ໃນຊຸມມື້ມໍ່ໆ ມານີ້ສັງຄົມໄດ້ຕັ້ງບັນຫາເລື່ອງການສັກວັກຊິນຄົບສອງເຂັມ ແຕ່ຍັງມີການຕິດເຊື້ອໂຄວິດ-19 ວ່າຊັ້ນ! ແລ້ວວັກຊິນຊິຊ່ວຍຫັຍງໄດ້ແດ່?

ຜູ້ຂຽນຄິດວ່າ: ຫາກເພື່ອນຜູ້ອ່ານທັງຫຼາຍຕິດຕາມຂ່າວສານ-ບ້ານເມືອງ ໂດຍສະເພາະແມ່ນຄໍາຖະແຫຼງ ຂອງຄະນະສະເພາະກິດເພີ່ນເວົ້າແຈ້ງວ່າ: ສັກວັກຊິນຊະນິດໃດກໍ່ດີ; ລ້ວນແຕ່ມີຄຸນນະພາບ; ແຕ່ບໍ່ແມ່ນຈະບໍ່ຕິດເຊື້ອ ມັນຂື້ນກັບພຶດຕິກຳໃນການດຳລົງຊີວິດຂອງແຕ່ລະຄົນ; ຫາກສັກຢາຄົບສອງເຂັມອາການຈະບໍ່ຮຸນແຮງ; ຮັບປະກັນປົວດີ ແລະ ບໍ່ສ່ຽງເສຍຊີວິດ. ເຫັນບໍ່ ເພີ່ນຮຽກຮ້ອງຕະຫຼອດໃຫ້ຫັນໄປສູ່ເງື່ອນໄຂວິຖີຊີວິດປົກກະຕິແບບໃໝ່ (New Normal).

ກ່ຽວກັບເລື່ອງນີ້; ໃນຄຳຖະແຫຼງ ຂອງທ່ານນາຍົກລັດຖະມົນຕີ ພັນຄຳ ວິພາວັນ ໃນວັນອັງຄານ; ວັນທີ 20 ກໍລະກົດ 2021; ເວລາ 8 ໂມງ: 30 ນາທີ; ທີ່ສຳນັກງານນາຍົກລັດຖະມົນຕີ ເພີ່ນກໍ່ໄດ້ກ່າວໄວ້ວ່າ:

“ສືບຕໍ່ຈັດຫາຢາວັກຊິນ ແລະ ຈັດຕັ້ງສີດໃຫ້ປະຊາຊົນ ໃຫ້ບັນລຸຕາມແຜນການທີ່ກຳນົດໄວ້ ຄື: ຢ່າງໜ້ອຍປີ 2021 ນີ້ໃຫ້ໄດ້ 50% ຂອງພົນລະເມືອງທົ່ວປະເທດ. ປະຈຸບັນໄດ້ສີດໄປແລ້ວສອງເຂັມມີ 743.949 ຄົນ ແລະ ສີດໄປແລ້ວເຂັມທີໜື່ງ 1.056.672 ຄົນ, ຖ້າບວກທັງສອງປະເພດນີ້ເຂົ້າກັນກໍ່ປະມານ 1.800.621 ຄົນ ແລະ ຍັງສືບຕໍ່ສີດຕໍ່ໄປ, ຖ້າສະເລ່ຍຕົວເລກອັນນີ້ ທັງເຂັມໜື່ງ ແລະ ເຂັມສອງ ກໍ່ກວມ 25,7% ຂອງພົນລະເມືອງ ວັກຊິນຍັງຈະສືບຕໍ່ຈັດສົ່ງມາອີກເປັນໄລຍະໄລຍະ ໂດຍສະເພາະໄລຍະໃກ້ໆ ນີ້ ມື້ວັນທີ 16 ກໍລະກົດ 2021 ວັກຊິນຈອນສັນແອນຈອນສັນ ໂດຍໄດ້ຮັບການຊ່ວຍເຫຼືອຈາກລັດຖະບານສະຫະລັດອາເມລິກາ ກໍ່ໄດ້ມາເຖີງ ສປປລາວ ຈຳນວນ 1 ລ້ານໂດສ ຖ້າພວກເຮົາສີດໝົດ 1 ລ້ານໂດສນີ້ ບວກກັບອັນເກົ່າທີ່ສີດຜ່ານມາແລ້ວ ກໍ່ຈະໄດ້ປະມານ 40 ກ່ວາເປີເຊັນຂອງພົນລະເມືອງ ຄາດວ່າຍັງຈະມີວັກຊິນນຳເຂົ້າມາເປັນໄລຍະໄລຍະ ແລະ ພວກເຮົາຈະສາມາດປະຕິບັດໄດ້ຕາມຄາດໝາຍ. ວັກຊິນທີ່ນຳໃຊ້ຢູ່ປະເທດເຮົາແມ່ນມີຫຼາຍຊະນິດ ເຊັ່ນ: ຊີໂນຟາມ, ສະປຸກນິກ, ແອດສຕຣາຊິເນກາ, ຟາຍເຊີ ແລະ ຈອນສັນແອນຈອນສັນ ຢືນຢັນອີກວ່າທຸກສະນິດລ້ວນແຕ່ດີມີຄຸນນະພາບ ລັດຖະບານມີນະໂຍບາຍສັກໃຫ້ປະຊາຊົນຢ່າງສະເໝີພາບ ຕາມຫຼັກວິຊາການແພດ ຊື່ງໄດ້ມີເປົ້າໝາຍຕາມອາຍຸກະສຽນ, ຕາມສະພາບສຸຂະພາບຂອງແຕ່ລະຄົນ ແນ່ໃສ່ຮັບປະກັນຄວາມປອດໄພຂອງປະຊາຊົນ.

