ມີເດຍລາວແຂວງຫຼວງພະບາງ ຂ່າວ: ເມືອງຈອມເພັດ ໃນຕອນເຊົ້າວັນທີ 21 ກໍລະກົດ 2021 ນີ້ທີ່ໂຮງຮຽນມັດທະຍົມສົມບູນ ຈອມເພັດ ໄດ້ຈັດພິທີເປີດການສອບເສັງຈົບຊັ້ນມັດທະຍົມຕອນຕົ້ນ ( ມ.4 ) ຂຶ້ນ ໂດຍໃຫ້ກຽດເຂົ້າຮ່ວມເປັນປະທານຂອງທ່ານ ສົມສັກ ສີລິວົງ ກຳມະການພັກເມືອງ ຮອງເຈົ້າເມືອງ ຈອມເພັດ, ທ່ານ ນາງ ຈັນສະໝຸດ ສຸກຂະເສີມ ກຳມະການພັກເມືອງ ຫົວໜ້າຫ້ອງການສຶກສາທິການ ແລະ ກິລາເມືອງ, ມີຄະນະຊີ້ນຳການສອບເສັງ, ອະນຸກຳມະການຍາມຫ້ອງສອບເສັງ,ນັກສອບເສັງແລະພາກສ່ວນຕ່າງໆທີ່ກ່ຽວຂ້ອງເຂົ້າຮ່ວມ.

ໃນພິທີ ທ່ານ ນາງ ຈັນສະໝຸດ ສຸກຂະເສີມ ຫົວໝ້າຫ້ອງການສຶກສາທິການ ແລະກິລາເມືອງໄດ້ຂຶ້ນຜ່ານບົດລາຍງານການສອບເສັງຈົບຊັ້ນມັດທະຍົມຕອນຕົ້ນ ( ມ4 ) ພ້ອມທັງຜ່ານກົດລະບຽບຂອງນັກສອບເສັງ; ເຊິ່ງການສອບເສັງໃນຄັ້ງນີ້ມີ 6 ວິຊາສອບເສັງຄື: ວິຊາພາສາລາວ-ວັນນະຄະດີ, ວິຊາ ສຶກສາພົນລະເມືອງ, ວິຊາ ວິທະຍາສາດທຳມະຊາດ, ວິຊາ ວິທະຍາສາດສັງຄົມ, ວິຊາ ຄະນິດສາດ ແລະ ວິຊາ ພາສາອັງກິດ. ທົ່ວເມືອງ ມີ 7 ສູນສອບເສັງຄື: ສູນ ມສ ຈອມເພັດ , ສູນ ມສ ປາກຫຼືງ, ສູນ ມສ ນາງີ້ວ, ສູນ ມຕ ຊ້ອງໃຕ້, ສູນ ມຕ ແກ້ງແຄນ, ມຕ ລ້ອງນ້ຳຮາງ ແລະ ສູນ ມຕ ບ້ານແລ. ມີ 14 ຫ້ອງສອບເສັງ, ມີນັກສອບເສັງທັງໝົດ 289 ນ້ອງ, ຍີງ 142 ນ້ອງ.

ໃນຕອນທ້າຍ ທ່ານ ສົມສັກ ສິລິວົງ ປະທານ ປະທານພິທີໄດ້ເນັ້ນໜັກໃຫ້ນັກສອບເສັງເອົາໃຈໃສ່ປະຕິບັດໂມງເວລາ, ກົດລະບຽບຂອງການສອບເສັງ, ສຸມສະຕິປັນຍາເຂົ້າໃນການຄົ້ນຄວ້າບົດຮຽນ ເພື່ອໃຫ້ເສັງໄດ້ຄະແນນດີ , ມີຄຸນນະພາບພ້ອມທັງເປິດຊອງຫົວບົດສອບເສັງຈົບຊັ້ນມັດທະຍົມຕອນຕົ້ນ ( ມ 4 )ສົກປີ 2010-2021ຂຶ້ນຢ່າງເປັນທາງການ.
ການສອບເສັງດັ່ງກ່າວແມ່ນຈະໄດ້ດຳເນີນເປັນເວລາ 3ວັນ ເລີ່ມວັນທີ 21-23 ກໍລະກົດ 2021ຈື່ງຈະສຳເລັດ