ພິທີ ມອບ-ຮັບ ເຄື່ອງຊ່ວຍເຫຼືອ ອຸປະກອນສັດຕະວະແພດ ຈາກອຳນາດການປົກຄອງແຂວງກວາງບິ່ງ ສສ ຫວຽດນາມ ໄດ້ຈັດຂຶ້ນໃນວັນທີ 20 ກໍລະກົດ 2021 ທີ່ດ່ານສາກົນ ນາເພົ້າ-ຈາຫຼໍ ໂດຍການກ່າວມອບຂອງ ທ່ານ ດ່ວນ ຫງັອກ ເລີມ ຄະນະປະຈຳພັກແຂວງ, ຮອງປະທານຜູ້ປະຈຳການ ຄະນະກຳມະການປະຊາຊົນແຂວງກວາງບິ່ງ ແລະ ກ່າວຮັບໂດຍ ທ່ານ ປອ. ສົມສະອາດ ອຸ່ນສີດາ ກຳມະການພັກແຂວງ, ຮອງເຈົ້າແຂວງຄຳມ່ວນ ມີບັນດາພະແນກການທີ່ກ່ຽວຂ້ອງທັງສອງແຂວງເຂົ້າຮ່ວມ.

ເຊິ່ງອຸປະກອນສັດຕະວະແພດ ທີ່ແຂວງກວາງບິ່ງ ນຳມາມອບໃຫ້ແກ່ແຂວງຄຳມ່ວນໃນຄັ້ງນີ້ ປະກອບມີ ຢາປົວປະພະຍາດສັດ ແລະ ຈັດຝຶກອົບຮົມໃຫ້ແກ່ວິຊາການສັດຕະວະແພດຂອງແຂວງຄຳມ່ວນ ລວມມູນຄ່າການຊ່ວຍເຫຼືອທັງໝົດ 550 ລ້ານດົງ ຫຼື ປະມານ 200 ກວ່າລ້ານກີບ. ໂອກາດດຽວກັນ ທ່ານ ປອ. ສົມສະອາດ ອຸ່ນສີດາ ເຊິ່ງຕາງໜ້າໃຫ້ແກ່ຄະນະພັກ, ອຳນາດການປົກຄອງແຂວງ ກໍ່ໄດ້ກ່າວສະແດງຄວາມຂອບໃຈມາຍັງຄະນະພັກ, ອຳນາດການປົກຄອງແຂວງກວາງບິ່ງ ທີ່ໄດ້ໃຫ້ການປະກອບສ່ວນຊ່ວຍເຫຼືອດ້ວຍຄວາມສາມັກຄີຂອງທຸກພາກສ່ວນໃນສັງຄົມ ແລະ ບັນດາແຂວງອ້າຍນ້ອງ ສສ ຫວຽດນາມ ກໍ່ຄືການປະກອບສ່ວນຂອງແຂວງກວາງບິ່ງ.

ພ້ອມນີ້ທ່ານຮອງເຈົ້າແຂວງຄຳມ່ວນ ກໍ່ຍັງໄດ້ລາຍງານກ່ຽວກັບສະພາບການຄວບຄຸມການແຜ່ລະບາດຂອງພະຍາດຢູ່ພາຍໃນແຂວງ. ເຊິ່ງໃນປະຈຸບັນແຂວງຄຳມ່ວນ ແມ່ນສາມາດຄວບຄຸມການລະບາດຂອງພະຍາດຕ່າງໆທີ່ເກີດຂຶ້ນໄດ້ດີ. ສະເພາະການລະບາດຂອງພະຍາດສັດ ແມ່ນໄດ້ພົບເຫັນສັດທີ່ຕິດເຊື້ອພະຍາດ 02 ປະເພດຄື: ພະຍາດຜິວໜັງອັກເສບ ແລະ ພະຍາດເຕົ້າໂຮມເລືອດ ແມ່ນການລະບາດນຳ ງົວ-ຄວາຍ ເຊິ່ງໃນທົ່ວແຂວງມີຈຳນວນສັດທີ່ຕິດເຊື້ອພະຍາດຜິວໜັງທັງໝົດ 6.013 ໂຕ, ປິ່ນປົວດີແລ້ວ 4.276 ໂຕ ແລະ ສັດທີ່ຕິດເຊື້ອພະຍາດເຕົ້າໂຮມເລືອດ 950 ໂຕ, ປິ່ນປົວຫາຍດີແລ້ວ 762 ໂຕ.

ສຳລັບແຂວງກວາງບິ່ງ ໃນປະຈຸບັນກໍ່ຢູ່ໃນສະພາບຄວາມຫຍຸ້ງຍາກ ໂດຍສະເພາະສະພາບການປ້ອງກັນ, ຄວບຄຸມ ການແຜ່ລະບາດຂອງພະຍາດ ໂຄວິດ -19 ແຕ່ກໍ່ຍັງໃຫ້ການຊ່ວຍເຫຼືອແກ່ແຂວງຄຳມ່ວນ ເຊິ່ງເປັນການສະແດງເຖິງຄວາມເປັນຫ່ວງເປັນໄຍ ແລະ ໄມຕີຈິດ ມິດຕະພາບອັນເປັນມູນເຊື້ອຂອງການນຳ ແລະ ປະຊາຊົນຂອງສອງແຂວງ ຄຳມ່ວນ-ກວາງບິ່ງ.