ມີເດຍລາວແຂວງວຽງຈັນ ພາບ-ຂ່າວ:ເມືອງວັງວຽງ.
ໃນວັນທີ 16 ກໍລະກົດ 2021 ຜ່ານມານີ້ ສະຫະພັນກຳມະບານເມືອງວັງວຽງໄດ້ຈັດກອງປະຊຸມຄົບຄະນະບໍລິຫານງານສະຫະພັນກຳມະບານເມືອງວັງວຽງຄັ້ງທີ ll ສະໄໝທີ IX ຂື້ນຢູ່ທີ່ຫ້ອງປະຊຸມຊັ້ນ 3 ຂອງຫ້ອງວ່າການເມືອງ. ພາຍໄຕ້ການເປັນປະທານຂອງສະຫາຍ ພອນແກ້ວ ຂຸນພົມ ຄະນະບໍລິຫານງານສະຫະພັນກຳມະບານແຂວງວຽງຈັນ, ປະທານສະຫະພັນກໍາມະບານເມືອງວັງວຽງ .ໂດຍການເປັນກຽດເຂົ້າຮ່ວມຂອງສະຫາຍ ສິສຸພັນ ວັດທະນະວົງ ຄະນະປະຈຳພັກເມືອງປະທານແນວລາວສ້າງຊາດເມືອງຜູ້ຊີ້ນຳອົງການຈັດຕັ້ງມະຫາຊົນ,ມີ ສະຫາຍ ແສງທຳ ອະໄພຍະລາດ ຮອງປະທານສະຫະພັນກຳມະການແຂວງວຽງຈັນ,ມີຄະນະປະຈຳພັກເມືອງ,ກຳມະການພັກເມືອງ,ຫົວໝ້າ,ຮອງຫົວໝ້າຫ້ອງການ,ກົມກອງ,ປະທານສະຫະພັນກຳມະບານຮາກຖານ ແລະ ສະມາຊິກສະຫະພັນກຳມະບານພາຍໃນເມືອງວັງວຽງເຂົ້າຮ່ວມ.

ສະຫາຍ ພອນແກ້ວ ຂຸນພົມ ປະທານສະຫະພັນກຳມະບານເມືອງວັງວຽງກໍ່ໄດ້ໃຫ້ກຽດຂື້ນຜ່ານບົດສະຫຼຸບການເຄື່ອນໄຫວວຽກງານຂອງຄະນະສະຫະພັນກຳມະບານເມືອງວັງວຽງປີ 2020 ແລະ ທິດທາງແຜນການໃນຕໍ່ໝ້າ2021 ໂດຍສະຫາຍໄດ້ຍົກໃຫ້ເຫັນເຖິິງດ້ານດີ,ດ້ານອ່ອນ,ສີ່ງທີ່ເຮັດໄດ້ ແລະ ບາງວຽກງານຍັງຄົງຄ້າງທີ່ຈະຕ້ອງໄດ້ສືບຕໍ່ແກ້ໄຂເພື່ອເຮັດໝ້າທີ່ຮັກສາຜົນປະໂຫຍດໃຫ້ແກ່ສະມາຊິກກຳມະບານ.

