ມີເດຍລາວແຂວງເຊກອງ
ໃນຕອນບ່າຍຂອງວັນທີ 23 ກໍລະກົດ 2021 ນີ້ ທ່ານ ຄໍາສອນ ກອນເຍີ ຮອງເຈົ້າແຂວງເຊກອງ ປະທານຄະນະສະເພາະກິດ ເພື່ອປ້ອງກັນ,ຄວບຄຸມແລະແກ້ໄຂການລະບາດຂອງພະຍາດ Covid-19 ຂັ້ນແຂວງ ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມ ແລະ ຊຸກຍູ້ວຽກງານການສະກັດກັ້ນ,ຄວບຄຸມການລະບາດຂອງເຊື້ອພະຍາດ Covid-19 ຢູ່ເມືອງ ທ່າແຕງ ໂດຍມີຄະນະສະເພາະກິດຂັ້ນເມືອງ ທ່າແຕງເຂົ້າຮ່ວມ.

ກ່ອນການໂອ້ລົມ ທ່ານ ຮອງເຈົ້າແຂວງເຊກອງ ໄດ້ຮັບຟັງສະພາບການຈັດຕັ້ງປະຕິບັດການສະກັດກັ້ນ,ຄວບພະພະຍາດໂຄວິດ 19 ຢູ່ເມືອງທ່າແຕງ ຈາກທ່ານ ກໍລະກັນ ບຸດສະບາ ຫົວໜ້າຫ້ອງການສາທາລະນະສຸກ ຮອງປະທານຄະນະກຳມະການສະເພາະກິດປ້ອງກັ້ນ,ຄວບຄຸມ ແລະ ແກ້ໄຂພະຍາດໂຄວິດ 19 ຂັ້ນເມືອງທ່າແຕງ ຕະຫຼອດໄລຍະຜ່ານມາໂດຍໄດ້ເປັນເຈົ້າການເອົາໃຈໃສ່ກວດກາຄົນເຂົ້າ-ອອກຕາມຈຸດເຊື່ອມຕໍ່ທີ່ມີຊາຍແດນຕິດຈອດກັບເມືອງ ແລະ ແຂວງໄກ້ຄຽງເຊັ່ນ: ເມືອງສາລະວັນແຂວງສາລະວັນ,ເມືອງປາກຊ່ອງແຂວງຈໍາປາສັກ ແລະ ປ່ອງຂ້າມລອຍອື່ນໆເຊິ່ງມີຄົນເຂົ້າ-ອອກເມືອງທັງໝົດ 2.537 ຄົນ,ຄົນລາວມີ 2.276 ຄົນ,ຄົນໄທມີ 20 ຄົນ,ຄົນຫວຽດມີ 182 ຄົນ ແລະ ຄົນຈີນ 59 ຄົນ,ເຊິ່ງໄດ້ນໍາຈໍານວນສະສົມທີ່ມາຈາກເຂດກຸ່ມສຽງມາກັກຕົວຢູ່ບ້ານ ແລະ ຢູ່ສູນກັກບໍລິເວນມີ 188 ຄົນ,ໃນນີ້ ກັກຕົວຢູ່ສູນມີ 22 ຄົນ,ຢູ່ບ້ານ 166 ຄົນ ໂດຍສະເພາະມາຈາກປະເທດໄທ,ນະຄອນຫຼວງວຽງຈັນ,ສະຫວັນນະເຂດ,ນະຄອນປາກເຊ,ສາລະວັນ,ອັດຕະປື,ບໍລິຄໍາໄຊ,ຊຽງຂວາງ,ນາກາຍ,ຈໍາປາສັກ,ຄໍາມ່ວນ,ສສ ຫວຽດນາມ ແລະ ຜູ້ສໍາຜັດກັບກຸ່ມສຽງ. ມາຮອດປັດຈຸບັນເຈົ້າໜ້າທີ່ສາທາລະນະສຸກໄດ້ເກັບຕົວຢ່າງໄປກວດສະສົມມີ 52 ກໍລະນີ,ທັງໝົດຜົນກວດເປັນລົບຫຼືບໍ່ມີຜູ້ຕິດເຊື້ອ,ມາຮອດປັດຈຸບັນທົ່ວເມືອງທ່າແຕງໄດ້ຮັບການສັກວັກຊິນແລ້ວ 2,325 ຄົນ ຫຼື ເທົ່າກັບ 23,65 % ຂອງຈຳນວນເປົ້າໝາຍ 9,828 ຄົນ.


ໂອກາດນີ້ ທ່ານຮອງເຈົ້າແຂວງເຊກອງ ປະທານສະເພາະກິດຂັ້ນແຂວງ ໄດ້ໃຫ້ກຽດໂອ້ລົມໂດຍເນັ້ນໜັກໃຫ້ຄະນະສະເພາະກິດຂັ້ນເມືອງ ລວມໄປເຖິງເຈົ້າໜ້າທີ່ປະຈໍາຢູ່ແຕ່ລະຈຸດກັນກອງ ສືບຕໍ່ເອົາໃຈໃສ່ເປັນເຈົ້າການກວດກາຄົນເຂົ້າ-ອອກເມືອງ ຕ້ອງໄດ້ກວດກາອຸນຫະພູມ,ໃສ່ຜ້າອັດປາກ-ອັດດັງ,ຖ້າເປັນຄົນຕ່າງແຂວງ,ຕ່າງປະເທດທີ່ເຄື່ອນໄຫວເຮັດທຸລະກິດພາຍໃນແຂວງແລະຕ່າງແຂວງ ຕ້ອງມີໜັງສື່ຢັ້ງຢືນຈາກຄະນະສະເພາະກິດຂັ້ນແຂວງ,ຂັ້ນເມືອງແຕ່ຕົ້ນທາງເຖິງປາຍທາງເພື່ອມາສະເໜີເຈົ້າໜ້າທີ່ປະຈໍາແຕ່ລະຈຸດກັ່ນກອງ. ຫຼ້າສຸດໃນວັນທີ 26 ກໍລະກົດ ນີ້. ທ່ານ ສົມເພັດ ເອີດລັດດາ ເຈົ້າເມືອງ-ເມືອງທ່າແຕງໄດ້ກໍໄດ້ເນັ້ນໃຫ້ຄະນະກຳມະການສະເພາະກິດປ້ອງກັນ,ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ 19 ຂອງເມືອງໂດຍເດັດຂາດ,ເຂັ້ມງວດເອົາໃຈໃສ່ຕໍ່ການນໍາເຂົ້າຂອງຜູ້ທີ່ມາຈາກກຸ່ມສຽ່ງບົນພື້ນຖານລະບຽບການ,ມາດຕະການ ແລະ ຄໍາສັ່ງແຕ່ລະຂັ້ນໂດຍໃຫ້ຖືເອົາວຽກປ້ອງກັນ,ຄວບຄຸມ ແລະ ແກ້ໄຂການລະບາດເປັນວຽກທີ່ສຳຄັນໃນຂະແໜງການ.

ໂດຍ: ພອນ ບຸນອຸທິດ