ມີເດຍລາວແຂວງຫຼວງພະບາງ ຂ່າວ: ເມືອງປາກອູ ວັນທີ 13 ກໍລະກົດ 2021 ນີ້, ສະຫະພັນແມ່ຍິງເມືອງປາກອູ ແຂວງຫຼວງພະບາງ ໄດ້ຮ່ວກັນອະນາໄມ ແລະເກັບຂີ້ເຫຍື້ອຢູ່ພາຍໃນເທດສະບານ ແລະສໍານັກງານເມືອງ ໂດຍການນໍາພາຂອງ ທ່ານ ນາງ ສຸກສະຫວັນ ສີສຸພັນທອນ ກໍາມະການພັກເມືອງ ປະທານສະຫະພັນແມ່ຍິງເມືອງປາກອູ, ສະມາຊິກສະພາປະຊາຊົນແຂວງຫລວງພະບາງ.ມີສະມາຊິກສະຫະພັນແມ່ຍິງໜ່ວຍສໍານັກເມືອງ ແລະ ໜ່ວຍບ້ານສົມສະນຸກເຂົ້າຮ່ວມສ້າງຂະບວນການອອກແຮງງານທັງໝົດ 271 ຄົນ.

ການອອກແຮງງານອະນາໄມເກັບຂີ້ເຫຍື້ອມີ 4 ຈຸດຄື. ຈຸດທີ 1 ແມ່ນເກັບຂີ້ເຫຍື້ອລຽບສອງຟາກທາງ 13 ເໜືອເລີ່ມຈາກຫ້ອງການຕໍ່າຫລວດໄປຮອດຫ້ອງການສຶກສາທິການ ແລະກິລາເມືອງປາກອູເຊິ່ງມີໄລຍະຍາວ 1 ກິໂລແມັດ,ຈຸດທີ 2 ແມ່ນເກັບຂີ້ເຫຍື້ອລຽບສອງຟາກທາງ 13 ເໜືອເລີ້ມຈາກຫ້ອງການຊັບພະຍາກອນທໍາມະຊາດ ແລະສິ່ງແວດລ້ອມໄປຮອດສົ້ນຂົວນໍ້າອູ ມີໄລຍະຍາວ 600 ແມັດກວ່າ, ຈຸດທີ 3 ແມ່ນເກັບຂີ້ເຫຍື້ອລຽບສອງຟາກທາງເລີ້ມຈາກຫ້ອງການຊັບພະຍາກອນທໍາມະຊາດ ແລະສິ່ງແວດລ້ອມ ໄປຮອດລະບຽງລົມມີໄລຍະຍາວ 650 ແມັດກວ່າ ແລະຈຸທີ 4 ແມ່ນເກັບຂີ້ເຫຍື້ອລຽບສອງຟາກທາງເລີ່ມຈາກຫ້ອງການຕໍາຫລວດໄປຮອດໂຮງໝໍ ເມືອງປາກອູ, ມີໄລຍະຍາວ 700 ກວ່າແມັດ. ການອອກແຮງງານລວມ ຄັ້ງນີ້ ກໍ່ເພື່ອເຮັດໃຫ້ສອງຟາກທາງຢູ່ເທດສະບານເມືອງ ແລະສໍານັກງານເມືອງປາກອູ, ມີຄວາມສະອາດງາມຕາ ແລະເປັນລະບຽບຮຽບຮ້ອຍດີ, ທັງເປັນການສ້າງຂະບວນການຂໍານັບຮັບຕ້ອນວັນສ້າງຕັ້ງສະຫະພັນແມ່ຍິງລາວຄົບຮອບ 66 ປີ ແລະວັນສໍາຄັນອື່ນໆຂອງຊາດ ທີ່ຈະມາເຖິງໃນມໍ່ໆນີ້.