ມີເດຍລາວແຂວງເຊກອງ ເມື່ອບໍ່ດົນມານີ້, ທີ່ຫ້ອງວ່າການແຂວງເຊກອງ, ທ່ານ ເຫຼັກໄຫຼ ສີວິໄລ ກໍາມະການສູນກາງພັກ, ເລຂາພັກແຂວງ, ເຈົ້າແຂວງເຊກອງ ໄດ້ຕອນຮັບທ່ານ ປອ. ດາວວົງ ພອນແກ້ວ ກໍາມະການສູນກາງພັກ, ລັດຖະມົນຕີກະຊວງພະລັງງານ ແລະບໍ່ແຮ່ ພ້ອມຄະນະ ໃນໂອກາດມາເຄື່ອນໄຫວວຽກງານຢູ່ແຂວງເຊກອງ.

ທ່ານ ເຫຼັກໄຫຼ ສີວິໄລ ໄດ້ສະແດງການຕ້ອນຮັບ ແລະຕີລາຄາສູງຕໍ່ການມາເຄື່ອນໄຫວວຽກງານຂອງທ່ານລັດຖະມົນຕີກະຊວງພະລັງງານ ແລະບໍ່ແຮ່ ພ້ອມດ້ວຍຄະນະ ເຊິ່ງແຂວງເຊກອງແມ່ນແຂວງແຂວງໜຶ່ງທີ່ຕັ້ງຢູ່ທາງພາກໃຕ້ຂອງ ສປປ ລາວ ແລະເປັນແຂວງທີ່ອຸດົມສົມບູນໄປດ້ວຍຊັບພະຍາກອນທໍາມະຊາດ ໂດຍສະເພາະແມ່ນໍ້າລໍາເຊ- ຫ້ວຍຮ່ອງຫຼາຍສາຍທີ່ສາມາດພັດທະນາເປັນເຂື່ອນໄຟຟ້ານໍ້າຕົກຂະໜາດນ້ອຍ ແລະຂະໜາດກາງ. ພ້ອມກັນນັ້ນ ທ່ານເຈົ້າແຂວງ ແລະທ່ານລັດຖະມົນຕີ ກໍຍັງໄດ້ປຶກສາຫາລືກ່ຽວກັບການຈັດຕັ້ງປະຕິບັດວຽກງານພະລັງງານ ແລະບໍ່ແຮ່ໃນໄລຍະຜ່ານມາ ແລະປຶກສາຫາລືຫາວິທີການແກ້ໄຂໃນຕໍ່ໜ້າ ເພື່ອແນໃສ່ເຮັດໃຫ້ການພັດທະນາວຽກງານພະລັງງານ ແລະບໍ່ແຮ່ນັບມື້ດີຂຶ້ນເປັນກ້າວໆ.

ໂອກາດນີ້, ທ່ານ ປອ. ດາວວົງ ພອນແກ້ວ ກໍໄດ້ສະແດງຄວາມຂອບໃຈ ຕໍ່ທ່ານເຈົ້າແຂວງ ແລະຄະນະພັກ-ຄະ ນະນໍາແຂວງເຊກອງທີ່ໃຫ້ການຕ້ອນຮັບ ແລະທ່ານລັດຖະມົນຕີກໍໄດ້ແຈ້ງຈຸດປະສົງການມາເຄື່ອນໄຫວວຽກງານຄັ້ງນີ້ວ່າ: ເພື່ອຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ ແລະແຜນພັດທະນາເສດຖະກິດ-ສັງຄົມ ກໍຄືແຜນພັດທະນາວຽກງານພະລັງງານ ແລະບໍ່ແຮ່ (2021-2025) ແລະໃຫ້ທິດຊີ້ນໍາການຈັດຕັ້ງປະຕິບັດ, ການຄຸ້ມຄອງການລົງທຶນທີ່ນອນໃນຄວາມຮັບຜິດຊອບຂອງຂະແໜງພະລັງງານ ແລະບໍ່ແຮ່.

ໃນໂອກາດດັ່ງກ່າວ ທ່ານລັດຖະມົນຕີ ແລະທ່ານເຈົ້າແຂວງເຊກອງ ພ້ອມຄະນະ ກໍໄດ້ເຄື່ອນໄຫວຢ້ຽມຢາມ, ຊຸກຍູ້ ແລະຕິດຕາມຄວາມຄືບໜ້າໂຄງການກໍ່ສ້າງເຂື່ອນໄຟຟ້າເຊກະໝານ 3 ແລະໂຄງການກໍ່ສ້າງເຂື່ອນໄຟຟ້ານໍ້າອີມູນມີຢູ່ເມືອງດາກຈຶງ ໂດຍທັງສອງໂຄງການກໍມີຄວາມຄືບໜ້າ, ຄາດວ່າຈະສໍາເລັດ ແລະເປີດນໍາໃຊ້ໃນທ້າຍປີ 2022 ແລະເຊື່ອໝັ້ນວ່າ ຈະເປັນທ່າແຮງສໍາຄັນຕໍ່ການພັດທະນາເສດຖະກິດ-ສັງຄົມຂອງແຂວງ ໂດຍສະເພາະແມ່ນທ່າແຮງໃນການແກ້ໄຂຄວາມທຸກຍາກຂອງປະຊາຊົນ.