ມີເດຍລາວແຂວງຫຼວງນ້ຳທາ ຂ່າວ: ສົມພອນ ຂຸນດາວົງ ທ່ານ ຄຳເລົາ ແກ້ວລະກຳ ກຳມະການພັກແຂວງ ຫົວໜ້າພະແນກແຮງງານ ແລະ ສະຫັວດດີການ ແລະ ສັງຄົມແຂວງຫຼວງນໍ້າທາ ຮອງປະທານຄະນະຄຸ້ມຄອງໄພພິບັດຂັ້ນແຂວງໄດ້ລາຍງານ ໃນວັນທີ 22 ກໍລະກົດ 2021ນີ້ວ່າ: ໄດ້ເກີດຝົນຕົກໜັກຕິດຕໍ່ກັນ ແຕ່ວັນທີ 18 ຫາ ວັນທີ 21 ກໍລະກົດ 2001 ເຮັດໃຫ້ສາຍນໍ້າຫລາຍສາຂາເພີ່ມຂື້ນຢ່າງໄວວາ ລົ້ນຝັ່ງຖ້ວມໄຮ່ນາ, ຮົ້ວສວນ, ໜອງປາ,ເສັ້ນທາງ-ຂົວ, ຊົນລະປະທານ, ໄຟຟ້າ, ນ້ຳປະປາ, ເຮືອນຊານ, ຮ້ານອາຫານ-ເຮືອນພັກ, ຮ້ານຂາຍເຄື່ອງ, ແລະ ອື່ນໆຂອງປະຊາ ຊົນເສຍຫາຍມີ ເມືອງຫຼວງນ້ຳທາ, ເມືອງລອງ ແລະ ເມືອງວຽງພູຄາຄື: ເມືອງຫຼວງນ້ຳທາຕາມການລົງກວດກາປະເມີນຂອງຄະນະກຳມະການຄຸ້ມຄອງໄພພິບັດຂັ້ນເມືອງຈຸດຖ້ວມຫລາຍຄື: ບ້ານ ນ້ຳແງ້ນ, ບ້ານ ຫລວງ, ບ້ານຂອນ, ດອນຄຸນ, ທ່າອໍ້, ບ້ານໃໝ່,ປ່າສັກ, ບ້ານປຸ່ງ,ຫ້ວຍເລືອດ ແລະ ບ້ານທ່າແສ, ປະຊາຊົນຖືກຜົນກະທົບເສຍຫາຍຈຳນວນໜື່ງເປັນເນື້ອທີ່ທໍາການຜະລິດ (ທົ່ງນາ) ມີຫລາຍ 100 ກວ່າເຮັກຕາ, ສ່ວນເຂົ້າໂພດ-ພຶດຜັກຕ່າງໆ ຫລາຍ 10 ກວ່າເຮັກຕາ, ສວນຍາງພາລາ,ມີສັດປີກ, ຫນອງປາຫລາຍບ່ອນເສຍຫາຍ,ດິນເຊາະເຈື່ອນເຮືອນປະຊາຊົນຈຳນວນ 14 ຫລັງ,ມີປະຊາຊົນເສຍຊີວິດ 1ຄົນ(ດິນຖະຫລົ່ມທັບ)

ແລະ ມີໂຮງງານ 2 ແຫ່ງ, ເມືອງ ລອງ ມີບ້ານທີ່ຖືກຜົນກະທົບ ບ້ານ ຄົກຫີນ 3 ຫຼັງຄາ, ບ້ານນ້ຳບັກ 4 ຫຼັງຄາ, ບ້ານສະ 3 ຫຼັງຄາ, ມີເສັ້ນທາງ 17 B ຖືກນ້ຳເສາະເຈື່ອນ ເປເພ, ເນື້ອທີ່ທຳການຜະລິດເສຍຫາຍ 10 ກວ່າເຮັກຕາ,ບ້ານ ໜອງຄໍາ, ນ້ຳອານ, ປ່າຄາ, ນ້ຳບັກ, ບ້ານສະ, ຊຽງກົກເກົ່າ, ຊຽງກົກໃໝ່ ແລະ ບ້ານ ແສນຂັ້ນຄຳ ເສຍຫາຍປະມານ 30 ເຮັກຕາ, ສວນອ້ອຍ 10 ເຮັກຕາ, ຊົນລະປະທານ 70 ແຫ່ງ,ໂຮງງານຄົບຫີນ 1 ແຫ່ງ, ລົດເມ 3 ຄັນ, ລົດຈັກ 2 ຄັນ, ເຄື່ອງເຈາະຫີນ 6 ອັນ, ລົດຕັກ 1ຄັນ, ປ້ອມນ້ຳມັນ 1 ແຫ່ງ ແລະ ໄມ້ແບບ 200 ແມັດກ້ອນ. ເມືອງ ວຽງພູຄາ ບ້ານທີ່ໄດ້ຮັບຜົນກະທົບ ຈໍານວນ 21 ບ້ານ (ນໍ້າຖ້ວມເນື້ອທີ່ນາ)ຂອງປະຊາຊົນ ພາຍໃນ 5 ກຸ່ມບ້ານມີຄື: ກຸ່ມນ້ຳສິງມີ 5 ບ້ານ, ກຸ່ມບ້ານທ້ຽວ 7 ບ້ານ, ກຸ່ມບ້ານນ້ຳຟ້າ 4 ບ້ານ , ກຸ່ມບ້ານນ້ຳເງິນ 3 ບ້ານ, ກຸ່ມບ້ານນ້ຳມາຍ 2 ບ້ານ.ການຊ່ວຍເຫຼືອເບື້ອງຕົ້ນ ຊ່ວຍສຸກເສີນໃຫ້ປະຊາຊົນຖືກນໍ້າຖ້ວມແມ່ນໃຊ້ກໍາລັງທະຫານເມືອງ,ທະຫານແຂວງ, ອາສາສະມັກຂອງໄວໜຸ່ມ ເຂົ້າຍົກຍ້າຍເດັກນ້ອຍ-ຜູ້ເຖົ້າ, ສັດລ້ຽງ ອອກໄປບ່ອນປອດໄພ, ຍົກຍ້າຍສິ່ງຂອງເຄື່ອງໄປໄວ້ບ່ອນສູງທີ່ປອດໄພ ແລະ ໄດ້ຊ່ວຍ ເຫຼືອນ້ຳດື່ມຈຳນວນໜຶ່ງ.ພະແນກ ຮສສ ໄດ້ຊີ້ນຳ ສົມທົບຫ້ອງ ການແຮງງານ ແລະ ສະຫວັດດີການສັງຄົມເມືອງ , ການນຳຂອງເມືອງ , ຄະນະກໍາມະການຄຸ້ມຄອງໄພພິບັດ ລົງພື້ນທີ່ກວດກາແລະ ຄະນະນຳ ມີທ່ານເຈົ້າແຂວງ ເຈົ້າ ເມືອງໄດ້ລົງໄປກວດພື້ນທີ່ເສຍຫາຍຕົວຈິ່ງ ຮອດເຮືອນປະຊາຊົນທີ່ຢູ່ເຂດສ່ຽງໃຫ້ກຽມພ້ອມຍົກຍ້າຍຖ້າສະພາບນ້ຳຍັງເພີ້ມຂື້ນ.