ໃນວັນທີ 15-16 ກໍລະກົດ 2021 ທີ່ຜ່ານມານີ້, ທາງຫ້ອງການຍຸຕິທໍາເມືອງ ໄດ້ລົງປະກາດມອບ-ຮັບໃບຢັ້ງຢືນຄອບຄົວ ແລະ ບ້ານແບບຢ່າງປະຕິບັດກົດໝາຍ 3 ບ້ານຄື: ບ້ານນາລຳ, ບ້ານຫ້ວຍບານ ແລະ ບ້ານຝິ່ນຫໍ, ກຸ່ມບ້ານນາລຳ, ເມືອງໃໝ່, ແຂວງຜົ້ງສາລີ ໂດຍເປັນກຽດເຂົ້າຮ່ວມຂອງທ່ານ ທອງຄູນ ໄຊນະຄອນ ຮອງເລຂາພັກເມືອງ, ປະທານກວດກາພັກ-ລັດເມືອງ, ຜູ້ຊີ້ນຳຂົງເຂດປົກປ້ອງກົດໝາຍຂັ້ນເມືອງ, ມີທ່ານ ນາງ ຄຳຫຼ້າ ຈັນຖະກອນ ກຳມະການພັກເມືອງ, ຫົວໜ້າຫ້ອງການຍຸຕິທໍາ ພ້ອມດ້ວຍເລຂາພັກ-ນາຍບ້ານຕະຫຼອດຮອດພໍ່ແມ່ປະຊາຊົນພາຍໃນບ້ານເຂົ້າຮ່ວມຢ່າງພ້ອມພຽງ

ຊຶ່ງຕະຫຼອດໄລຍະ 1 ປີທີ່ຜ່ານມາ ແຕ່ລະບ້ານໄດ້ເອົາໃຈໃສ່ໃນການກໍ່ສ້າງຄອບຄົວ ແລະ ບ້ານແບບຢ່າງປະຕິບັດກົດໝາຍ ຕາມຂໍ້ຕົກລົງຂອງກະຊວງຍຸຕິທຳ ສະບັບເລກທີ 1399/ກຍ, ລົງວັນທີ 7 ທັນວາ 2017 ໂດຍປະຕິບັດຕາມ 5 ມາດຖານຂອງຄອບຄົວ, 6 ມາດຖານຂອງບ້ານໂດຍສະເພາະແມ່ນການເຄົາລົບ ແລະ ຈັດຕັ້ງປະຕິບັດລະບຽບຂອງບ້ານ, ກົດໝາຍຂອງລັດວາງອອກ, ເຮັດໃຫ້ປະຊາຊົນຢູ່ພາຍໃນບ້ານມີຄວາມສະຫງົບໂດຍພື້ນຖານ

ໃນຕອນທ້າຍ ທ່ານ ທອງຄູນ ໄຊຍະຄອນ ກໍໄດ້ເນັ້ນໜັກໃຫ້ຫ້ອງການຍຸຕິທໍາ, ນາຍບ້ານ ແລະ ພໍ່ແມ່ປະຊາຊົນແຕ່ລະບ້ານຕ້ອງເອົາໃຈໃສ່ ໃນການປົກປັກຮັກສາຄອບຄົວ ແລະ ບ້ານແບບຢ່າງຂອງຕົນໄວ້ຢາງຍື່ນຍົງຕະຫຼອດໄປ.

ພາບຂ່າວ: ນາງ ຄຳຫລ້າ ຫ້ອງການ ຖວທ ເມືອງໃຫມ່ແຂວງຜົ້ງສາລີ