ມີເດຍລາວແຂວງຫຼວງນ້ຳທາ ວັນທີ 21 ກໍລະກົດ 2021 ທີ່ຜ່ານມາຢູ່ທີ່ສະໂມສອນໂຮງຮຽນ ມ.ສ ເທດສະບານເມືອງວຽງພູຄາແຂວງຫຼວງນໍ້າທາ ໄດ້ຈັດພິທີເປີດການສອບເສັງຈົບຊັ້ນມັດທະຍົມຕອນຕົ້ນ ມໍ4 ທົ່ວເມືອງວຽງພູຄາ ສົກຮຽນ 2020-2021 ໂດຍການເປັນປະທານຂອງທ່ານ ນາງ ເຮືອຍ ສົມຫວັງ ກຳມະການປະຈຳພັກເມືອງ ຮອງເຈົ້າເມືອງ ຜູ້ຊີ້ນຳວຽກງານຂົງເຂດວັດທະນະທຳ-ສັງຄົມ, ມີທ່ານ ຄຳແຝງ ເຈື້ອຫຼວງຄຳມີ ຕາງໜ້າພະແນກສຶກສາທິການ ແລະ ກິລາແຂວງ, ມີທ່ານ ສີທອງ ກຳມະເຈີງ ກຳມະການພັກເມືອງ ຫົວໜ້າຫ້ອງການສຶກສາທິການ ແລະ ກິລາເມືອງ, ມີຄູອາຈານ, ຄະນະກຳມະການເຝົ້າຫ້ອງສອບເສັງ ແລະ ນ້ອງນັກຮຽນເຂົ້າຮ່ວມ.

ໃນພິທີໄດ້ຜ່ານຂໍ້ຕົກລົງຂອງທ່ານເຈົ້າເມືອງ ສະບັບເລກທີ 126 /ຈມ, ລົງວັນທີ 13 ພຶດສະພາ 2021 ວ່າດ້ວຍການແຕ່ງຕັ້ງຄະນະກຳມະການລົງຊີ້ນຳ-ນຳພາການສອບເສັງຈົບຊັ້ນ ມໍ4 ສາຍສາມັນສຶກສາໃນສົກຮຽນ 2020-2021 ຢູ່ແຕ່ລະສູນສອບເສັງ, ຂໍ້ຕົກລົງຂອງຫົວໜ້າຫ້ອງການສຶກສາທິການ ແລະ ກິລາເມືອງສະບັບເລກທີ 677/ສກມ ລົງວັນທີ8 ມິຖຸນາ 2021 ວ່າດ້ວຍການແຕ່ງຕັ້ງຄູອາຈານ ເປັນກຳມະການຍາມຫ້ອງສອບເສັງຈົບຊັ້ນ ມໍ4

ພ້ອມນີ້ທ່ານ ນາງ ເຮືອຍ ສົມຫວັງ ກຳມະການປະຈຳພັກເມືອງ ຮອງເຈົ້າເມືອງໆ ວຽງພູຄາ ໄດ້ມີຄຳເຫັນກ່າວເປີດພິທີ ການສອບເສັງຈົບຊັ້ນ ມໍ4 ສົກຮຽນ 2020-2021 ຢູ່ເມືອງວຽງພູຄາ ຢ່າງເປັນທາງການ ທ່ານໄດ້ຮຽກຮ້ອງໃຫ້ຄູອາຈານກໍຄືຄະນະກຳມະການເຝົ້າຫ້ອງສອບເສັງ ເອົາໃຈໃສ່ຈັດຕັ້ງປະຕິບັດ ຕາມພາລະບົດບາດສິດ ແລະ ໜ້າທີ່ຂອງຕົນ ດ້ວຍຄວາມຮັບຜິດຊອບສູງ ມີຜົນສຳເລັດຕາມການມອບໝາຍ ປະຕິບັດຕາມກົດລະບຽບການສອບເສັງໃຫ້ເຂັ້ມງວດ ມີຄວາມຍຸຕິທຳ ຕໍ່ນັກສອບເສັງ ແລະ ຮຽກຮ້ອງໃຫ້ລູກຫຼານ ນ້ອງນັກຮຽນ ເອົາໃຈໃສ່ປະຕິບັດຕາມກົດລະບຽບຂອງການສອບເສັງຢ່າງເຂັ້ມງວດ, ມີຄວາມອຸ່ນອ່ຽນທຸ່ນທ່ຽງຕັ້ງໃຈບໍ່ຟ້າວຟັງຈົນເກີນໄປ ໃຊ້ຄວາມຮູ້ຄວາມສາມາດຂອງຕົນເຂົ້າໃນການຕອບໂຈດຄຳຖາມ ຫ້າມວົນແຊວ ຫ້າມໃຊ້ໂທລະສັບ ແລະ ການສື່ສານອື່ນໆ

ທີ່ເປັນການລະເມີດຕໍ່ລະບຽບການສອບເສັງ ຢ່າງເດັດຂາດ, ການສອບເສັງບັນດາຄູ – ອາຈານ ແລະ ນ້ອງນັກຮຽນໄດ້ປະຕິບັດຕາມມາດຕະການໃນການປ້ອງກັນພະຍາດໂຄວິດ 19 ຢ່າງເຂັ້ມງວດ, ເປັນຕົ້ນໃສ່ຜ້າປິດປາກ -ດັງ ຮັກສາໄລຍະຫ່າງ.ທົ່ວເມືອງວຽງພູຄາ ມີ 10 ສູນສອບເສັງ, ມີ 30 ຫ້ອງ, ມີນັກສອບເສັງ 457 ນ້ອງ, ຍິງ 222 ນ້ອງ ວິຊາທີ່ນຳມາສອບເສັງມີ 6 ວິຊາຄື: ວິຊາ ພາສາລາວ-ວັນນະຄະດີ, ສຶກສາພົນລະເມືອງ, ວິທະຍາສາດທຳມະຊາດ, ວິທະຍາສາດສັງຄົມ, ຄະນິດສາດ ແລະ ພາສາອັງກິດ ເຊິ່ງຈະໄດ້ດຳເນີນເປັນເວລາ 3 ວັນ ແຕ່ວັນທີ 21-23 ກໍລະກົດ 2021 ຈຶ່ງສໍາເລັດ.