ມີເດຍລາວແຂວງບໍ່ແກ້ວ ພາບ-ຂ່າວ: ພອນສະຫວັນ ມະນີສີ.
ໂຄງການກໍ່ສ້າງຂົວຂ້າມນ້ຳຂອງກ້ອນຕື່ນ – ຫ້ວຍແກ້ວ ເປັນໂຄງານກໍ່ສ້າງທີ່ນຳໃຊ້ທຶນຂອງລັດຖະ ບານລາວໂດຍກົງ, ດ້ວຍທຶນກູ້ຍືມຂອງລັດຖະບານ ໂອຕຼິດ ມູນຄ່າການກໍ່ສ້າງ 180 ກວ່າຕື້ກີບ ແລະ ຮັບເໝົ່າກໍ່ສ້າງ ໂດຍລັດວິສາຫະກິດກໍ່ສ້າງຄົມມະນາຄົມ, ມີຄວາມຄືບໜ້າ ຫຼາຍກ່ວາ 65 % ແລະ ມີທີ່ຕັ້ງຢູ່ເມືອງປາກທາ ແຂວງບໍ່ແກ້ວ, ເຊິ່ງມີລວງຍາວຂອງຂົວ 505 ແມັດ, ລວງກ້ວາງ 12,5 ແມັດ, ຄວາມກວ້າງໜ້າຂົວ 70,40 ແມັດ, ມີທາງຍາງ 2 ເບື້ອງ, ເບື້ອງລະ 1,75 ແມັດ, ຂາງຂົວ ແມ່ນເປັນຂາງເຫຼັກ, ມີ 7 ຊ່ວງ, ຊ່ວງໜຶ່ງມີຄວາມຍາວ 65 ແມັດ, ສ່ວນຊ່ວງກາງນຳ້ມີຄວາມຍາວ 110 ແມັດ, ມີໂຄງສ້າງເຊິ່ງອອກແບບເປັນຂົວປະສົມ.

ທ່ານ ໄຊພອນ ພົມມະວົງ ຫົວໜ້າໜ່ວຍງານ ຂົວທາງ-ຜັງເມືອງ ແລະ ນ້ຳປະປາ ຫ້ອງການໂຍທາທິການ ແລະ ຂົນສົ່ງເມືອງ ທັງເປັນຮອງຫົວໜ້າໂຄງການ ຂົວຂ້າມນ້ຳຂອງ ກ້ອນຕື່ນ-ຫ້ວຍແກ້ວ ເມືອງປາກທາ ແຂວງບໍ່ແກ້ວ ໃຫ້ຮູ້ວ່າ: ມາຮອດປັດຈຸນບັນການກໍ່ສ້າງຂົວຂ້າມນ້ຳຂອງ ກ້ອນຕື່ນ-ຫ້ວຍແກ້ວ ແມ່ນສຳເລັດການກໍ່ສ້າງເສົາຂົວທັງໝົດ 7 ເສົາຄື: ເສົາp1, p2, p3, p4 ແລະ p6, ສຳລັບເສົາຫົວຂົວ A ແລະ B ກໍ່ສ້າງສຳເລັດ 90%, ໃນນັ້ນ ປັດຈຸບັນແມ່ນພວມເລັ່ງປະກອບຂ່າງຂົວເຫຼັກ ຊ່ວງ 65 ແມັດ ເບື້ອງທາງກ້ອນຕື່ນ ປະກອບໄດ້ 195 ແມັດ, ສຳເລັດໂດຍພື້ນຖານ ແລະ ຄາດວ່າຈະຊຸກຂາງເຂົ້າ ໃຫ້ໄດ້ສຳເລັດໃນເດືອນກໍລະກົດນີ້ ພ້ອມດ້ວຍດຳເນີນການປູພື້ນເບຕົງເສີມເຫຼັກໃນຂັ້ນຕອນຕໍ່ໄປ ທ່ານຍັງໃຫ້ຮູ້ຕື່ມວ່າ: ຕໍ່ກັບການກໍ່ສ້າງຂົວຂ້າມນ້ຳຂອງກ້ອນຕື່ນ-ຫ້ວຍແກ້ວຄັ້ງນີ້ ຍັງພົບບັນຫາຂໍ້ຫຍຸ້ງຍາກຫຼາຍສົມຄວນເປັນຕົ້ນແມ່ນ: ຂອດການປະສານງານຍັງເຮັດບໍ່ໄດ້ເທົ່າທີ່ຄວນ, ລະດັບນ້ຳຂອງໃນຊ່ວງຕົ້ນປີມານີ້ ຂື້ນຜິດປົກກະຕິ ເຮັດໃຫ້ການກໍ່ສ້າງພົບຄວາມຫຍຸ້ງຍາກສົມຄວນ, ສະພາບການແຜ່ລະບາດຂອງພະຍາດໂຄວິດ-19 ແລະ ການສຳຫຼວດອອກແບບ ຄັດເລືອກແຫຼວທາງເຂົ້າຂົວ ຝາກກ້ອນຕື່ນຄືນໃໝ່ ຍັງບໍ່ທັນສຳເລັດ.