ມີເດຍລາວແຂວງຫຼວງພະບາງ ໂດຍ: ໄຊຍະສອນ ລັດຕະນະວົງພິທີປາຖະກະຖາວັນສ້າງຕັ້ງສະຫະພັນແມ່ຍິງລາວຄົບຮອບ 66 ປີ( 20 ກໍລະກົດ 1955 – 20 ກໍລະກົດ 2021 ) ໄດ້ຈັດຂື້ນໃນຕອນບ່າຍຂອງວັນທີ 15 ກໍລະກົດ 2021 ນີ. ທີ່ສະໂມສອນຂອງກອງບັນຊາການ ໂດຍການເປັນປະທານ ແລະ ປາຖະກະຖາຂອງສະຫາຍ ພັນເອກ ສີວິໄຊ ເພັງສັນຕິສຸກ ສະມາຊິກສະພາແຫ່ງຊາດ ຄະນະປະຈໍາພັກ ຮອງກອງບັນຊາການ ຫົວໜ້າຫ້ອງການເມືອງທະຫານແຂວງຫຼວງພະບາງ, ມີສະຫາຍ ພັນໂທ ນາງສີດາ ພົມມະຈັນ ຄະນະບໍລິຫານງານສະຫະພັນແມ່ຍິງແຂວງ ຫົວໜ້າພະແນກສະຫະພັນແມ່ຍິງທະຫານແຂວງ, ມີຄະນະພັກ – ຄະນະບັນຊາ 5 ຫ້ອງຕະຫຼອດເອື້ອຍນ້ອງແມ່ຍິງກົມກອງອ້ອມຂ້າງເຂົ້າຮ່ວມຮັບຟັງ.

ການປາຖະກະຖາແມ່ນໄດ້ຍົກໃຫ້ເຫັນເຖິງປະຫັວດມູນເຊື້ອການກໍາເນີດ, ເຕີບໃຫ່ຍຂະຫຍາຍຕົວ ແລະ ຜົນງານການເຄື່ອນໄຫວຂອງອົງການຈັດຕັ້ງສະຫະພັນແມ່ຍິງລາວບັນດາເຜົ່າຄົນຮຸ່ນກ່ອນທີ່ໄດ້ອຸທິດຕົນເພື່ອພາລະກິດຕໍ່ສູ້ປົດປ່ອຍຊາດ, ປົກປັກຮັກສາ ແລະ ສ້າງສາພັດທະນາປະເທດຊາດ ກໍ່ຄືພາລະກິດພັດທະນາແມ່ຍິງຕະຫຼອດໄລຍະ 66 ປີຜ່ານມາ.

ເຊິ່ງໃນເມື່ອກ່ອນເອື້ອຍນ້ອງແມ່ຍິງລາວເຮົາແມ່ນໄດ້ປະກອບສ່ວນອຸທິດເຫື່ອແຮງສະຕິປັນຍາເຂົ້າໃນພາລະກິດຕໍ່ສູ້ກູ້ຊາດ, ຄຽງບ່າ, ຄຽງໄຫຼ່ກັບເພດຊາຍດ້ວຍຄວາມອົງອາດກ້າຫານມາຮອດວັນທີ 20 ກໍລະກົດ 1955 ພັກໄດ້ສ້າງຕັ້ງໜ່ວຍຄົ້ນຄ້ວາແມ່ຍິງຂື້ນ ເຊິ່ງກາຍເປັນຕົ້ນກໍາເນີດຂອງອົງການຈັດຕັ້ງສະຫະພັນແມ່ຍິງລາວໃນປັດຈຸບັນ, ກາຍເປັນຂີດໝາຍສໍາຄັນເພື່ອນໍາພາແມ່ຍິງໃນທົ່ວປະເທດປະກອບສ່ວນເຂົ້າໃນພາລະກິດຕໍ່ສູ້ປົດປ່ອຍຊາດ, ແມ່ຍິງຈໍານວນບໍ່ໜ້ອຍຖືກສັດຕູຈັບຄຸມຂັງທຸບຕີທໍລະມານຖືກບັງຄັບໃຫ້ໄຂຄວາມລັບແຕ່ດ້ວຍຈິດໃຈຮັກຊາດແມ່ຍິງລາວເດັດຂາດບໍ່ຍອມຈໍານົນ, ບໍ່ຍອມໄຂຄວາມລັບ, ເດັດດ່ຽວຕໍ່ສູ້ຢ່າງພິລະອາດຫານ, ອັນໄດ້ເຮັດໃຫ້ແມ່ປ້ານ້າອາຂອງແມ່ຍິງລາວໄດ້ຮັບນາມມະຍົດເປັນວິລະຊົນແຫ່ງຊາດ, ນັກຮົບແຂ່ງຂັນ ແລະ ໄດ້ຂັດເລືອກເປັນແບບຢ່າງທີ່ດີເດັ່ນປະກອບສ່ວນເຂົ້າໃນຂົງເຂດວຽກງານຕ່າງໆ

ພ້ອມທັງໄດ້ຮັບການຍ້ອງຍໍຈາກພັກ ແລະ ລັດຖະບານໃນຫຼາຍລະດັບ, ພາຍຫຼັງປະເທດຊາດໄດ້ຮັບການປົດປ່ອຍແມ່ຍິງລາວບັນດາເຜົ່າໄດ້ສືບຕໍ່ເສີມຂະຫຍາຍທາດແທ້ມູນເຊື້ອອັນສະຫ່ງາງາມ ແລະ ຕັ້ງໜ້າປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ພາຍໃຕ້ການນໍາພາຂອງພັກ – ລັດ ແມ່ຍິງລາວໃນຂອບເຂດທົ່ວປະເທດສາມາດຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ການເມືອງຂອງຕົນພ້ອມທັງຜັນຂະຫຍາຍມະຕິກອງປະຊຸມໃຫ່ຍຜູ້ແທນແມ່ຍິງລາວແຕ່ລະຄັ້ງມາເປັນແຜນງານ, ໂຄງການຢ່າງລະອຽດ ແລະ ໄດ້ຮັບຜົນສໍາເລັດເປັນແຕ່ລະໄລຍະຈົນເຖິງປັດຈຸບັນ.