ມີເດຍລາວແຂວງອຸດົມໄຊ ທ່ານ ບຸນຄົງ ຫຼ້າຈຽມພອນ ກຳມະການສຳຮອງສູນກາງພັກ ເລຂາຄະນະບໍລິຫານງານພັກເເຂວງ ເຈົ້າແຂວງອຸດົມໄຊ ພ້ອມດ້ວຍຄະນະ ລົງເຄື່ອນໄຫວຢ້ຽມຢາມພົບປະໂອ້ລົມ ແລະ ຊີ້ນຳວຽກງານຢູ່ເມືອງຫລາ, ໃນຕອນເຊົ້າວັນທີ 21 ກໍລະກົດ 2021 ທີ່ສະໂມສອນຂອງເມືອງ, ໂດຍການຕ້ອນຮັບຢ່າງອົບອຸ່ນຂອງ ທ່ານ ຫຸມພັນ ບຸບຜາຄຳ ກຳມະການພັກແຂວງ ເລຂາພັກເມືອງເຈົ້າເມືອງ-ເມືອງຫລາ ພ້ອມດ້ວຍ ອະດີດການນຳເມືອງ, ມີ ຄະນະພັກ-ຄະນະນຳເມືອງ, ຫົວໜ້າ-ຄະນະຫ້ອງການ, ລັດວິສາຫະກິດ, ຕະຫຼອດຮອດນາຍ ແລະ ພົນທະຫານ, ນາຍ ແລະ ພົນຕໍາຫຼວດ ເຂົ້າຮ່ວມ.

ໂອກາດນີ້ ທ່ານ ຫຸມພັນ ບຸບຜາຄຳ ກຳມະການພັກແຂວງ ເລຂາພັກເມືອງເຈົ້າເມືອງ-ເມືອງຫລາ ໄດ້ກ່າວຕ້ອນຮັບ, ພ້ອມທັງລາຍງານວຽກງານຮອບດ້ານການຈັດຕັ້ງປະຕິບັດມະຕິ XI, ກ່ຽວກັບແຜນພັດທະນາເສດຖະກິດ-ສັງຄົມຂອງເມືອງ ໃນໄລຍະ 6 ເດືອນຕົ້ນປີ 2021, ເຊິ່ງຄະນະພັກແຕ່ລະຂັ້ນໄດ້ເອົາໃຈໃສ່ປະຕິບັດວຽກງານດ້ວຍຄວາມເປັນເຈົ້າການ, ເຊິ່ງໄດ້ຖືເອົາວຽກງານສືກສາອົບຮົມການເມືອງ-ແນວຄິດ ລົງໂຄສະນາສືກສາໃຫ້ພະນັກງານ, ສະມາຊິກພັກ ຕະຫຼອດຮອດປະຊາຊົນບັນດາເຜົ່າ ໃຫ້ມີຄວາມເຂົ້າໃຈ ແລະ ເຊື່ອໝັ້ນຕໍ່ການນຳພາຂອງພັກ, ເພີມທະວີການຊີ້ນຳ-ນຳພາເດັດຂາດໂດຍກົງ ແລະ ຮອບດ້ານໂດຍສະເພາະແມ່ນວຽກງານການເມືອງ-ເເນວຄິດ, ວຽກງານເສດຖະກິດສັງຄົມ, ວຽກງານວັດທະນະທຳສັງຄົມ ແລະ ວຽກງານປ້ອງກັນຊາດ-ປ້ອງກັນຄວາມສະຫງົບ ເຊິ່ງຮັກສາໄດ້ສະຖຽນລະພາບທາງດ້ານການເມືອງຢ່າງໜັກແໜ້ນ, ຮັບປະກັນໄດ້ຄວາມປອດໄພ ແລະ ຄວາມເປັນລະບຽບຮຽບຮ້ອຍທົ່ວສັງຄົມໂດຍພື້ນຖານ, ພ້ອມນັ້ນຜູ່ແທນທີ່ເຂົ້າຮ່ວມກອງປະຊຸມໄດ້ປະກອບຄຳຄິດຄຳເຫັນໃສ່ບົດລາຍງານການຈັດຕັ້ງປະຕິບັດມະຕິ XI, ກ່ຽວກັບແຜນພັດທະນາເສດຖະກິດ-ສັງຄົມຂອງເມືອງຢ່າງກົງໄປກົງມາ.

ໂອກາດດັ່ງກ່າວ ທ່ານເຈົ້າແຂວງອຸດົມໄຊ ໄດ້ມີຄໍາເຫັນໂອ້ລົມ ຕໍ່ຄະນະນຳຂອງເມືອງຫລາ ເຊິ່ງທ່ານໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນສໍາເລັດຫລາຍດ້ານ ທີ່ການນຳຂອງເມືອງ ສາມາດຍາດມາໄດ້ ທ່ານໄດ້ແນະນຳບາງບັນຫາເພື່ອເປັນບ່ອນອີງໃນການຈັດຕັ້ງປະຕິບັດໃນຕໍ່ໜ້າ, ເພື່ອຜັນຂະຫຍາຍເນື້ອໃນມະຕິກອງປະຊຸມໃຫຍ່ຂອງຕົນ ໃຫ້ຫັນເຂົ້າສູ່ຕົວຈິງ, ສືບຕໍ່ສຶກສາອົບຮົມທາງດ້ານການເມືອງ-ແນວຄິດແກ່ສະມາຊິກພັກ-ພະນັກງານ ໃຫ້ມີສະຕິ ແລະ ມີຄວາມຕື່ນຕົວໃນການຈັດຕັ້ງປະຕິບັດຕໍ່ຫນ້າທີ່ວຽກງານດ້ວຍຄວາມຮັບຜິດຊອບສູງ, ເພີ່ມທະວີວຽກງານກໍ່ສ້າງພັກ-ພະນັກງານໃຫ້ຫັນເຂົ້າສູ່ຄຸນນະພາບຫລາຍຂຶ້ນ, ເອົາໃຈໃສ່ວຽກງານກໍ່ສ້າງຮາກຖານການເມືອງ, ພັດທະນາຊົນນະບົດຢ່າງຮອບດ້ານ ຕິດພັນກັບການແກ້ໄຂປະກົດການຫຍໍ້ທໍ້ໃນສັງຄົມ ເປັນຕົ້ນ ບັນຫາຢາເສບຕິດ ແລະ ອື່ນໆ,ເພື່ອແນ່ໃສ່ເຮັດໃຫ້ເມືອງຫລາມີສະຖຽນນະພາບທາງການເມືອງໜັກແໜ້ນເຮັດໃຫ້ເມືອງຫລາມີຄວາມສະຫງົບໂດຍພື້ນຖານ ແລະ ຈົ່ງພ້ອມເອົາໃຈໃສ່ໃນການປ້ອງກັນ ແລະ ສະກັດກັ້ນ ພະຍາດ (COVID -19) ໃຫ້ເຂັ້ມງວດຂຶ້ນ.