ມີເດຍລາວແຂວງຜົ້ງສາລີ ( ພາບ – ຂ່າວ: ແສງຄຳ ສາລີວັນ )
ໃນວັນທີ 22 ກໍລະກົດ 2021 ນີ້, ທ່ານ ຮສ ດຣ ພູທອນ ເມືອງປາກ ປະທານອົງການກາແດງລາວ ພ້ອມດ້ວຍຄະນະໄດ້ເຄື່ອນໄຫວຢຽມຢາມເຮັດວຽກຢູ່ແຂວງຜົ້ງສາລີ ໂດຍ ໄດ້ເຂົ້າພົບທ່ານ ຄຳຜອຍ ວັນນະສານ ກຳມະການສູນກາງພັກ, ເລຂາພັກແຂວງ, ເຈົ້າແຂວງຜົ້ງສາລີ ເພື່ອລາຍງານຈຸດປະສົງການເຄື່ອນໄຫວຈັດຕັ້ງປະຕິບັດວຽກງານຂອງກາແດງໃຫ້ທ່ານເຈົ້າແຂວງຊາບ, ເປັນຕົ້ນແມ່ນ 9 ຫນ້າທີປະຕິບັດຊ່ວຍເຫລືອປະຊາຊົນຜູ້ທຸກຍາກເຊັ່ນ: ວຽກງານຊ່ວຍເຫຼືອບັນເທົາທຸກໃຫ້ແກ່ຜູ້ປະສົບໄພ, ການບໍລິຈາກເລືອດ-ສະໜອງເລືອດປອດໄພໃຫ້ຄົນເຈັບທີ່ໃຊ້ເລືອດໃນການປິ່ນປົວ,ການສົ່ງເສີມສຸຂະພາບປະຊາຊົນໃນເຂດຫ່າງໄກ່ສອກຫລີກ, ກູ້ໄພສຸກເສີນໃນເວລາເກີດອຸປະຕິເຫດຫລືປະສົບໄພຊ່ວຍເຫລືອຢ່າງເລັງດ່ວນ ແລະ ອື່ນໆ. ໃນນັ້ນ, ມີວຽກງານທີ່ສຳຄັນແລະພົ້ນເດັ່ນແມ່ນວຽກງານກູ້ໄພສຸກເສີນ, ວຽກງານຮັບບໍລິຈາກເລືອດ,ວຽກງານຊ່ວຍເຫຼືອບັນເທົາທຸກ ແລະ ອື່ນໆ ທີ່ໃຫ້ການເຫລືອປະຊົນພາຍໃນແຂວງໄດ້ຢ່າງຫຼວງຫຼາຍ

ພ້ອມດຽວກັນນັ້ນອົງການກາແດງລາວຍັງໄດ້ໂອລົມປຶກສາຫາລືກັບທ່ານ ເຈົ້າແຂວງຫລາຍບັນຫາເພື່ອພັດທະນາວຽກງານກາແດງໃຫ້ບັນລຸຕາມຄາດຫມາຍ ແລະ ຂໍທິດທາງໃນການຈັດຕັ້ງປະຕິບັດເຄື່ອນວຽກງານໃນຕໍຫນ້າ. ຈາກນັ້ນ, ທ່ານເຈົ້າແຂວງກໍໄດ້ກ່າວສະແດງການຕ້ອນຮັບຢ່າງອົບອຸ່ນ ແລະ ລາຍງານການຈັດຕັ້ງປະຕິບັດວຽກງານຂອງແຂວງໂດຍຫຍໍ້, ພ້ອມທັງການຊີ້ນຳພາວຽກງານກາແດງແຂວງໃນໄລຍະຜ່ານມາເປັນຕົ້ນແມ່ນການຮັບມືກັບໄພພິບັດທີ່ອາດຈະເກີດຂື້ນຕາມລະດູການ, ການຮັບມືກັບການປ້ອງກັນ ແລະ ສະກັດກັ້ນກັບພະຍາດໂຄວິດ-19, ສຳລັບວຽກງານອື່ນໆກໍໄດ້ເອົາໃຈໃສ່ເພື່ອຊ່ວຍເຫລືອປະຊາຊົນ ໂດຍສະເພາະແມ່ນຜູ້ທີ່ທຸກຍາກຂາດເຂີນ, ຂາດທີ່ເພີ່ງພາອາໄສ.

ໃນໂອກາດທີ່ທ່ານ ປະທານ ອົງການກາແດງລາວເຄື່ອນໄຫວຢ້າມຢາມເຮັດວຽກຢູ່ແຂວງຜົ້ງສາລີຄັ້ງນີ້, ຍັງໄດ້ນຳເອົາເຄື່ອງບັນເທົ່າທຸກ ເປັນຕົ້ນແມ່ນ: ເຂົ້າສານ, ອາຫານແຫ້ງ, ເຄື່ອງນຸ່ງຫົ່ມ, ເຄື່ອງປະຖົມພະຍາບານຂັ້ນພື້ນຖານ, ເສື້ອຊູຊີບ ແລະ ອື່ນໆ ລວມມູນຄ່າທັງໝົດ 49 ລ້ານກ່ວາກີບ. ມາມອບໃຫ້ແຂວງຜົ້ງສາລີຕື່ມອີກ.