ມີເດຍລາວແຂວງວງພະບາງ ພາບ-ຂ່າວໂດຍ: ດາວອນ ມະນີວັນ
ໃນວັນທີ 16 ກໍລະກົດ 2021 ຄະນະກວດກາພັກ-ລັດແຂວງຫຼວງພະບາງ ໄດ້ລົງຊີ້ນໍາວຽກງານກວດກາ ຢູ່ພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວ ແຂວງຫຼວງພະບາງ ນຳໂດຍ ທ່ານ ຄຳຫຼ້າ ລຽນປະດິດ ກຳມະການປະຈຳພັກແຂວງ ຫົວໜ້າຄະນະກວດກາພັກ-ລັດແຂວງ ເຂົ້າຮ່ວມມີ ທ່ານ ປອ ນາງ ສຸດາພອນ ຄົມທະວົງ ກຳມະການພັກແຂວງ ຫົວໜ້າພະແນກ ຖະແຫຼງຂ່າວ, ວັດທະນະທໍາ ແລະທ່ອງທ່ຽວ ພ້ອມດ້ວຍຫົວໜ້າ, ຮອງຫົວໜ້າຂະແໜງການ, ກອງວິຊາການ ພາຍໃນພະແນກ ຖວທ ເຂົ້າຮ່ວມ.

ຈຸດປະສົງການລົງມາຄັ້ງນີ້ກໍເພື່ອປະຕິບັດຕາມກົດລະບຽບ ຂອງພັກປະຊາຊົນປະຕິວັດລາວສະໄໝທີ X ກໍຄືການຈັດຕັ້ງຜັນຂະຫຍາຍວຽກງານກວດກາຂອງພັກ ທີ່ໄດ້ກຳນົດໃນລະບຽບຂອງພັກ, ເພື່ອຜັນຂະຫຍາຍມະຕິກອງປະຊຸມໃຫຍ່ ຄັ້ງທີ VIII ຂອງອົງຄະນະພັກແຂວງ, ປະຕິບັດຕາມແຜນການເຄື່ອນໄຫວ ເລກທີ 39 ຄະນະປະຈຳພັກແຂວງ ວ່າດ້ວຍການຈັດຕັ້ງ ແລະການເຄື່ອນ ໄຫວຂອງຄະນະກວດກາແຂວງ, ເພື່ອເປັນການແລກປ່ຽນໃນການຊີ້ນຳ-ນຳພາຂອງຄະນະໜ່ວຍພັກ-ຄະນະພະແນກ ຖທວ ຕໍ່ວຽກງານວິຊາສະເພາະໃນແຕ່ລະຂະແໜງການໃນໄລຍະ 1 ປີຜ່ານມາ ເພື່ອເປັນການສະແດງໃຫ້ເຫັນຜົນງານທີ່ພົ້ນເດັ່ນ, ຂໍ້ຄົງຄ້າງ ແລະວິທີແກ້ໄຂໃນຕໍ່ໜ້າ, ທັງເປັນການຊຸກຍູ້ຕິດຕາມ, ກວດກາພະແນກ ຖວທ ໃຫ້ມີການເຄື່ອນໄຫວຖືກຕ້ອງ ແລະເປັນປົກກະຕິ ຕາມພາລະບົດບາດ, ສິດໜ້າທີ່ ແລະຄວາມຮັບຜິດ ຊອບຂອງຕົນ.