ມີເດຍລາວແຂວເຊກອງ (ຂ່າວ-ພາບ: ແກ້ວໄຊຍະວົງ) ກອງປະຊຸມປຶກສາຫາລືວິທີການ, ມາດຕະການຄຸ້ມຄອງ, ການປະສານສົມທົບ ແລະການສ່ອງແສງລາຍງານໂຄງການທະລຸ ແລະກໍ່ສ້າງຍົກລະດັບເສັ້ນທາງລຽບຊາຍແດນລາວ-ຫວຽດນາມ ຂອງແຂວງເຊກອງໄລຍະທີ I ໄດ້ຈັດຂຶ້ນໃນວັນທີ 22 ກໍລະກົດ 2021 ທີ່ຫ້ອງປະຊຸມຊັ້ນ III ຫ້ອງວ່າການແຂວງເຊກອງ ໂດຍການເປັນປະທານຂອງທ່ານ ເຫຼັກໄຫຼ ສີວິໄລ ເຈົ້າແຂວງໆເຊກອງ, ປະທານປ້ອງກັນຊາດ-ປ້ອງກັນຄວາມສະຫງົບຂັ້ນແຂວງ ແລະທ່ານ ພົນຈັດຕະວາ ວັນທອງ ບຸດຕະວົງ ຮອງຫົວໜ້າກົມໃຫຍ່ເສນາທິການກອງທັບ, ມີທ່ານຮອງເຈົ້າແຂວງ, ທ່ານເຈົ້າເມືອງ, ຄະນະຊີ້ນໍາໂຄງການຈາກກະຊວງປ້ອງກັນປະເທດ ແລະຄະນະຊີ້ນໍາໂຄງການຂັ້ນແຂວງເຂົ້າຮ່ວມ.

ໂຄງການທະລຸ ແລະກໍ່ສ້າງຍົກລະດັບເສັ້ນທາງລຽບຊາຍແດນລາວ-ຫວຽດນາມ ຂອງແຂວງເຊກອງໄລຍະທີ I ເປັນໂຄງການຍຸດທະສາດປ້ອງກັນຊາດ ແລະເປັນໂຄງການຍນອນໃນແຜນພັດທະນາພື້ນຖານໂຄງລ່າງ, ເສດຖະກິດ-ສັງ ຄົມ, ການແກ້ໄຂຄວາມທຸກຍາກຂອງປະຊາຊົນບັນດາເຜົ່າ ໂດຍສະເພາະປະຊາຊົນທີ່ອາໄສຢູ່ລຽບຕາມຊາຍແດນລາວ-ຫວຽດນາມຂອງ 2 ເມືອງພູດອຍຄື: ເມືອງກະລຶມ-ເມືອງດາກຈຶງ. ວາລະກອງປະຊຸມໄດ້ມີການສະຫຼຸບຜົນການຈັດຕັ້ງປະຕິບັດບົດບັນທຶກກອງປະຊຸມປຶກສາຫາລື ກ່ຽວກັບການຈັດຕັ້ງປະຕິບັດໂຄງການທະລຸ ແລະກໍ່ສ້າງຍົກລະດັບເສັ້ນທາງຍຸດທະສາດຊາຍແດນລາວ-ຫວຽດນາມ ແຂວງເຊກອງໄລຍະທີ I ໃນເດືອນກໍລະກົດ 2020 ຜ່ານມາ ແລະລາຍງານກ່ຽວກັບຄວາມຄືບໜ້າຂອງໂຄງການວ່າ: ໂຄງການທະລຸ ແລະຍົກລະດັບເສັ້ນທາງລຽບຊາຍແດນລາວ-ຫວຽດນາມແຂວງເຊກອງ ມີຄວາມຍາວທັງໝົດ 101 ກິໂລແມັດ, ໄລຍິເວລາການກໍ່ສ້າງທັງໝົດ 4 ປີ, ມີມູນຄ່າທັງໝົດ 200 ກວ່າຕື້ກີບ ໂດຍນໍາໃຊ້ທຶນຂອງລັດຖະບານແຫ່ງ ສປປ ລາວ 100% ໄດ້ເລີ່ມລົງມືປະຕິບັດມາແຕ່ເດືອນກຸມພາ 2020 ມາຮອດກໍລະກົດ 2021 ວຽກທົ່ວໄປປະຕິບັດໄດ້ 9,1%; ວຽກດິນປະຕິບັດໄດ້ 5,71%; ວຽກໂຄງສ້າງຂົວປະຕິບັດໄດ້ 3,08%. ຈາກນັ້ນຜູ້ເຂົ້າຮ່ວມໄດ້ປະກອບຄໍາຄິດຄໍາເຫັນ ກ່ຽວກັບແຜນການໃນຕໍ່ໜ້າຢ່າງສົມເຫດສົມຜົນສອດຄ່ອງກັບສະພາບຕົວຈິງ.

ໂອກາດນີ້, ທ່ານ ເຫຼັກໄຫຼ ສີວິໄລ ເນັ້ນໃຫ້ຄະນະຮັບຜິດຊອບສືບຕໍ່ຊີ້ນໍາໂຄງການທະລຸ ແລະກໍ່ສ້າງຍົກລະດັບເສັ້ນທາງລຽບຕາມຊາຍແດງລາວ-ຫວຽດນາມ ທຸກຂັ້ນປະຕິບັດໜ້າທີ່ຕາມການມອບໝາຍໃຫ້ມີຜົນສໍາເລັດ, ໂຄສະນາ ແລະປຸກລະດົມຂົນຂວາຍປະຊາຊົນບັນດາເຜົ່າໃຫ້ເຫັນໄດ້ຄວາມໝາຍສໍາຄັນ ແລະເຂົ້າຮ່ວມໃຫ້ການຮ່ວມໄມ້ຮ່ວມມືໃນການປະຕິບັດໂຄງການ, ທັງນີ້ ກໍເພື່ອແນໃສ່ຮັບປະກັນເຮັດໃຫ້ການຈັດຕັ້ງປະຕິບັດໂຄງການບັນລຸຜົນສໍາເລັດຕາມແຜນການທີ່ວາງໄວ້.