ມີເດຍລາວແຂວງຫຼວງພະບາງ
ວັນທີ່ 21 ກໍລະກົດ 2021 ນີ້ ທີ່ໂຮງຮຽນມັດທະຍົມສົມບູນ ມສ ໂພນທອງໄດ້ ເປີດການສອບເສັງຈົບຊັ້ນມັທະຍົມຕົ້ນສຶກສາ ມ4 ທົ່ວເມືອງໂພນທອງ ໂດຍການ ເປັນປະທານຂອງ ທ່ານ ອຳຄາ ແກ້ວອຳພອນ ຮອງ ເຈົ້າເມືອງຜູ້ຊີ້ນຳຂົງເຂດວັດທະນະທຳສັງຄົມ, ທ່ານ ສົມແພດ ພົມມະຈັນ ຫົວໜ້າຫ້ອງການສຶກສາທິການ ແລະ ກິລາເມືອງ,ທ່ານ ພົງສະຫວັນ ອິນດາລັດ ຮອງອຳນວຍການ ມສ ໂພນທອງ ມີປະທານສະມາຄົມພໍ່ແມ່ນັກຮຽນ, ຄະນະກໍາມະການ, ພະນັກງານຄູອາຈານ ແລະ ນ້ອງນັກຮຽນເຂົ້າຮ່ວມ.

ທ່ານ ສົມແພດ ພົມມະຈັນ ຫົວໜ້າຫ້ອງການສຶກສາທິການ ແລະ ກິລາເມືອງ ໄດ້ລາຍງານ ໃຫ້ຮູ້ວ່າ: ການຈັດຕັ້ງການສອບເສັງຈົບຊັ້ນມັດທະຍົມສຶກສາ ມ4 ຄັ້ງນີ້ເພື່ອເປັນການຈັດຕັ້ງປະຕິບັດຕາມຫຼັກສູດການຮຽນ-ການສອນ, ການສອບເສັງເລື່ອນຂັ້ນ ແລະ ຈົບຊັ້ນມັດທະຍົມສຶກສາ ສົກຮຽນ 2020-2021 ເປັນເອກະພາບ ທາງດ້ານການປະຕິບັດໂຄງການຫຼັກສູດໃນຂອບເຂດ ທົ່ວເມືອງ, ໃນການຕັດສິນຢັ້ງຢືນເຖິງການຮຽນຂອງນັກຮຽນ ແລະ ປະສິດທິຜົນຂອງຄູ, ໃນສົກຮຽນ 2020-2021 ທົ່ວເມືອງໂພນທອງມີທັງໝົດ 7 ສູນ,ມີ 14 ຫ້ອງສອບເສັງ , ມີນັກສອບເສັງ 281 ຄົນ ,ຍິງ 144 ຄົນ , ການສອບເສັງ ແມ່ນໃຊ້ເວລາ 3 ວັນ ລະຫວ່າງວັນທີ່ 21-23 ກໍລະກົດ 2021 ໂດຍກໍານົດເອົາ 6 ວິຊາຫຼັກຄື: ພາສາລາວ-ວັນນະຄະດີ,ຄະນິດສາດ,ວິທະຍາຊາດທຳມະຊາດ,ວິທະຍາຊາດສັງຄົມ,ພາສາອັງກິດ,ສຶກສາພົນລະເມືອງ.

ໂອກາດນີ້, ທ່ານ ອຳຄາ ແກ້ວອຳພອນ ຮອງເຈົ້າເມືອງໂດຍມອງ ຜູ້ຊີ້ນຳວຽກງານວັດທະນະທຳສັງຄົມ ໄດ້ໃຫ້ກຽດມີຄໍາເຫັນໂອ້ລົມ ພ້ອມທັງກ່າວເປີດ ແລະ ຕັດຫົວບົດສອບເສັງຢ່າງເປັນທາງການ ເຊິ່ງທ່ານຍັງໄດ້ຮຽກຮ້ອງມາຍັງ, ກໍາມະການທຸກພາກສ່ວນ ທີ່ກ່ຽວຂ້ອງຈົ່ງໄດ້ພ້ອມກັນເອົາໃຈໃສປະຕິບັດລະບຽບວິໄນຂອງການສອບເສັງໃຫ້ຢ່າງເຂັ້ມງວດ, ມີຄວາມໂປ່ງໃສ, ຍຸດຕິທໍາ ບໍ່ມີການລໍາອຽງເຮັດຕາມພາລະບົດບາດ,ຊື່ສັດບໍລິສຸດມີຈັນຍາບັນ ເພື່ອຊອກໃຫ້ໄດ້ນັກຮຽນທີ່ດີີມີຄຸນນະພາບ ມີຄວາມຮູ້ຄວາມສາມາດ, ມີຄຸນສົມບັດ, ເພື່ອສືບທອດພາລະກິດປົກປັກຮັກສາ, ສ້າງສາປະເທດຊາດໃນອານາຄົດໃຫ້ມີຄວາມຈະເລີນຮຸ່ງເຮືອງ ແລະ ສີວິໄລ.
ພາບ-ຂ່າວ: ສົມເພັດ ໄຊມີກອນ ນັກຂ່າວເມືອງໂພນທອງ