ມີເດຍລາວແຂວງຫົວພັນ ໂດຍ : ຊຽງແພງສີ ພົນມາລາ ຖ ວ ທ ເມືອງວຽງໄຊ
ໃນວັນທີ 14 ກໍລະກົດ 2021 ຜ່ານມານີ້ ໂຮງຮຽນການເມືອງ – ການປົກຄອງແຂວງຫົວພັນ ໄດ້ຈັດພິທີເປີດຊຸດຮຽນທິດສະດີການເມືອງ – ການປົກຄອງລະບົບຊັ້ນກາງຮຸ່ນທີ 14 ສົກປີ 2021 – 2022 ຂື້ນຢ່າງເປັນທາງການ ຢູ່ທີ່ສະໂມສອນໂຮງຮຽນ ການເມືອງ – ການປົກຄອງ ແຂວງຫົວພັນ ໂດຍການເປັນກຽດເປັນປະທານຂອງ ທ່ານ ເພີດ ມາປັນຍາ ຮອງເລຂາພັກແຂວງ ຜູ້ຈຳການ ຊີ້ນຳວຽກງານແນວຄິດທິດສະດີ ພັກ-ພະນັກງານຂັ້ນແຂວງ, ມີຫົວໜ້າຄະນະອຳນວຍການ ໂຮງຮຽນການເມືອງ – ການປົກຄອງແຂວງຫົວພັນ, ແຂກຖືກເຊີນ ຈາກພະແນກການອ້ອມຂ້າງແຂວງ, ເມືອງ, ຂະແໜງການໃກ້ຄຽງ, ອານຈານສອນ ຕະຫຼອດຮອດນັກສຶກສາຮຸ່ນທີ 13, 14 ເຂົ້າຮ່ວມ;

ໃນພິທີຄະນະຮັບຜິດຊອບໄດ້ຜ່ານບັນດາເອກະສານ ມະຕິຕົກລົງອະນຸມັດເປີດຮຽນ, ມະຕິແຕ່ງຕັ້ງອາຈານສອນ, ມະຕິອະນຸມັດສົ່ງພະນັກງານມາຮຽນ; ຈາກນັ້ນທ່ານ ນ. ແຍງເພັດ ບຸນມີໄຊ ອຳນວຍການໂຮງຮຽນ ການເມືອງ – ການປົກຄອງ ແຂວງຫົວພັນ ຍັງໄດ້ຜ່ານແຜນການຮຽນ – ການສອນ ທິດສະດີການເມືອງ – ການປົກຄອງລະບົບຊັ້ນກາງຮຸ່ນທີ 14 ສົກປີ 2021-2022 ໃຫ້ຮູ້ວ່າ : ຊຸດຮຽນດັ່ງກ່າວນີ້ ຕາມຫຼັກສູດການຮຽນ – ການສອນ ແລະ ຕາມຄວາມສາມາດຕົວຈີງຂອງໂຮງຮຽນຮຸ່ນທີ 14 ມີ ນັກສຶກສາທັງໝົດ 50 ທ່ານ, ຍີງ 17 ທ່ານ, ມີອານຈານສອນ 36 ທ່ານ, ຍີງ 9 ທ່ານ ມີຈຳນວນ 80 ໜ່ວຍກິດ ເທົ່າກັບ 1,280 ຊົ່ວໂມງ ບໍ່ນັບເວລາເຄື່ອນໄຫວນອກຫຼັກສູດ ແລະ ມີ 28 ວິຊາຮຽນ ແບ່ງເປັນ 3 ໝວດວິຊາຄື: ໝວດວິຊາຄວາມຮູ້ທົ່ວໄປ, ໝວດວິຊາເຕັກນິກທົ່ວໄປ, ໝວດວິຊາສະເພາະ ທັງນີ້ກໍ່ເພື່ອເຮັດໃຫ້ ການສ້າງພະນັກງານນຳພາຄຸ້ມຄອງ, ພະນັກງານສືບທອດປ່ຽນແທນ ຢູ່ບັນດາອົງການຈັດຕັ້ງພັກ – ລັດ ແລະ ອົງການຈັດຕັ້ງມະຫາຊົນຂັ້ນແຂວງ, ເມືອງ, ຮາກຖານທີ່ພວມດຳລົງຕຳແໜ່ງ, ມີຄວາມຮູ້ເລິກເຊິ່ງ ກ່ຽວກັບທິດສະດີ ມາກ – ເລນິນ ຍົກລະດັບຄວາມຮູ້ຄວາມສາມາດ ທາງດ້ານທິດສະດີການເມືອງ ແລະ ການປົກຄອງ ແນວຄິດໄກສອນ ພົມວິຫານ ແນວທາງນະໂຍບາຍຂອງພັກ ລະບຽບກົດໝາຍຂອງລັດ, ຕິດພັນກັບພຶດຕິກຳ ເຮັດໃຫ້ພະນັກງານມີແນວຄິດຫຼັກໝັ້ນຊົນຊັ້ນກຳມະກອນ ເຊື່ອໝັ້ນຕໍ່ການນຳພາຂອງພັກ-ລັດ ເຂົ້າໃນວຽກງານຕົວຈີງໃຫ້ມີຜົນສຳເລັດ


ຕອນທ້າຍທ່ານປະທານກໍ່ຍັງໄດ້ໃຫ້ກຽດມີຄຳຄິດຄຳເຫັນໂດຍທ່ານໄດ້ເໜັ້ນໜັກຫຼາຍບັນຫາທີ່ສຳຄັນຍົກໃຫ້ເຫັນຄວາມໝາຍຄວາມສຳຄັນຂອງການຍົກລະດັບທິດສະດີການເມືອງການປົກຄອງ, ສະພາບລວມຂອງລະບອບການເມືອງຂອງໂລກ, ຜົນກະທົບທາງກົງ ແລະ ທາງອ້ອມຕໍ່ສະພາບການລະບາດຂອງພະຍາດທີ່ກໍາລັງຄຸກຄາມໃນປັດຈຸບັນ, ປະກົດການຫຍໍ້ທໍ້ທີ່ເກີດຂື້ນໃນສັງຄົມ, ການຜັນຂະຫຍາຍມະຕິ XI ຂອງສູນກາງພັກ, ມະຕິ X ຂອງອົງຄະນະພັກ ແຂວງຫົວພັນ, ຮຽກຮ້ອງໃຫ້ຄະນະພັກອຳນວຍການໂຮງຮຽນ, ຄູອາຈານ ແລະ ນັກສຶກສາ ເອົາໃຈໃສ່ໃນການຮຽນ, ການສອນ, ຖອດຖອນບົດຮຽນ, ຊ່ວຍເຫຼືອເຊິງກັນ ແລະ ກັນ ໃຫ້ໄດ້ທັງປະລິມານ ແລະ ຄຸນນະພາບ ປະສົບຜົນສຳເລັດຕາມລະດັບຄາດໝາຍທີ່ວາງໄວ້.