ໃນເລື່ອງນີ້ຮຽກຮ້ອງໃຫ້ທຸກຄົນຕື່ນຕົວສະໝັກໃຈ ປະຕິບັດຕາມກົດລະບຽບ ແລະ ແຜນການມາດຕະການທາງການແພດ ຫຼີກເວັ້ນການແຍ່ງຊີງກັນ ແລະ ສ້າງຄວາມສັບສົນໃນເວລາແຈກຢາຍ ແລະ ໃນເວລາສີດວັກຊິນດັ່ງກ່າວ.

ການສີດວັກຊິນ ແມ່ນການສ້າງພູມຕ້ານທານໃນຮ່າງກາຍ ຕາມບົດຮຽນຕົວຈີງຂອງບັນດາປະເທດ ບໍ່ໝາຍຄວາມວ່າໄດ້ສີດຢາແລ້ວຈະບໍ່ຕິດເຊື້ອອີກ, ສີດວັກຊິນແລ້ວກໍ່ຕາມອາດຈະຕິດເຊື້ອໄດ້ອີກ ແຕ່ອາດຈະບໍ່ມີອາການປ່ວຍຮ້າຍແຮງ, ປົວດີໄວ ແລະ ຈຳກັດການເສຍຊີວິດ ສະນັ້ນ ສີດວັກຊິນແລ້ວ ກໍ່ຍັງຕ້ອງສືບຕໍ່ປະຕິບັດຕາມມາດຕະການພື້ນຖານຂອງການປ້ອງກັນ ເຊັ່ນ: ຮັກສາໄລຍະຫ່າງ, ໃສ່ຜ້າອັດປາກ, ລ້າງມືດ້ວຍເຈວມີທາດເຫຼົ້າ ຫຼື ສະບູ ແລະ ປະຕິບັດມາດຕະການອື່ນໆ ທີ່ຄະນະສະເພາະກິດວາງອອກຢ່າງເປັນປົກກະຕິ”.

ຢາກໃຫ້ພວກເຮົາເຂົ້າໃຈວ່າ: ຄາດໝາຍໃຫຍ່ ຂອງລັດຖະບານແມ່ນໃຫ້ມີຜູ້ຕິດເຊື້ອໜ້ອຍທີ່ສຸດ; ມີຜູ້ເສຍຊີວິດໜ້ອຍທີ່ສຸດ ແລະ ໃຫ້ສັງຄົມໄດ້ຫັນສູ່ການດຳລົງຊີວິດປົກກະຕິ ພາຍໃຕ້ເງື່ອນໄຂວິຖີຊີວິດປົກກະຕິໃໝ່ໃຫ້ໄວ ແລະ ທົ່ວເຖີງ.

ທິດດີ