ່ອງທ່ຽວມາທ່ຽວແຂວງສາລະວັນ 17 ພັນກວ່າຄົນ ທຽບໃສ່ແຜນປີ ປະຕິບັດໄດ້ 32,36%, ທັງໄດ້ຕິດຕາມ, ກວດກາ ບັນຫາຫົວໜ່ວຍບໍລິການ ທີ່ໄດ້ຄຸ້ມຄອງ ປະຕິບັດມາດຕະການປ້ອງກັນພະຍາດໂຄວິດ-19 ຢ່າງເຂັ້ມງວດ ຕາມຄໍາສັ່ງ 15/ນຍ ແລະ ຂັ້ນແຂວງ ຢ່າງເປັນເຈົ້າການ ໂດຍສະເພາະການປິດຮ້ານບໍລິການກິນດື່ມ, ຮ້ານບັນເທີງ-ຄາຣາໂອເກະ, ໂຮງແຮມ, ເຮືອນພັກ ແລະ ອື່ນໆ, ທັງໄດ້ກຽມແຜນຈັດຝຶກອົບຮົມ ກ່ຽວກັບທຸລະກິດທ່ອງທ່ຽວສະອາດ-ປອດໄພຈາກໂຄວິດ-19.