ມີເດຍລາວແຂວງຈຳປາສັກ ຂ່າວ: ທັດຊະນະ
ອົງການປົກຄອງນະຄອນຫຼວງວຽງຈັນ ມອບຊຸດຕຽງນອນປິ່ນປົວຄົນເຈັບພະຍາດໂຄວິດ-19 ຈໍານວນ 100 ຊຸດ, ລວມມູນຄ່າທັງໝົດ 142.000.000 ກີບ, ໃຫ້ແຂວງຈຳປາສັກ, ເພື່ອປະກອບເຂົ້າໃສ່ໂຮງໝໍພາກສະໜາມ ໃນການປິ່ນປົວຄົນເຈັບພະຍາດໂຄວິດ-19.

ພິທີຮັບເອົາການຊ່ວຍເຫລືອ ດັ່ງກ່າວ, ໄດ້ມີຂຶ້ນໃນວັນທີ 19 ກໍລະກົດ 2021 ທີ່ຫ້ອງວ່າການແຂວງຈໍາປາສັກ, ໂດຍໄດ້ຮັບການຊ່ວຍເຫລືອຈາກ ອົງການປົກຄອງນະຄອນຫຼວງວຽງຈັນ ໂດຍມີຊຸດຕຽງນອນປິ່ນປົວຄົນເຈັບ ຈໍານວນ 100 ຊຸດ, ລວມມູນຄ່າທັງໝົດ 142.000.000 ກີບ, ໃຫ້ແຂວງຈຳປາສັກ, ເພື່ອປະກອບເຂົ້າໃສ່ໂຮງໝໍພາກສະໜາມ. ເປັນກຽດ ກ່າວຮັບໂດຍ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ. ມີ ທ່ານຮອງເຈົ້າແຂວງຈຳປາສັກ, ກອງເລຂາຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂ ການລະບາດພະຍາດໂຄວິດ-19 ຂັ້ນແຂວງ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.

ໂອກາດນີ້, ທ່ານເຈົ້າແຂວງຈຳປາສັກ ໄດ້ສະແດງຄວາມຂອບໃຈ ໄປຍັງ ອົງການປົກຄອງນະຄອນຫຼວງວຽງຈັນ ທີ່ມີຄວາມເປັນຫວ່ງເປັນໃຍ ຕໍ່ ປະຊາຊົນ ແລະ ອົງການປົກຄອງແຂວງຈຳປາສັກ ໃນວຽກງານແກ້ໄຂ ການແຜ່ລະບາດຂອງພະຍາດໂຄວິດ-19, ເນື່ອງຈາກແຮງງານລາວທີ່ຢູ່ປະເທດໃກ້ຄຽງ ກັບຄືນມາ ສປປ ລາວ ນັບມື້ເພີ່ມຂຶ້ນ ເຮັດໃຫ້ຕົວເລກການຕິດເຊື້ອຈາກການນຳເຂົ້າໃນທົ່ວປະເທດ ແມ່ນເພີ່ມຂຶ້ນສູງ, ຊຶ່ງບາງວັນມີຫຼາຍກວ່າ 100 ກໍລະນີ ທີ່ແມ່ນທັງສາຍພັນເດວຕາ ແລະ ອານຟາ ສາມາດແຜ່ເຊື້ອໄດ້ງ່າຍ ແລະ ໄວກວ່າສາຍພັນ ດັ້ງເດີມ. ດັ່ງນັ້ນ ແຂວງຈຳປາສັກ ຈຶ່ງມີຄວາມຈຳເປັນທີ່ຈະຂະຫຍາຍ ໂຮງໝໍພາກສະໜາມ ເພີ່ມຈຳນວນຕຽງ ເພື່ອຮອງຮັບ ປິ່ນປົວ ຜູ້ທີ່ຕິດເຊື້ອພະຍາດໂຄວິດ-19.