ກົມສື່ມວນຊົນ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ຮ່ວມກັບສູນສື່ສານເພື່ອສຸຂະພາບ ແລະ ສຸຂະສຶກສາ ກະຊວງສາທາລະນະສຸກ ອົງການອຸຍນີເຊັບປະຈໍາລາວ ແລະ ອົງການອະນາໄມໂລກປະຈໍາລາວ ໄດ້ຮ່ວມກັນຈັດກອງປະຊຸມປຶກສາຫາລືການມີສ່ວນຮ່ວມຂອງສື່ມວນຊົນໃນການສົ່ງເສີມການໂຄສະນາວຽກງານວັກຊິນ ໂຄວິດ-19 ຂຶ້ນໃນວັນທີ 16 ກໍລະກົດນີ້ ທີ່ຮ້ານອາຫານຄົວລາວ ນະຄອນຫຼວງວຽງຈັນ ເຂົ້າຮ່ວມເປັນປະທານຂອງ ທ່ານ ສົມສະຫວາດ ພົງສາ ຫົວໜ້າກົມສື່ມວນຊົນກະຊວງ ຖວທ, ທ່ານ ນາງ ບີອາເຕ ດາສເຕລ ວ່າການແທນຜູ້ຕາງໜ້າອົງການອຸຍນີເຊັບ, ທ່ານ ນາງ ທາຍອນຢາງ ຜູ້ຮັບຜິດຊອບວຽກງານສັກຢາ ອົງການອະນາໄມໂລກ ປະຈໍາລາວ ພ້ອມດ້ວຍບັນນາທິການ ແລະ ສື່ມວນຊົນຈາກສໍານັກຕ່າງໆ.


ກອງປະຊຸມຄັ້ງນີ້ຈັດຂຶ້ນເພື່ອໃຫ້ຂໍ້ມູນແກ່ບັນນາທິການ ແລະ ສື່ມວນຊົນກ່ຽວກັບຄວາມພະຍາຍາມຂອງລັດຖະບານ ໃນການຂົນຂວາຍເອົາວັກຊິນ ໂຄວິດ-19, ເພື່ອສ້າງຄວາມເຊື່ອໝັ້ນຕໍ່ຄວາມປອດໄພ ແລະ ປະສິດທິພາບຂອງວັກຊິນ ໂຄວິດ-19 ທັງເປັນການໃຫ້ຂໍ້ມູນແກ່ບັນນາທິການ ກ່ຽວກັບເປົ້າໝາຍວຽກງານສັກຢາ ສະບັບປັບປຸງໃໝ່ຂອງລັດຖະບານ ແລະ ໃຫ້ຂໍ້ມູນແກ່ສື່ມວນຊົນ ກ່ຽວກັບການໄດ້ຮັບວັກຊິນໃໝ່ ໂດຍການຊ່ວຍເຫຼືອຈາກລັດຖະບານ ແລະ ປະຊາຊົນສະຫະລັດອາເມຣິກາ ຜ່ານໂຄງການເພື່ອເຂົ້າເຖິງວັກຊິນໂຄວິດ-19 ຫຼື ໂຄແວັກ, ກອງປະຊຸມຄັ້ງນີ້ແນໃສ່ເຮັດໃຫ້ບັນນາທິການ ແລະ ສື່ມວນຊົນໄດ້ຮັບຮູ້ເຂົ້າໃຈ ແລະ ມີຂໍ້ມູນທີ່ຖືກຕ້ອງເພື່ອນໍາໄປໂຄສະນາເຜີຍແຜ່ໃຫ້ສັງຄົມຮັບຮູ້ຢ່າງກວ້າງຂວາງ.
ກອງປະຊຸມຍັງໄດ້ຮັບຟັງການລາຍງານລ່າສຸດກ່ຽວກັບສະຖານະການຂອງພະຍາດໂຄວິດ -19 ໃນ ສປປລາວ, ລາຍງານລ່າສຸດກ່ຽວກັບວັກຊິນໂຄວິດ-19 ແລະ ຂະບວນການສັກຢາ, ລາຍງານກ່ຽວກັບຄາດໝາຍການສັກຢາ ແລະ ການຈັດກຸ່ມບຸລິມະສິດສະບັບປັບປຸງໃໝ່, ລາຍງານກ່ຽວກັບການໄດ້ຮັບວັກຊິນຊະນິດໃໝ່ຈາກການຊ່ວຍເຫຼືອຈາກລັດຖະບານ ແລະ ປະຊາຊົນສະຫະລັດອາເມລິກາ ຜ່ານໂຄງການເພື່ອການເຂົ້າເຖິງວັກຊິນໂຄວິດ-19 ຫຼື ໂຄແວັກ ແລະ ຮັບຟັງໜ້າທີ່ຂອງສື່ມວນຊົນກ່ຽວກັບການສົ່ງເສີມການໂຄສະນາວຽກງານສັກວັກຊິນ ແລະ ອື່ນໆ.