ມີເດຍລາວແຂວງບໍ່ແກ້ວ ເມືອງຫ້ວຍຊາຍປະຖະກະຖາສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວ ຄົບຮອບ 66 ປີ ( 20/7/1955-20/7/2021 ) ຢູ່ສູນຝຶກອົບຮົມເມືອງ ໃນວັນທີ 19 ກໍລະກົດນີ້, ມີປະທານ ແລະ ຮອງປະທານ, ຄະນະສະຫະພັນແມ່ຍິງເມືອງ, ຫົວໜ້າໜ່ວຍສະຫະພັນແມ່ຍິງອ້ອມຂ້າງເມືອງ ແລະ ໂຮງຮຽນເຂົ້າຮ່ວມ.

ທ່ານ ທອງພັນ ຈັນທະວົງ ຄະນະປະຈໍາພັກເມືອງ, ປະທານແນວລາວສ້າງຊາດເມືອງຫ້ວຍຊາຍ, ໄດ້ໃຫ້ກຽດຂຶ້ນເລົ່າມູນເຊື້ອການກຳເນີດ-ເຕີບໃຫຍ່ຂະຫຍາຍຕົວຂອງອົງການຈັດຕັ້ງສະຫະພັນແມ່ຍິງລາວ ທີ່ໄດ້ອຸທິດຕົນ ເພື່ອພາລະກິດຕໍ່ສູ້ບົດປ່ອຍຊາດ, ປົກປັກຮັກສາ ແລະ ສ້າງສາພັດທະນາປະເທດຊາດກໍ່ຄືພາລະກິດພັດທະນາແມ່ຍິງຕະຫຼອດໄລຍະ 66 ປີ ທີ່ຜ່ານມາວ່າ, ນັບແຕ່ພັກປະຊາຊົນລາວໄດ້ຮັບການຈັດຕັ້ງຂຶ້ນກໍ່ໄດ້ເອົາໃຈໃສ່ຢ່າງຈົດຈໍ່ຕໍ່ການປຸກລະດົມຂົນຂວາຍ ກໍ່ສ້າງແມ່ຍິງໃຫ້ມີຄວາມຕື່ນຕົວປະກອບສ່ວນໃນພາລະກິດປະຕິວັດ ແລະ ຖືແມ່ຍິງເປັນພາກສ່ວນໜຶ່ງໃນກຳລັງແຮງທີ່ສຳຄັນຂອງພັກ,

ອົງການຈັດຕັ້ງສາຫະພັນແມ່ຍິງລາວ ໄດ້ກຳເນີດເກີດຂຶ້ນໂດຍເລີ່ມຈາກການຈັດຕັ້ງໜ່ວຍແມ່ຍິງນັກຮົບຢູ່ຊົນນະບົດ, ໜ່ວຍຍຸວັນນາລີຢູ່ຕາມຕົວເມືອງ, ໜ່ວຍເອື້ອຍນ້ອງນັກຮົບເຊິ່ງມີໜ້າທີ່ເພື່ອເຮັດໜ້າທີ່ເບິ່ງແຍງ, ລ້ຽງດູ, ຊຸກເຊື່ອມ, ຕິດຕໍ່-ສົ່ງຂ່າວ, ລຳລຽງສະບຽງອາຫານ,ອາວຸດ, ເຄື່ອງນຸ່ງໃຫ້ພະນັກງານແນວໜ້າ, ປຸກລະດົມຂະບວນການຂອງແມ່ຍິງປະຕິບັດວຽກງານແນວຫຼັງ, ເພີ່ມພູນຜະລິດຜົນຫາລ້ຽງກຸ້ມຕົນເອງ, ຂົນຂວາຍຊາວໜຸ່ມ, ລູກຫຼານອອກຮັບໃຊ້ເພື່ອປະເທດຊາດ, ນັ້ນໄດ້ຍົກໃຫ້ເຫັນຜົນສຳເລັດການຈັດຕັ້ງປະຕິບັດຄຳຂັວນ ແລະ ແຜນພັດທະນາຂອງແມ່ຍິງໃນແຕ່ລະກອງປະຊຸມໃຫຍ່ ຂອງສູນກາງສະຫະພັນແມ່ຍິງລາວ ໃນ 8 ແຜນງານ, 34 ໂຄງການ ແລະ ແຜນດຳເນີາງານເພື່ອສົ່ງເສີມຄວາມສະເໝີພາບລະຫວ່າງຍິງຊາຍ, ຄວາມກ້າວໜ້າຂອງວຽກງານແມ່ ແລະ ເດັກ ແລະ ວຽກງານກອງທຶນຂອງເມືອງ ຫ້ວຍຊາຍ, ໄດ້ຮັບຮູ້ເຂົ້າໃຈເຖີງຜົນງານການເຕີບໃຫ່ຍຂະຫຍາຍຕົວ ແລະ ການເຄື່ອນໄຫວຂອງອົງການສະຫະພັນແມ່ຍິງລາວ ເພື່ອພ້ອມກັນນຳມາຈັດຕັ້ງປະຕິບັດເຂົ້າໃນໜ້າທີ່ວຽກງານຕົວຈີງໃຫ້ໄດ້ຮັບຜົນດີເປັນກ້າວໆໃນຄຳຂັວນ ພັດທະນາຄວາມສະເໝີພາບຍິງ-ຊາຍ ຕິດພັນກັບການພັດທະນາປະເທດຊາດ ແລະ ຂໍ້ແຂງຂັນ 3 ດີ ຂອງແມ່ຍິງລາວ.
ພາບ, ຂ່າວ: ບຸນຈັນ ບຸນປັນຍາ