ມີເດຍລາວແຂວງສາລະວັນ ຂ່າວ: ກິນດາວັນ ອ້ວນນາຄູ
ເພື່ອລະນຶກເຖິງປະຫວັດແຫ່ງການກໍາເນີດເຕີບໃຫຍ່ຂະຫຍາຍຕົວຂອງພັກກອມມູນິດຈີນ ແລະ ມູນເຊື້ອອັນດີງາມຂອງປະທານ ສຸພາ ນຸວົງ ຜູ້ນໍາທີ່ແສນເຄົາລົບຮັກຂອງປວງຊົນລາວທັງຊາດ, ວັນສ້າງຕັ້ງສະຫະພັນແມ່ຍິງລາວ ຄົບຮອບ 66 ປີ, ໃນວັນທີ 22 ກໍລະກົດ 2021 ຢູ່ທີ່ຫ້ອງວ່າການແຂວງສາລະວັນ ໄດ້ຈັດພິທີປາຖະກະຖາວັນສ້າງຕັ້ງພັກກອມມູນິດຈີນ ຄົບຮອບ 100 ປີ(1 ກໍລະກົດ 1921 – 1 ກໍລະກົດ 2021), ວັນຄ້າຍວັນເກີດຂອງປະທານ ສຸພາ ນຸວົງ ຄົບຮອບ 112 ປີ (13 ກໍລະກົດ 1909 – 13 ກໍລະກົດ 2021) ແລະ ວັນສ້າງຕັ້ງສະຫະພັນແມ່ຍິງລາວ ຄົບຮອບ 66 ປີ, ຕິດພັນກັບການຜ່ານເອກະສານທາບທາມປະກອບຄໍາເຫັນໃສ່ຮ່າງບົດສະຫຼຸບວຽກງານແມ່ຍິງ 6 ເດືອນຕົ້ນປີ ແລະ ທິດທາງ 6 ເດືອນທ້າຍປີ 2021, ໂດຍການເຜີຍແຜ່ຂອງ ທ່ານ ສົມໃຈ ບຸດສະຫານິມິດ ຄະນະພັກຮາກຖານຫ້ອງວ່າການ ຮອງຫົວໜ້າຫ້ອງວ່າການແຂວງ, ມີບັນດາທ່ານ ຄະນະພັກຮາກຖານຫ້ອງວ່າການ, ພະນັກງານສະມາຊິກພັກ, ພະນັກງານລັດຖະກອນພາຍໃນຫ້ອງວ່າການເຂົ້າຮ່ວມ.

ໃນໂອກາດນີ້ ທ່ານ ສົມໃຈ ບຸດສະຫານິມິດ ໄດ້ເລົ່າຄືນປະຫວັດແຫ່ງການສ້າງຕັ້ງພັກກອມມູນິດຈີນ, 100 ປີ ແຫ່ງການນໍາພາຂອງພັກກອມມູນິດຈີນ ແລະ ການພົວພັນລະຫວ່າງສອງພັກ, ສອງລັດຖະບານລາວ-ຈີນ ເຊິ່ງພັກກອມມູນິດຈີນ ແມ່ນພັກການເມືອງທີ່ຍິ່ງໃຫຍ່ ໂດຍໄດ້ຮັບການສ້າງຕັ້ງຂຶ້ນຢູ່ໃນເຮືອລໍານ້ອຍລໍາໜຶ່ງໃນທະເລສາບໃຕ້ ຢູ່ເຂດກົງສູນຝຣັ່ງ ນະຄອນຊຽງໄຮ ເວລານັ້ນມີສະມາຊິກພຽງແຕ່ 58 ສະຫາຍ, ພັກໄດ້ເດີນຕາມຫຼັກການຂອງລັດທິມາກ-ເລນິນ, ພາຍຫຼັງກອງປະຊຸມໃຫຍ່ຄັ້ງທີ 1 ຂອງພັກສໍາເລັດລົງແລ້ວ ບັນດາຜູ້ແທນກອງປະຊຸມກໍໄດ້ນໍາເອົາແນວທາງການປະຕິວັດໄປຈັດຕັ້ງຜັນຂະຫຍາຍຢູ່ໃນທຸກແຂວງ ແລະ ທຸກພາກຂອງປະເທດ, ສິ່ງເລົ່ານັ້ນມັນໄດ້ກາຍເປັນທວນໄຟປະຕິວັດໃຫ້ແກ່ການເລີ່ມຕົ້ນຂະບວນການຕໍ່ສູ້ປະຕິວັດທີ່ມີພັກກອມມູນິດນໍາພາ ນັບແຕ່ເວລານັ້ນເປັນຕົ້ນມາ ແລະ ໄດ້ກໍານົດເອົາວັນທີ 1 ກໍລະກົດ 1921 ເປັນວັນສ້າງຕັ້ງພັກກອມມູນິດຈີນ ເຊິ່ງໄດ້ຮັບການຈັດຕັ້ງປະຕິບັດຈົນເຖິງປະຈຸບັນ, ຕະຫຼອດໄລຍະ 100 ປີ ພັກກອມມູນິດຈີນ ໄດ້ເຕີບໃຫຍ່ຂະຫຍາຍຕົວທາງດ້ານລະບົບການຈັດຕັ້ງພັກ ແລະ ສະມາຊິກພັກກໍໄດ້ມີຈໍານວນເພີ່ມຂຶ້ນຢ່າງຫຼວງຫຼາຍ, ກອງປະຊຸມໃຫຍ່ຂອງພັກດໍາເນີນມາໄດ້ 19 ຄັ້ງ, ເລຂາທິການໃຫຍ່ຂອງພັກກອມມູນິດຈີນ ປະກອບມີ 11 ສະຫາຍ.

ພ້ອມດຽວກັນນັ້ນຜູ້ເຂົ້າຮ່ວມ ກໍໄດ້ສືບຕໍ່ເຊື່ອມຊືມເອກະສານວັນສ້າງຕັ້ງສະຫະພັນແມ່ຍິງລາວ ແລະ ເຊື່ອມຊືມເອກະສານວັນເກີດປະທານ ສຸພານຸວົງຄົບຮອບ 112 ປີ ໃນນັ້ນໄດ້ເຊື່ອມຊຶມເຖິງປະຫວັດຂອງທ່ານປະທານ ສຸພານຸວົງ ເປັນຜູ້ນໍາທີ່ດີເດັ່ນ ແລະ ເຄົາລົບຮັກຊາດຂອງປະຊາຊົນບັນດາເຜົ່າ, ເປັນຜູ້ນໍາທີ່ມີຄວາມຈົ່ງຮັກພັກດີຕໍ່ອຸດົມການປະຕິວັດຢ່າງເດັດຂາດ, ຕໍ່ສູ້ຢ່າງກ້າແກ່ນພິລະອາດຫານ, ຍາມໃດກໍໄດ້ຍົກສູງສະຕິລະບຽບວິໄນໃນການຈັດຕັ້ງ, ນັບຖືໝູ່ຄະນະ, ເອື້ອເພື້ອຮັກແພງມິດສະຫາຍຢ່າງຈິງໃຈ, ດໍາລົງຊີວິດຢ່າງຊື່ສຸດຈະລິດ.