ມີເດຍລາວແຂວງເຊກອງ ຂ່າວ-ພາບ: ແດນວົງວິຈິດ ໃນກາງເດືອນ ກໍລະກົດ 2021 ນີ້,ທ່ານ ໜູລາ ຢາປະລອງຮັງ ຮອງຫົວໜ້າພະແນກອຸດສະຫະກຳ – ການຄ້າແຂວງເຊກອງພ້ອມພະນັງານວິຊາການໄດ້ລົງເຄື່ອນໄຫວກວດກາວັດແທກກົງເຕີນໍ້າ ແລະ ໄຟຟ້າຢູ່ເມືອງທ່າແຕງ ເພື່ອສະກັດກັ້ນຫາງສຽງຈົ່ມວ່າຂອງຜູ້ຊົມໃຊ້ ໂດຍມີທ່ານ ສຸພົນ ໄຊສະຫງ່າ ຮອງເຈົ້າເມືອງໆທ່າແຕງແລະພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ໜູລາ ຢາປະລອງຮັງ ຮອງຫົວໜ້າພະແນກອຸດສະຫະກຳ-ການຄ້າແຂວງເຊກອງກ່າວວ່າ: ໄລຍະຜ່ານມາການຊົມໃຊ້ນ້ຳປະປາ ແລະ ໄຟຟ້າແມ່ນຄິດໄລ່ລາຄາເກີນຄວາມເປັນຈິງເນື່ອງຈາກການວັດແທກກົງເຕີນ້ຳ ແລະ ກົງເຕີໄຟຟ້າບໍ່ໄດ້ມາດຕະຖານ ແລະ ເກີດມີການເອົາລັດເອົາປຽບລະຫ່ວາງຜູ້ໃຫ້ບໍລິການ ແລະ ຜູ້ຊົມໃຊ້ເປັນຕົ້ນໃຊ້ນ້ຳນ້ອຍແຕ່ກົງເຕີວັດແທກນ້ຳແລ່ນຂຶ້ນສູງ ແລະ ໄຟຟ້າກໍເຊັ່ນດຽວກັນໂດຍປະເດັນດັ່ງກ່າວນີ້ເຫັນວ່າບໍເທົ່າທຽມແລະບໍເປັນທຳ,ສະນັ້ນເພື່ອສະກັດກັ້ນບໍ່ໃຫ້ເກີດມີບັນຫາດັ່ງກ່າວພະແນກອຸດສະຫະກຳ – ການຄ້າແຂວງເຊກອງໃນນາມຜູ້ຮັບຜິດຊອບມາດຖານວັດແທກ ຊັບສິນທາງປັນຍາຈິ່ງຮີບຮ້ອນລົງແກ້ໄຂໃຫ້ທັນການໂດຍເລັ່ງໃສ່ເປົ້າໝາຍພາຍໃນເທດສະບານເມືອງເຊິ່ງໄດ້ກວດກາ-ວັດແທກກົງເຕີນ້ຳສໍາເລັດແລ້ວ 59 ໜ່ວຍຂອງຈຳນວນກົງເຕີ 2,002 ໜ່ວຍ, ສ່ວນ ກົງເຕີໄຟຟ້າກໍສຳເລັດແລ້ວ 208 ໜ່ວຍຂອງຈຳນວນ 6,598 ໜ່ວຍໃນທົ່ວເມືອງ.