ມີເດຍລາວແຂວງໄຊສົມບູນ ຂ່າວ: ສີລິພອນ ສົງຄຳ
ທ່ານ ນາງ ຂັນທະລີ ສີຣິພົງພັນ, ຮອງເລຂາຄະນະພັກກະຊວງ, ຮອງລັດຖະມົນຕີກະຊວງສຶກສາທິການ ແລະ ກິລາ, ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ ແລະ ພົບປະໂອ້ລົມພະນັກງານຫລັກແຫລ່ງ ຂອງພະແນກສຶກສາທິການ ແລະ ກິລາ ແຂວງໄຊສົມບູນ ໃນຕອນເຊົ້າຂອງວັນທີ 19 ກໍລະກົດ 2021 ນີ້ ທີ່ຫ້ອງປະຊຸມພະແນກສຶກສາທິການ ແລະ ກິລາ ແຂວງ ໂດຍການຕ້ອນຮັບຂອງທ່ານ ຢົງຢີ ລີເຍ່ຍວື່, ຫົວໜ້າພະແນກສຶກສາທິການ ແລະ ກິລາ ແຂວງ, ພ້ອມດ້ວຍຫົວໜ້າຫ້ອງການສຶກສາທິການ ແລະ ກິລາ ທັງ 5 ເມືອງ ຕະຫລອດຮອດພະນັກງານຫັລກແຫລ່ງ ພາຍໃນພະແນກ ແລະ ພະນັກງານວິຊາການ ເຂົ້າຮ່ວມ.

ໂອກາດນີ້ ທ່ານ ຢົງຢີ ລີເຍ່ຍວື່ ໄດ້ກ່າວຕ້ອນຮັບ ພ້ອມທັງລາຍງານຜົນສຳເລັດ ການຈັດຕັ້ງວຽກງານສຶກສາ ແລະ ກິລາ ພາກຮຽນທີ I ປະຈຳສົກຮຽນ 2020-2021. ຕະຫລອດໄລຍະຜ່ານມາ ກໍຄືປັດຈຸບັນ ຄະນະພັກ-ຄະນະນຳ ຂອງພະແນກສຶກສາທິການ ແລະ ກິລາ ແຂວງ ໄດ້ເອົາໃຈໃສ່ຊີ້ນຳ-ນຳພາຂົງເຂດວຽກງານດັ່ງກ່າວດ້ວຍຄວາມຮັບຜິດຊອບສູງ ຈົນສາມາດໄດ້ຮັບຜົນສຳເລັດຫລາຍດ້ານເປັນຕົ້ນ ການສອບເສັງຈົບຊັ້ນປະຖົມ ບັນລຸໄດ້ 88,1%, ມັດທະຍົມຕອນຕົ້ນ ບັນລຸໄດ້ 84% ແລະ ມັດທະຍົມຕອນປາຍ ບັນລຸໄດ້ 89,8%, ພ້ອມທັງສຶບຕໍ່ປັບປຸງ ແລະ ພັດທະນາພື້ນຖານໂຄ່ງລ່າງ ດ້ານການສຶກສາໃຫ້ດີຂຶ້ນ.

ໂອກາດດັ່ງກ່າວ ທ່ານ ນາງ ຂັນທະລີ ສີຣິພົງພັນ ໄດ້ມີຄຳເຫັນໂອ້ລົມຕໍ່ພະນັກງານຫຼັກແຫຼ່ງ ຂອງພະແນກສຶກສາທິການ ແລະ ກິລາ ແຂວງ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານທີ່ຍາດມາໄດ້ໃນໄລຍະຜ່ານມາ, ພ້ອມທັງໄດ້ເນັ້ນໜັກບາງຈຸດທີ່ຈະຕ້ອງໄດ້ເພີ່ມທະວີການຈັດຕັ້ງປະຕິບັດວຽກງານ ໃນຕໍ່ໜ້າ ເປັນຕົ້ນ ແມ່ນການສຶກສາອົບຮົມການເມືອງ-ແນວຄິດ ໃຫ້ແກ່ພະນັກງານຫລັກແຫລ່ງ ແລະ ພະນັກງານວິຊາການ ສຶບຕໍ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ IX ໃຫ້ເປັນແຜນງານ, ໂຄງການ ອັນລະອຽດ ໂດຍສຸ່ມໃສ່ແກ້ໄຂບັນຫາຕົວຈິງໃນການພັດທະນາບຸກຄະນາກອນຄູໃຫ້ແທດເໝາະ ແລະ ສອດຄ່ອງກັບສະພາບຕົວຈິງ ໄປຄຽງຄູ່ກັບການຕິດຕາມການຮຽນ-ການສອນ ຢ່າງເລິກເຊິ່ງ ແລະ ທົ່ວເຖິງ, ສ້າງຄວາມເຂັ້ມແຂງໃຫ້ຄູ-ອາຈານ ມີຄວາມຮູ້-ຄວາມສາມາດໃນທຸກດ້ານ, ສຸ່ມໃສ່ສ້າງໂຮງຮຽນຕົວແບບໃຫ້ຂະຫຍາຍອອກຢ່າງກວ້າງຂວາງ ໂດຍຍົກສູງໃສ່ການພັດທະນາກຸ່ມໂຮງຮຽນ ໃຫ້ມີຄວາມເຂັ້ມແຂງ ແລະ ພ້ອມກັນພັດທະນາວຽກງານຂົງເຂດການສຶກສາ ຂອງແຂວງໄຊສົມບູນ ໃຫ້ມີບາດກ້າວຂະຫຍາຍຕົວດີຂຶ້ນກວ່າເກົ່າ ໃນຕໍ່ໜ້າ.