ສະຫະພັນກຳມະບານເມືອງວັງວຽງແມ່ນອົງການຈັດຕັ້ງມະຫາຊົນໜຶ່ງ ຊຶ່ງໄດ້ຮັບການຊີ້ນໍາໂດຍກົງຈາກສະຫະພັນ ກໍາມະບານແຂວງວຽງຈັນ ແລະ ຄະນະປະຈໍາພັກເມືອງວັງວຽງຢ່າງໃກ້ຊິດ, ມີພາລະບົດບາດເປັນເສນາທິການໃຫ້ແກ່ຄະນະພັກເມືອງ, ເຮັດໜ້າທີ່ເຕົ້າໂຮມຄວາມສາມັກຄີ, ສຶກສາອົບຮົມການເມືອງແນວຄິດໃຫ້ແກ່ພະນັກງານລັດຖະກອນ, ກຳມະ ກອນ ແລະ ຊາວຜູ້ອອກແຮງງານບັນດາເຜົ່າ, ກຳແໜ້ນແນວທາງນະໂຍບາຍຂອງພັກ, ແຜນພັດທະນາເສດຖະກິດສັງຄົມຂອງລັດ ແລະ ທິດທາງແຜນການວຽກງານກຳມະບານແຕ່ລະໄລຍະເປັນຕົ້ນ. ສະຫະພັນກໍາມະບານເມືອງວັງວຽງປະກອບມີ 57 ຮາກຖານ 10 ໜ່ວຍກຳມະບານມີສະມາຊິກກຳມະບານທັງໝົດ 1,457 ສະຫາຍ,ຍິງ 715 ສະຫາຍ , ມີຄະນະບໍລິຫານງານທັງໜົດ 19 ສະຫາຍ,ຍິງ 6 ສະຫາຍ,ປະຈໍາຢູ່ຫ້ອງການ 2 ສະຫາຍ,ຍິງ 1 ສະຫາຍ, ຢູ່ກົມກອງຫ້ອງການໂຮງຮຽນ, ໂຮງໝໍ,ລັດວິສາຫະກິດ 15 ສະຫາຍ,ຍິງ 5 ສະຫາຍ, ປະຈຸບັນຫ້ອງການສະຫະພັນກຳມະບານເມືອງວັງວຽງມີພະນັກງານທັງໜົດ 7 ສະຫາຍ, ມີປະທານ ,ຮອງປະທານ ແລະ ວິຊາການ 4 ສະຫາຍ, ໃນນັ້ນໄດ້ໄປສຶກສາຢູ່ ສ ສ ຫວຽດນາມ 1 ສະຫາຍ. ຈາກນັ້ນກໍ່ໄດ້ມີການ ປະກອບຄໍາຄິດຄໍາເຫັນຕໍ່ກອງປະຊຸມຢ່າງກົງໄປກົງມາເພື່ອເຮັດໃຫ້ວຽກງານກໍາມະບານມີຜົນສໍາເລັດ ແລະ ໄດ້ຮັບການປັບປຸງຢ່າງຮອບດ້ານ. ໃນວາລະກອງປະຊຸມຍັງໄດ້ຜ່ານມະຕິຕົກລົງວ່າດ້ວຍການແຕ່ງຕັ້ງເພີ່ມເຕີມຂອງຄະນະບໍລິຫານງານສະຫະພັນກຳມະບານເມືອງວັງວຽງ ສະບັບເລກທີ 159/ຄປພ.ວວ ແລະ ເລກທີ 160/ຄປພ.ວວ ລົງວັນທີ 15 ກໍລະກົດ 2021, ຈຳນວນ 2 ສະຫາຍ

ໃນຕອນທ້າຍກອງປະຊຸມຍັງໄດ້ຮັບຟັງການໂອ້ລົມຂອງສະຫາຍ ສິສຸພັນ ວັດທະນະວົງ ຄະນະປະຈຳພັກເມືອງປະທານແນວລາວສ້າງຊາດເມືອງເຊີ່ງກ່ອນອື່ນທ່ານກໍ່ໄດ້ກ່າວສະແດງຄວາມຊົມເຊີຍມາຍັງຄະນະບໍລິຫານງານສະຫະພັນກໍາມະບານທຸກຂັ້ນທີ່ໄດ້ເອົາໃຈໃສ່ຈັດຕັ້ງປະຕິບັດໜ້າທີ່ຂອງຕົນ. ຈົນເຮັດໃຫ້ມີຜົນສໍາເລັດພ້ອມນີ້ທ່ານກໍ່ໄດ້ຮຽກຮ້ອງໃຫ້ທຸກສະຫາຍຈົ່ງສືບຕໍ່ສຶກສາອົບຮົມການເມືອງແນວຄິດໃຫ້ແກ່ສະມາຊິກກໍາມະບານຢ່າງເປັນປົກກະຕິ. ພ້ອມທັງຕັ້ງໜ້າປະຕິບັດໜ້າທີ່ວິຊາສະເພາະ ຂອງຕົນໂດຍສະເພາະກໍ່ແມ່ນໃຫ້ເອົາໃຈໃສ່ຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າໃຫ້ນັບມື້ນັບໜັກ ແໜ້ນເຂັ້ມແຂງເພື່ອເຮັດໃຫ້ວຽກງານກໍາມະບານໃນທົ່ວເມືອງມີຄວາມເຕີບ ໃຫຍ່ຂະຫຍາຍຕົວຂຶ້ນຢ່າງບໍ່ຢຸດຢັ້ງ.